পশ্চিম প্ৰশান্ত মহাসাগৰীয় অঞ্চলত ভয়ংকৰ ৰূপ ধাৰণ কৰিছে ‘ডলফিন’ ঘূৰ্ণীবতাহে। জাপানৰ দক্ষিণাঞ্চলৰ ওকিনৱা আৰু কাগোচিমাৰ আমামি দ্বীপপুঞ্জত ধুমুহাৰ প্ৰচণ্ড প্ৰভাৱ পৰাৰ পাছত এতিয়া ‘ডলফিনে’ চীনৰ পূব উপকূলৰ দিশে গতি কৰিছে। ঘণ্টাত প্ৰায় ১৬২ কিলোমিটাৰ বেগৰ ধাৰাবাহিক বতাহ আৰু ঘণ্টাত ২১৬ কিলোমিটাৰ পৰ্যন্ত বতাহৰ জোকাৰণিৰ আশংকাই পৰিস্থিতি অধিক ভয়ংকৰ কৰি তুলিছে।
‘ডলফিন’ৰ প্ৰভাৱত জাপানৰ ওকিনৱা আৰু কাগোচিমা প্ৰিফেকচাৰ, বিশেষকৈ আমামি দ্বীপপুঞ্জত তীব্ৰ বতাহ আৰু মুষলধাৰ বৰষুণে স্বাভাৱিক জনজীৱন ব্যাহত কৰিছে। ধুমুহাৰ ফলত কেইবাজনো লোক আহত হৈছে আৰু বহু অঞ্চলত বিদ্যুৎ যোগান ব্যাহত হৈছে। ৰয়টাৰ্ছৰ মতে, ওকিনৱা আৰু কাগোচিমাত ৫০ হাজাৰতকৈ অধিক অট্টালিকাত বিদ্যুৎ বিচ্ছিন্ন হৈছিল। তীব্ৰ বতাহৰ বাবে গছ-গছনি উভালি পৰাৰ লগতে বিভিন্ন স্থানত পথ যোগাযোগতো সমস্যাৰ সৃষ্টি হৈছে। ইতিমধ্যে বহু বিমানৰ উৰণ বাতিল কৰা হৈছে। জাপানৰ বিমান সংস্থাসমূহে সুৰক্ষাৰ প্ৰতি লক্ষ্য ৰাখি বিমান সেৱাত ব্যাপক পৰিৱৰ্তন আনিছে।
অৱশ্যে টাইফুনৰ আগমনৰ পূৰ্বেই কাগোচিমা আৰু ওকিনৱাৰ প্ৰায় ২.৬ লাখ লোকক সুৰক্ষিত স্থানলৈ যোৱাৰ নিৰ্দেশ দিয়া হৈছিল। বতৰ বিজ্ঞানৰ তথ্য অনুসৰি ‘ডলফিন’ৰ আৰম্ভ হৈছিল ২৬ জুলাইত। আৰম্ভণিতে মাৰ্শ্বাল দ্বীপপুঞ্জৰ ওচৰত সৃষ্টি হোৱা এই নিম্নচাপীয় বতাহে ক্ৰমাৎ টাইফুনৰ ৰূপ লয়। জাপানৰ ফালে আগবাঢ়ি যোৱাৰ সময়ত ইয়াৰ শক্তি দ্ৰুতগতিত বৃদ্ধি পায়। এতিয়া ডলফিনৰ ধাৰাবাহিক বতাহৰ গতিবেগ প্ৰায় ১৬২ কিলোমিটাৰ প্ৰতি ঘণ্টা, আনহাতে সৰ্বোচ্চ বতাহ ২১৬ কিলোমিটাৰ প্ৰতি ঘণ্টা পৰ্যন্ত হ’ব পাৰে।
জাপানৰ পিছত এতিয়া ‘ডলফিন’ টাইফুনে চীনৰ পূব উপকূলৰ দিশে গতি কৰাত দেশখনতো ব্যাপক সতৰ্কতা জাৰি কৰা হৈছে। চীন কৰ্তৃপক্ষই ডলফিনৰ সম্ভাৱ্য প্ৰভাৱৰ প্ৰতি লক্ষ্য ৰাখি জৰুৰীকালীন ব্যৱস্থা বৃদ্ধি কৰিছে। বিশেষকৈ ঝেজিয়াং, উত্তৰ ফুজিয়ান আৰু ছাংহাই অঞ্চলত প্ৰচণ্ড বৰষুণ আৰু ধুমুহাৰ আশংকা কৰা হৈছে। বতৰ বিভাগৰ পূৰ্বানুমান অনুসৰি কোনো কোনো অঞ্চলত ২০০ৰ পৰা ৪০০ মিলিমিটাৰ পৰ্যন্ত বৰষুণ হ’ব পাৰে।
