শনিবাৰে মাজ নিশা প্ৰধানমন্ত্ৰী নৰেন্দ্ৰ মোদী আৰু আমেৰিকাৰ উপ-ৰাষ্ট্ৰপতি জে ডি ভেন্সৰ ফোনযোগে বাৰ্তালাপ হয়। মাৰ্কিন উপ ৰাষ্ট্ৰপতিজনে মোদীলৈ ফোন কৰা বুলি প্ৰকাশ কৰি প্ৰধানমন্ত্ৰী মোদীয়ে এই সন্দৰ্ভত টুইটযোগে সদৰী কৰে। ফোনকলটোত উপ-ৰাষ্ট্ৰপতি জে ডি ভেন্সে প্ৰধানমন্ত্ৰী মোদীৰ সৈতে ভাৰত-আমেৰিকাৰ সৰ্বাংগীন বিশ্বব্যাপী কৌশলগত অংশীদাৰিত্বক মূল ক্ষেত্ৰত অধিক শক্তিশালী কৰাৰ উপায়ৰ বিষয়ে আলোচনা কৰে। প্ৰধানমন্ত্ৰী মোদীয়ে ভেন্সক তেওঁৰ সদ্যোজাত পুত্ৰৰ বাবে অভিনন্দ জ্ঞাপন কৰাৰ লগতে মাৰ্কিন “ছেকেণ্ড লেডী”কো ঊষা ভেন্সকো উষ্ম অভিনন্দন জ্ঞাপন কৰে। উল্লেখ্য যে ২০২৫ চনৰ মে’ত পাকিস্তানৰ বিৰুদ্ধে অপাৰেচন সিন্দূৰৰ সময়ত ভেন্সে প্ৰধানমন্ত্ৰী মোদীৰ সৈতে কৰা শেষ ৰাজহুৱা ফোনকল।
তাৎপৰ্যপূৰ্ণ কথাটো হ’ল যে জে ডি ভেন্সে প্ৰধানমন্ত্ৰী মোদীলৈ ফোনকলটো এনে সময় কৰিছে য’ত শেহতীয়াকৈ আমেৰিকাৰ এজন কংগ্ৰেছী সদস্যই ভাৰতৰ FCRA বিধেয়কক লৈ উদ্বেগ প্ৰকাশ কৰিছিল। এন জি অ’, ট্ৰাষ্ট, শিক্ষানুষ্ঠান, ধৰ্মীয় সংগঠনলৈ বিদেশী অনুদানৰ ক্ষেত্ৰত ভাৰতৰ আইনত প্ৰস্তাৱিত পৰিৱৰ্তনক লৈ আমেৰিকাৰ কংগ্ৰেছীগৰাকীয়ে উদ্বেগ প্ৰকাশ কৰে। এই পদক্ষেপে দুয়োখন দেশৰ সম্পৰ্কত প্ৰভাৱ পেলাব পাৰে বুলি সকীয়াই দিয়ে আমেৰিকাৰ কংগ্ৰেছীগৰাকীয়ে
আমেৰিকাৰ কংগ্ৰেছী ৰাইলী মূৰেই অভিযোগ কৰে যে বিদেশী অৱদান নিয়ন্ত্ৰণ আইন (FCRA)ৰ প্ৰস্তাৱিত পৰিৱৰ্তনে ভাৰত চৰকাৰক গীৰ্জা আৰু ধৰ্মীয় দাতব্য সংস্থাসমূহৰ নিয়ন্ত্ৰণ ল’ব পাৰে। তেওঁ এই পদক্ষেপক “খ্ৰীষ্টানসকলৰ ওপৰত প্ৰত্যক্ষ আক্ৰমণ” বুলি অভিহিত কৰে। মূৰৰ এই মন্তব্যৰ পিছতে ভাৰতৰ বৈদেশিক পৰিক্ৰমা মন্ত্ৰালয়ে কয় যে আইনগত বিষয়সমূহ ভাৰতৰ আভ্যন্তৰীণ বিষয়। মন্ত্ৰালয়ে এই কথাও আঙুলিয়াই দিয়ে যে আমেৰিকাকে ধৰি বহু দেশত বিদেশী পুঁজি নিয়ন্ত্ৰণৰ আইন আছে।
ইয়াৰ উপৰিও ভাৰতৰ ওপৰত আমেৰিকাৰ ১০০% শুল্ক কৰ আৰোপৰ বিষয়টোৰ ঠিক পিছতে মাৰ্কিন উপ ৰাষ্ট্ৰপতিৰ ফোনকলটোৱে বিশেষ তাৎপৰ্য বহন কৰিছে। লগতে শুকুৰবাৰে পাকিস্তান-তুৰ্কী-চৌদী আৰবৰ হৈ যোৱা বিশেষ প্ৰতিৰক্ষা চুক্তিৰ পিছতে অহা ফোনকলটোকো কূটনৈতিক বিশেষজ্ঞসকলে বিশেষ চৰ্চাত ৰাখিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
