পূৰ্বৰ বাংলাদেশী ক্ৰিকেটাৰ আৰু আৱামী লীগৰ প্ৰাক্তন সাংসদ ছাকিব অল হাছানৰ মাগুৰা চহৰত থকা বাসগৃহত দুৰ্বৃত্তই আক্ৰমণ কৰিছে। অভিযোগ অনুসৰি, দেশখনৰ প্ৰাক্তন প্ৰধানমন্ত্ৰী শ্বেখ হাছিনাৰ এক ভাৰ্চুৱেল সংবাদমেলাত ছাকিবে অংশগ্ৰহণ কৰাৰ মাত্ৰ কেইঘণ্টামান পিছতেই এই ঘটনা সংঘটিত হয়। বাংলাদেশৰ আৰক্ষী সূত্ৰৰ তথ্য অনুসৰি, নিশা প্ৰায় ৯ বজাৰ ভিতৰত দুৰ্বৃত্তই ছাকিবৰ বাসগৃহলৈ লক্ষ্য কৰি শিলগুটি নিক্ষেপ কৰে আৰু ঘৰৰ কেইবাখনো খিৰিকী ভাঙি পেলায়। মাগুৰা সদৰ থানাৰ বিষয়া মোহাম্মদ আব্দুল্লাহ আল মামুনে সদৰী কৰা মতে, আক্ৰমণকাৰীসকলে ঘৰটোত অগ্নিসংযোগ কৰাৰো চেষ্টা কৰে।
অৱশ্যে ঘটনাৰ সময়ত ছাকিবৰ বাসগৃহটোত কোনো লোক নাছিল। সম্প্ৰতি ক্ৰিকেটাৰজন শ্ৰীলংকাত আছে। ঘটনাৰ পিছতেই আৰক্ষীয়ে অঞ্চলটোত নিৰাপত্তা ব্যৱস্থা অধিক কটকটীয়া কৰি তুলিছে। বুধবাৰে সন্ধিয়া শ্বেখ হাছিনাই প্ৰায় দুবছৰৰ পিছত এক ভাৰ্চুৱেল সংবাদমেল সম্বোধন কৰে। কেৱল অডিঅ’যোগেহে এই ভাৰ্চুৱেল সংবাদমেলখনত অংশ লৈছিল শ্বেখ হাছিনাই। এই ভাৰ্চুৱেল সংবাদমেলখনত ছাকিবৰ উপৰিও শ্বেখ হাছিনাৰ পুত্ৰ ছজীৱ ৱাজিদ জয় আৰু বাংলাদেশৰ প্ৰাক্তন শিক্ষামন্ত্ৰী মহিদুল হাছান চৌধুৰীয়ে অংশ লৈছিল।
আৱামী লীগৰ সাংসদ নিৰ্বাচিত হোৱাৰ পিছতো ছাকিবে ক্ৰিকেট কেৰিয়াৰ অব্যাহত ৰাখিছিল। ২০২৪ চনৰ আগষ্টত বাংলাদেশত সংৰক্ষণবিৰোধী ছাত্ৰ আন্দোলনে তীব্ৰ ৰূপ লোৱাৰ সময়ত তেওঁৰ ভূমিকাক লৈ ব্যাপক সমালোচনা হৈছিল। ছাত্ৰ আন্দোলনৰ সময়ত আৱামী লীগৰ সাংসদ হৈও ছাকিবে কোনো ধৰণৰ ৰাজহুৱা মন্তব্য নকৰাত বহুতে তেওঁৰ নীৰৱতাক লৈ প্ৰশ্ন উত্থাপন কৰিছিল। পিছত শ্বেখ হাছিনা চৰকাৰ পতনৰ পিছত দেশৰ বিভিন্ন প্ৰান্তত আৱামী লীগৰ নেতা-সাংসদসকলৰ বাসগৃহত আক্ৰমণৰ ঘটনা সংঘটিত হয়। সেই সময়তো ছাকিবৰ মাগুৰাৰ ঘৰটো আক্ৰমণৰ সন্মুখীন হৈছিল। অৱশ্যে সেই সময়তো তেওঁ দেশৰ বাহিৰত আছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
