কৌশলগতভাৱে গুৰুত্বপূৰ্ণ হৰমুজ ষ্ট্ৰেইট সন্দৰ্ভত ইৰান আৰু ওমানৰ মাজত সম্ভাৱ্য চুক্তিৰ খবৰ ওলাইছে। খবৰ অনুসৰি এই জলপথৰ মাজেৰে জাহাজৰ যাতায়াত পৰিচালনাৰ ব্যৱস্থাৰ ক্ষেত্ৰত দুয়োখন দেশ পৰস্পৰে ওচৰ চাপিছে। এই সম্ভাৱ্য চুক্তিৰ অধীনত ইৰান আৰু ওমানে পৃথক পৃথক পথৰ জৰিয়তে হৰমুজৰ মাজেৰে সামুদ্ৰিক যাতায়াত নিয়ন্ত্ৰণ কৰিব পাৰিব। এটা পথ উত্তৰ ফালৰ পৰা পাৰস্য উপসাগৰৰ ফালে আৰু আনটো ওমানৰ উপকূলৰ দক্ষিণ ফালৰ পৰা হ’ব পাৰে।
আমেৰিকাৰ প্ৰাক্তন প্ৰতিৰক্ষা মন্ত্ৰী মাৰ্ক এস্পাৰে এই সম্ভাৱ্য ব্যৱস্থাক লৈ উদ্বেগ প্ৰকাশ কৰিছে। ফক্স নিউজৰ ‘আমেৰিকা ৰিপ’ৰ্টছ’ত তেওঁ কয় যে যদি ইৰান আৰু ওমানে হৰমুজ ষ্ট্ৰেইটৰ মাজেৰে যাতায়াতৰ ওপৰত কোনো ধৰণৰ নিয়ন্ত্ৰণ লাভ কৰে তেন্তে ই আমেৰিকাৰ বাবে কূটনৈতিক ক্ষেত্ৰতো হ’ব “অতি ভয়ংকৰ পৰিণতি” হ’ব পাৰে। এস্পাৰে লগতে কয় যে-‘দুয়োখন দেশেই জলপথৰ পৰিচালনাৰ দায়িত্ব ল’ব পাৰে। যাত্ৰী বা জাহাজৰ পৰা কোনো মাচুল লোৱা হ’ব নে নহয় সেয়া স্পষ্ট নহয়। কিন্তু ইৰান আৰু ওমানে যদি কোনো ধৰণে সামুদ্ৰিক যাতায়াত নিয়ন্ত্ৰণ কৰে তেন্তে সেয়া আমেৰিকাৰ বাবে প্ৰতিকূল হব।’
মাৰ্ক এস্পাৰে এই সম্ভাৱ্য চুক্তিত আমেৰিকাৰ ভূমিকা সম্পৰ্কেও প্ৰশ্ন উত্থাপন কৰে। তেওঁ উল্লেখ কৰে যে আমেৰিকাৰ ৰাষ্ট্ৰপতি ড’নাল্ড ট্ৰাম্পে ইতিমধ্যে আলোচনাত ব্যক্তিগতভাৱে জড়িত হোৱাৰ ইংগিত দিছে। ইফালে ইৰানৰ বিষয়াসকলে ৰাজহুৱাভাৱে আমেৰিকাই প্ৰত্যক্ষভাৱে জড়িত থকাৰ কথাক অস্বীকাৰ কৰিছে। এস্পাৰৰ মতে এই সময়ত আটাইতকৈ ডাঙৰ প্ৰশ্নটো হ’ল ইৰান আৰু ওমানৰ মাজত সঁচাকৈয়ে চুক্তি কৰা হৈছে নেকি আৰু যদি হৈছে তেন্তে ইয়াত আমেৰিকাৰ কি ভূমিকা আছে।
পাৰ্চী উপসাগৰ আৰু আৰব সাগৰৰ মাজত অৱস্থিত হৰমুজ ষ্টেইট বিশ্বৰ অন্যতম গুৰুত্বপূৰ্ণ সাগৰীয় পথ। উপসাগৰীয় অঞ্চলৰ পৰা উৎপত্তি হোৱা খাৰুৱা তেল আৰু শক্তিজাত সামগ্ৰীৰ এক উল্লেখযোগ্য অংশ এই পথৰ মাজেৰে পাৰ হৈ যায়। গতিকে যিকোনো দেশ বা দেশৰ দ্বাৰা এই জলপথৰ নিয়ন্ত্ৰণে বিশ্ব শক্তি যোগান আৰু তেলৰ মূল্যত প্ৰত্যক্ষ প্ৰভাৱ পেলাব পাৰে।
যদিহে ইৰান আৰু ওমানৰ মাজত হৰমুজ জলদ্বীপৰ মাজেৰে সামুদ্ৰিক যাতায়াতৰ সন্দৰ্ভত নতুন ব্যৱস্থা কৰা হয়, তেন্তে ইয়াৰ প্ৰভাৱ কেৱল দুয়োখন দেশতে সীমাবদ্ধ নাথাকিব। আমেৰিকাকে ধৰি প্ৰধান অৰ্থনীতিৰ দেশসমূহে এই জলপথৰ নিৰাপত্তা আৰু বাধাহীন প্ৰবাহৰ ওপৰত নিবিড়ভাৱে নিৰীক্ষণ কৰে। এই কাৰণেই এস্পাৰে ইৰাণ-ওমানৰ সম্ভাৱ্য চুক্তিক আমেৰিকাৰ স্বাৰ্থৰ বাবে গুৰুতৰ চিন্তাৰ বিষয় বুলি অভিহিত কৰে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
