৮ম দৰমহা আয়োগত কিমান হ’ব ন্যূনতম বেচিক দৰমহা?

কেন্দ্ৰীয় চৰকাৰৰ কৰ্মচাৰীসকলৰ দৃষ্টি এতিয়া ৮ম দৰমহা আয়োগৰ ওপৰত। পৰৱৰ্তী দৰমহা আয়োগত ন্যূনতম বেচিক দৰমহা কিমান হ’ব আৰু কৰ্মচাৰীসকলৰ মুঠ দৰমহা কিমান বৃদ্ধি পাব—এই প্ৰশ্নই এতিয়া সকলোৰে মাজত চৰ্চা লাভ কৰিছে। কিন্তু ৮ম দৰমহা আয়োগৰ সম্ভাৱ্য হিচাপ-নিকাচৰ বিষয়ে জানিবলৈ আগতে জানি লব লাগিব যে আজি ১৮,০০০ টকালৈ বৃদ্ধি পোৱা ন্যূনতম বেচিক দৰমহাৰ এই যাত্ৰা আচলতে ক’ৰ পৰা আৰম্ভ হৈছিল। প্ৰায় আঠটা দশকৰ ভিতৰত কেন্দ্ৰীয় চৰকাৰী কৰ্মচাৰীৰ ন্যূনতম বেচিক দৰমহা ৫৫ টকাৰ পৰা বৃদ্ধি পাই ১৮,০০০ টকা হৈছে। প্ৰতিটো দৰমহা আয়োগে কেৱল কৰ্মচাৰীৰ দৰমহা বৃদ্ধি কৰাই নহয়, চৰকাৰী কৰ্মচাৰীৰ দৰমহা নিৰ্ধাৰণৰ পদ্ধতিতো বিভিন্ন সময়ত গুৰুত্বপূৰ্ণ পৰিৱৰ্তন আনিছে।

প্ৰথম কেন্দ্ৰীয় দৰমহা আয়োগ

প্ৰথম দৰমহা আয়োগ ১৯৪৬ চনত কাৰ্যকৰী হৈছিল। অৰ্থাৎ ভাৰত স্বাধীন হোৱাৰ পূৰ্বেই চৰকাৰী কৰ্মচাৰীৰ দৰমহা নিৰ্ধাৰণৰ বাবে এই ব্যৱস্থা আৰম্ভ হৈছিল। প্ৰথম দৰমহা আয়োগত চৰকাৰী কৰ্মচাৰীৰ ন্যূনতম বেচিক দৰমহা আছিল মাহে ৫৫ টকা। আনহাতে, সৰ্বাধিক বেচিক দৰমহা আছিল ২,০০০ টকা।

দ্বিতীয় দৰমহা আয়োগ

ইয়াৰ পিছত ১৯৫৯ চনত দ্বিতীয় দৰমহা আয়োগ কাৰ্যকৰী হয়। এই আয়োগত ন্যূনতম বেচিক দৰমহা ৫৫ টকাৰ পৰা বৃদ্ধি কৰি মাহে ৮০ টকা কৰা হৈছিল। সেই সময়ত সৰ্বাধিক বেচিক দৰমহাও বৃদ্ধি পাই ৩,০০০ টকা হৈছিল।

তৃতীয় দৰমহা আয়োগ

তৃতীয় দৰমহা আয়োগ ১৯৭৩ চনত কাৰ্যকৰী হয়। এই আয়োগৰ অধীনত ন্যূনতম বেচিক দৰমহাত পুনৰ উল্লেখযোগ্য বৃদ্ধি কৰা হয়। ৫৫ টকাৰ পৰা আৰম্ভ হোৱা ন্যূনতম বেচিক দৰমহা এই সময়ত বৃদ্ধি পাই মাহে ১৯৬ টকা হয়। আনহাতে, সৰ্বাধিক বেচিক দৰমহা ৩,৫০০ টকা নিৰ্ধাৰণ কৰা হৈছিল। অৰ্থাৎ মাত্ৰ কেইটামান দশকৰ ভিতৰতে চৰকাৰী কৰ্মচাৰীৰ ন্যূনতম বেচিক দৰমহা ৫৫ টকাৰ পৰা প্ৰায় ২০০ টকালৈ বৃদ্ধি পাইছিল।

চতুৰ্থ দৰমহা আয়োগ

১৯৮৬ চনত চতুৰ্থ দৰমহা আয়োগ কাৰ্যকৰী হয়। এই আয়োগত ন্যূনতম বেচিক দৰমহাত পুনৰ এক বৃহৎ বৃদ্ধি দেখা যায়। ন্যূনতম বেচিক দৰমহা ১৯৬ টকাৰ পৰা বৃদ্ধি কৰি মাহে ৭৫০ টকা কৰা হয়। আনহাতে, সৰ্বাধিক বেচিক দৰমহা ৮,০০০ টকালৈ বৃদ্ধি পায়।

পঞ্চম দৰমহা আয়োগ

১৯৯৬ চনত কাৰ্যকৰী হোৱা পঞ্চম দৰমহা আয়োগত চৰকাৰী কৰ্মচাৰীৰ ন্যূনতম বেচিক দৰমহাত যথেষ্ট বৃদ্ধি কৰা হয়। ৭৫০ টকাৰ পৰা ন্যূনতম বেচিক দৰমহা বৃদ্ধি কৰি মাহে ২,৫৫০ টকা কৰা হয়। আনহাতে, সৰ্বাধিক বেচিক দৰমহা ২৬,০০০ টকা নিৰ্ধাৰণ কৰা হৈছিল।

ষষ্ঠ দৰমহা আয়োগ

ষষ্ঠ দৰমহা আয়োগ ২০০৬ চনত কাৰ্যকৰী হয়। এই আয়োগত ন্যূনতম বেচিক দৰমহা বৃদ্ধি কৰি মাহে ৭,০০০ টকা কৰা হৈছিল। একে সময়তে সৰ্বাধিক বেচিক দৰমহা ৮০,০০০ টকালৈ বৃদ্ধি পায়। অৰ্থাৎ পঞ্চমৰ পৰা ষষ্ঠ দৰমহা আয়োগলৈ অহাৰ সময়তো কেন্দ্ৰীয় চৰকাৰী কৰ্মচাৰীৰ দৰমহা গাঁথনিত এক বৃহৎ পৰিৱৰ্তন দেখা গৈছিল।

সপ্তম দৰমহা আয়োগ

২০১৬ চনত সপ্তম দৰমহা আয়োগ কাৰ্যকৰী হয়। ইয়াৰ অধীনত কেন্দ্ৰীয় চৰকাৰী কৰ্মচাৰীৰ ন্যূনতম বেচিক দৰমহা ১৮,০০০ টকা কৰা হয়। আনহাতে, সৰ্বাধিক বেচিক দৰমহা ২.৫ লাখ টকা নিৰ্ধাৰণ কৰা হৈছিল। সপ্তম দৰমহা আয়োগ কেৱল দৰমহা বৃদ্ধিৰ বাবেই গুৰুত্বপূৰ্ণ নাছিল। এই আয়োগত চৰকাৰী কৰ্মচাৰীৰ দৰমহাৰ গাঁথনিতো এক বৃহৎ পৰিৱৰ্তন কৰা হৈছিল।

এতিয়া ৮ম দৰমহা আয়োগক লৈ চৰ্চা

এতিয়া সকলোৰে ডাঙৰ প্ৰশ্ন—১৮,০০০ টকাৰ পিছত পৰৱৰ্তী সংখ্যা কিমান হ’ব? ৮ম দৰমহা আয়োগৰ ক্ষেত্ৰত এতিয়াও ন্যূনতম বেচিক দৰমহাৰ চূড়ান্ত সংখ্যা নিৰ্ধাৰণ হোৱা নাই। আয়োগে নিজৰ পৰামৰ্শ দাখিল কৰাৰ পিছত আৰু সেই পৰামৰ্শ কেন্দ্ৰীয় চৰকাৰে অনুমোদন কৰাৰ পিছতহে নতুন ন্যূনতম বেচিক দৰমহাৰ চৰকাৰী তথা চূড়ান্ত সংখ্যা স্পষ্ট হ’ব। সেয়েহে বৰ্তমান ৮ম দৰমহা আয়োগক লৈ বিভিন্ন সম্ভাৱ্য সংখ্যা আৰু অনুমান চৰ্চালৈ আহিলেও, চৰকাৰী সিদ্ধান্ত নোহোৱালৈকে সেইবোৰক চূড়ান্ত বেচিক দৰমহা বুলি ধৰি ল’ব নোৱাৰি। ৫৫ টকাৰ পৰা আৰম্ভ হোৱা কেন্দ্ৰীয় চৰকাৰী কৰ্মচাৰীৰ ন্যূনতম বেচিক দৰমহা আজি ১৮,০০০ টকাত উপনীত হৈছে। এতিয়া ৮ম দৰমহা আয়োগে এই যাত্ৰাক কিমান দূৰ আগুৱাই নিয়ে, সেইটো জানিবলৈ কৰ্মচাৰীসকলে অধীৰ আগ্ৰহেৰে অপেক্ষা কৰিছে।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