ডলফিনৰ আশংকাত চীনৰ নিংবো চহৰত স্কুল আৰু শিক্ষানুষ্ঠান বন্ধ ঘোষণা কৰা হৈছে। নিংবো লিছে আন্তঃৰাষ্ট্ৰীয় বিমানবন্দৰতো বিমান সেৱা স্থগিত ৰখাৰ সিদ্ধান্ত লোৱা হৈছে। একেদৰে উপকূলীয় অঞ্চলত ফেৰী আৰু অন্যান্য জলপৰিবহণ সেৱাও বন্ধ কৰা হৈছে। ধুমুহাৰ প্ৰচণ্ড প্ৰভাৱৰ আশংকাত চীনৰ উপকূলীয় বন্দৰসমূহতো ব্যাপক প্ৰস্তুতি চলিছে। ছাংহাইৰ বন্দৰকে ধৰি বিভিন্ন বন্দৰৰ পৰা জাহাজ আঁতৰাই সুৰক্ষিত স্থানলৈ নিয়াৰ ব্যৱস্থা কৰা হৈছে। নিংবো বন্দৰতো প্ৰায় ৮০০খন জাহাজ আগতীয়াকৈ সুৰক্ষিতভাৱে ৰাখি দিয়া হৈছে।
ইয়াৰ লগতে চীনৰ পূব অংশত ফেৰী, ক্ৰুজ, মাছ ধৰা নাও আৰু অন্যান্য জলযানৰ চলাচল বন্ধ বা সীমিত কৰা হৈছে। ইয়াংচে নদীৰ ডেল্টা অঞ্চলতো ৰে’ল সেৱা ব্যাহত হোৱাৰ আশংকাত বিভিন্ন সুৰক্ষা ব্যৱস্থা গ্ৰহণ কৰা হৈছে। টাইফুনৰ সৈতে অহা অত্যন্ত ভয়াৱহ বৰষুণক লৈও চিন্তা বৃদ্ধি পাইছে। কিছু অঞ্চলত মুঠ বৰষুণৰ পৰিমাণ ৬০০ মিলিমিটাৰতকৈ অধিক হোৱাৰ আশংকা প্ৰকাশ কৰা হৈছে। এনে পৰিমাণৰ বৰষুণে নিম্নভূমি অঞ্চলত আকস্মিক বান, ভূমিস্খলন আৰু জলমগ্নতাৰ আশংকা বৃদ্ধি কৰিব পাৰে। চীনৰ চৰকাৰী কৰ্তৃপক্ষই ইতিমধ্যে উপকূলীয় অঞ্চলত ঢৌ আৰু ধুমুহাৰ বাবে সতৰ্কতা বৃদ্ধি কৰিছে। বহু পৰ্যটনস্থলী বন্ধ কৰাৰ লগতে জলক্ৰীড়া আৰু পানীৰ সৈতে জড়িত সকলো কাৰ্যসূচী স্থগিত ৰখা হৈছে।
এফালে জাপানত ধুমুহাৰ প্ৰত্যক্ষ প্ৰভাৱত বিদ্যুৎ যোগান, বিমান সেৱা আৰু দৈনন্দিন জনজীৱন ব্যাহত হৈছে। আনফালে চীনে সম্ভাৱ্য বিপদৰ পূৰ্বেই বন্দৰ, বিমানবন্দৰ, বিদ্যালয় আৰু জলপৰিবহণ ব্যৱস্থাত কঠোৰ নিষেধাজ্ঞা আৰোপ কৰিছে। ‘ডলফিন’ৰ গতিপথ আৰু শক্তিৰ ওপৰত বতৰ বিজ্ঞানীসকলে নিৰন্তৰ নজৰ ৰাখিছে। বৰ্তমানৰ পূৰ্বানুমান অনুসৰি জাপান অতিক্ৰম কৰি টাইফুনে চীনৰ ঝেজিয়াং-ফুজিয়ান উপকূলৰ দিশে আগবাঢ়িব পাৰে, যাৰ ফলত দেওবাৰ আৰু সোমবাৰৰ ভিতৰত চীনৰ পূব উপকূলত ইয়াৰ প্ৰভাৱ অধিক স্পষ্ট হোৱাৰ সম্ভাৱনা আছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
