প্ৰতিজন অসমীয়াৰ হৃদয় থানবান কৰি যোৱা সেই অভিশপ্ত ১৯ ছেপ্টেম্বৰলৈ মাজত এতিয়া মাথোঁ আৰু কেইটামান দিন। অসমৰ প্ৰাণৰ শিল্পী জুবিন গাৰ্গবিহীন বৰ্ষপূৰ্তি উপলক্ষে জুবিনক্ষেত্ৰত ৩ দিনীয়াকৈ আয়োজন কৰা হৈছে বিশেষ কাৰ্যসূচী। গৰিমা শইকীয়া গাৰ্গে জুবিনক্ষেত্ৰত উপস্থিত হৈ এই ৩ দিনীয়া কাৰ্যসূচীৰ সবিশেষ সদৰী কৰে। জুবিন গাৰ্গৰ স্মৃতিত অনুষ্ঠিত হ’বলগীয়া এই তিনিদিনীয়া অনুষ্ঠানত সৰ্বধৰ্ম প্ৰাৰ্থনাৰ পৰা আৰম্ভ কৰি জাতি-জনগোষ্ঠীৰ অনুষ্ঠান, সাংস্কৃতিক অনুষ্ঠান, ভাগৱত পাঠ আৰু ভাওনালৈকে বিভিন্ন কাৰ্যসূচী থাকিব।
১৭ ছেপ্টেম্বৰৰ পৰা হ’ব অনুষ্ঠান
১৭ ছেপ্টেম্বৰৰ পুৱা জুবিনক্ষেত্ৰত অনুষ্ঠিত হ’ব সৰ্বধৰ্ম প্ৰাৰ্থনা। বিভিন্ন ধৰ্মৰ লোক একত্ৰিত হৈ প্ৰয়াত শিল্পীগৰাকীৰ আত্মাৰ সদ্গতি কামনা কৰি প্ৰাৰ্থনা আগবঢ়াব। ইয়াৰ পিছতে ১৭ ছেপ্টেম্বৰৰ বিয়লিৰ পৰা অনুষ্ঠিত হ’ব বিভিন্ন জাতি-জনগোষ্ঠীৰ অনুষ্ঠান। এই অনুষ্ঠানত অসমৰ বিভিন্ন জাতি-জনগোষ্ঠীৰ লোকসকলে নিজৰ নিজৰ সাংস্কৃতিক পৰম্পৰা আৰু অনুষ্ঠান পৰিৱেশন কৰিব পাৰিব। কোনো বাধা নোহোৱাকৈ সকলোৱে নিজা অনুষ্ঠান পৰিৱেশনৰ সুযোগ লাভ কৰিব।
১৮ ছেপ্টেম্বৰত সাংস্কৃতিক অনুষ্ঠান
১৮ ছেপ্টেম্বৰৰ বিয়লি জুবিনক্ষেত্ৰত অনুষ্ঠিত হ’ব বিশেষ সাংস্কৃতিক অনুষ্ঠান। অসমৰ শিল্পী সমাজে এই অনুষ্ঠানত জুবিন গাৰ্গক স্মৰণ কৰি বাৰেবৰণীয়া সাংস্কৃতিক অনুষ্ঠান পৰিৱেশন কৰিব। জুবিন গাৰ্গে সংগীতৰ জৰিয়তে অসমীয়াৰ লগতে দেশ-বিদেশৰ অগণন লোকৰ হৃদয় জয় কৰিছিল। সেয়ে শিল্পীগৰাকীৰ স্মৃতিত অনুষ্ঠিত হ’বলগীয়া এই সাংস্কৃতিক অনুষ্ঠান বিশেষ তাৎপৰ্যপূৰ্ণ হ’ব বুলি আশা কৰা হৈছে।
১৯ ছেপ্টেম্বৰ হ’ব মূল স্মৰণৰ দিন
ঈশ্বৰ পুত্ৰ কায়িকভাৱে উপস্থিত নথকা প্ৰথম বাৰ্ষিকীৰ মূল দিন ১৯ ছেপ্টেম্বৰত জুবিনক্ষেত্ৰত বিশেষ ধৰ্মীয় কাৰ্যসূচী অনুষ্ঠিত হ’ব। এই দিনটোত আসন প্ৰতিষ্ঠা কৰি ভাগৱত পাঠৰ আয়োজন কৰা হ’ব। ইয়াৰ পিছত ১৯ ছেপ্টেম্বৰৰ বিয়লিৰ ভাগত জুবিনক্ষেত্ৰত অনুষ্ঠিত হ’ব ভাওনা। অসমীয়া সংস্কৃতি আৰু পৰম্পৰাৰ সৈতে জড়িত এই বিশেষ অনুষ্ঠানৰ জৰিয়তে প্ৰয়াত শিল্পীগৰাকীক শ্ৰদ্ধাৰে স্মৰণ কৰা হ’ব। উল্লেখ্য যে ঈশ্বৰপুত্ৰৰ প্ৰস্থান সমগ্ৰ অসমতে গভীৰ শোকৰ সৃষ্টি কৰিছিল। তেওঁৰ অনুৰাগী আৰু শুভাকাংক্ষীসকলে আজিও শিল্পীগৰাকীৰ গীত, সৃষ্টিশীলতা আৰু সমাজৰ প্ৰতি থকা অৱদান স্মৰণ কৰি আহিছে। এই ৩ দিনীয়া কাৰ্যসূচীৰ জৰিয়তে প্ৰাণৰ শিল্পীগৰাকীৰ স্মৃতিক শ্ৰদ্ধাৰে জীয়াই ৰখাৰ প্ৰয়াস কৰা হৈছে। জুবিনক্ষেত্ৰত অনুষ্ঠিত হ’বলগীয়া এই অনুষ্ঠানসমূহত ৰাজ্যৰ বিভিন্ন প্ৰান্তৰ লোকৰ সমাগম হোৱাৰ সম্ভাৱনা আছে। প্ৰাণৰ শিল্পীগৰাকীক শেষবাৰৰ বাবে স্মৰণ কৰাৰ এই বিশেষ আয়োজনক লৈ ইতিমধ্যে অনুৰাগীসকলৰ মাজতো ব্যাপক আগ্ৰহ সৃষ্টি হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
