IAS tukaram mundhe Amazon Case: মহাৰাষ্ট্ৰ কেডাৰৰ প্ৰখ্যাত আই এ এছ বিষয়া তথা খাদ্য আৰু ঔষধ প্ৰশাসন(FDA)ৰ আয়ুক্ত টুকাৰাম মুণ্ডে পুনৰবাৰ বাতৰিৰ শিৰোনাম দখল কৰিছে। ২১ বছৰীয়া প্ৰশাসনিক সেৱাত ২৫ বাৰ বদলি হোৱা মুণ্ডে কঠোৰ সিদ্ধান্তৰ বাবে পৰিচিত। তেওঁ ভেজাল গাখীৰ, স্কুলৰ ওচৰত জাংক ফুড বিক্ৰী, নিয়ম উলংঘা কৰা হোটেল আদিৰ বিৰুদ্ধে কঠোৰ ব্যৱস্থা গ্ৰহণ কৰি আহিছে। কিন্তু তেওঁৰ কঠোৰ স্থিতি আৰু জাননী অবিহনে অনুজ্ঞাপত্ৰ তৎক্ষণাত বাতিল কৰাৰ পন্থাই এতিয়া বম্বে উচ্চ ন্যায়ালয়ৰ চোকা সমালোচনাৰ সন্মুখীন হৈছে। এফ ডি এয়ে আমাজন ৰিটেইল ইণ্ডিয়াৰ গুদামত অভিযান চলাই প্ৰায় ১.৫ টন ম্যাদ উকলি যোৱা আৰু বেয়া খাদ্য সামগ্ৰী জব্দ কৰে। ইয়াৰ পিছতে এফ ডি এয়ে জাননী জাৰি নকৰাকৈয়ে ঠিক পিছদিনা গুদামৰ অনুজ্ঞাপত্ৰ স্থগিত ৰাখে।
প্ৰথমে প্ৰশংসা, তাৰ পিছত কটাক্ষ
যেতিয়া আমাজনে ইয়াৰ বিৰুদ্ধে আপীল কৰিছিল, তেতিয়া ১ জুলাইত কাৰণ দেখুৱাবলৈ জাননী জাৰি কৰা হৈছিল, সেই সময়তে আপীল এতিয়াও বাকী আছিল, আৰু অনুজ্ঞাপত্ৰ সম্পূৰ্ণৰূপে বাতিল কৰা হৈছিল। গোচৰৰ শুনানি গ্ৰহণ কৰি ভাৰপ্ৰাপ্ত মুখ্য ন্যায়াধীশ ৰবীন্দ্ৰ ঘুগে আৰু ন্যায়াধীশ গৌতম আংখৰৰ বিচাৰপীঠে এফ ডি এৰ এই মনোভাৱক লৈ তীব্ৰ অসন্তুষ্টি প্ৰকাশ কৰে। আদালতে এফ ডি এৰ এই প্ৰচেষ্টাক প্ৰশংসা কৰে যদিও প্ৰশাসনিক পদ্ধতিৰ অভাৱৰ কথা উল্লেখ কৰি কয় যে, “আপোনাৰ যি নীতি আক্ৰমণাত্মকভাৱে বলবৎ কৰাৰ, সেয়া আপুনি তৰোৱালেৰে মহ এটাক হত্যা কৰাৰ চেষ্টা কৰাৰ দৰে। আপুনি আইনী পদ্ধতি মানি চলিব লাগিব।”
উল্লেখ্য যে, বৰ্তমানৰ খাদ্য-সুৰক্ষা অভিযানৰ ফলত তেওঁৰ নাম পুনৰ সামাজিক মাধ্যমত “Tukaram Mundhe Effect” হিচাপে চৰ্চা লাভ কৰিছে—অৰ্থাৎ খাদ্যৰ মানদণ্ড উলংঘন কৰিলে ব্যৱস্থা লোৱা হ’ব বুলি প্ৰতিষ্ঠানসমূহৰ মাজত সৃষ্টি হোৱা ভয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
