অসম প্ৰিমিয়াৰ লীগৰ (APL) প্ৰথমটো সংস্কৰণত অসমৰ কেইবাগৰাকীও ক্ৰিকেটাৰে নিজৰ প্ৰতিভাৰ উমান দিছে। বিশেষকৈ বলিঙত কেইজনমান বলাৰে দৃষ্টি আকৰ্ষণ কৰিবলৈ সক্ষম হৈছে। কিন্তু বেটিঙৰ ক্ষেত্ৰত পৰৱৰ্তী পৰ্যায়লৈ যোৱাৰ সম্ভাৱনা আটাইতকৈ বেছি দেখুওৱা অন্যতম বা একমাত্ৰ নামটো হৈছে গুৱাহাটী ৰয়েলছৰ উইকেটকীপাৰ-বেটাৰ ৰোহিত সেন। APLত ৰোহিতৰ প্ৰদৰ্শন ইতিমধ্যে ক্ৰিকেট অনুৰাগীৰ মাজত চৰ্চাৰ বিষয় হৈ পৰিছে। টুৰ্ণামেণ্টখনত ১২খন মেচ খেলি ৰোহিতে মুঠ ৫৪৩ ৰান সংগ্ৰহ কৰিছে। তেওঁৰ বেটিং গড় ৪৫.২৫। অৰ্থাৎ প্ৰায় প্ৰতিখন মেচতে দলৰ বাবে গুৰুত্বপূৰ্ণ অৱদান আগবঢ়াবলৈ সক্ষম হৈছে তেওঁ।
ৰোহিতৰ ইনিংছসমূহৰ ভিতৰত তিনিটা ৯০ৰো অধিক ৰানৰ ইনিংছ আছে। ইয়াৰ উপৰি তেওঁ চাৰিটা অৰ্ধশতকীয় ইনিংছ খেলিছে। কেৱল ৰান সংগ্ৰহ কৰাই নহয়, অতি আক্ৰমণাত্মক বেটিঙেৰেও ৰোহিতে সকলোৰে দৃষ্টি আকৰ্ষণ কৰিছে। APLত ৰোহিতে ৩৯টা ছিক্স আৰু ৪৮টা বাউণ্ডেৰী কোবাইছে। তেওঁৰ ষ্ট্ৰাইক ৰেট হৈছে ১৮৯.৮৯। T20 ক্ৰিকেটৰ দৰে দ্ৰুত ফৰ্মেটত ১৮৯ৰো অধিক ষ্ট্ৰাইক ৰেট আৰু ৫০০ৰো অধিক ৰান নিশ্চিতভাৱে এক আকৰ্ষণীয় পৰিসংখ্যা।
অৱশ্যে APLত এনে প্ৰদৰ্শন কৰিলেই IPLৰ দৰে ডাঙৰ মঞ্চত সুযোগ লাভ যে কৰিব তাক নিশ্চিতভাৱে কব নোৱাৰি। IPLত স্থান লাভ কৰিবলৈ প্ৰতিভাৰ লগতে ধাৰাবাহিকতা, চাপৰ মাজত ভাল প্ৰদৰ্শন আৰু অধিক প্ৰতিযোগিতামূলক পৰিৱেশত নিজকে প্ৰমাণ কৰাৰ প্ৰয়োজন হয়। সেয়েহে ৰোহিত সেনৰ বাবে এতিয়া পৰৱৰ্তী লক্ষ্য হোৱা উচিত ঘৰুৱা T20 ক্ৰিকেট। আগন্তুক Syed Mushtaq Ali Trophy (SMAT)ত অসমৰ হৈ ভাল প্ৰদৰ্শন কৰাটো তেওঁৰ বাবে অতি গুৰুত্বপূৰ্ণ হ’ব। APLত দেখুওৱা ফৰ্মক যদি তেওঁ SMATতো অব্যাহত ৰাখিব পাৰে, তেন্তে ৰাষ্ট্ৰীয় পৰ্যায়ত তেওঁৰ নাম অধিক শক্তিশালীভাৱে চৰ্চালৈ অহাৰ সম্ভাৱনা থাকিব। কাৰণ SMATত ৰোহিতে পাব APLত কৈ তুলনামূলকভাৱে অধিক শক্তিশালী চেলেঞ্জ। দেশৰ আগশাৰীৰ বলাৰৰ প্ৰত্যাহ্বান ৰোহিতে আগন্তুক সময়ত কেনেকৈ গ্ৰহণ কৰে সেয়াও হব লক্ষণীয়।
ৰোহিতে এতিয়া APLৰ সফলতাত সন্তুষ্ট হৈ ৰৈ নোযোৱাকৈ পূৰ্বতকৈ অধিক পৰিশ্ৰম আৰু মনোনিৱেশেৰে আগবাঢ়িব লাগিব। বিশেষকৈ উইকেটকীপিং আৰু বেটিং—দুয়োটা দিশতে নিজকে অধিক শক্তিশালী কৰি তুলিব পাৰিলে তেওঁৰ সুযোগ আৰু অধিক বৃদ্ধি পাব। এজন অসমীয়া ক্ৰিকেট অনুৰাগীৰ দৃষ্টিৰে চালে, ৰোহিত সেনৰ এই উত্থান নিঃসন্দেহে আশাব্যঞ্জক। অসমৰ পৰা যুৱ প্ৰতিভাই ঘৰুৱা ক্ৰিকেটৰ জৰিয়তে আগবাঢ়ি গৈ IPL বা ভাৰতীয় দলৰ দুৱাৰত টোকৰ মৰাটো ৰাজ্যখনৰ ক্ৰিকেটৰ বাবেও এক ইতিবাচক সংকেত হব।
ইফালে অসমৰ নিৰ্বাচক মণ্ডলীৰ ভূমিকাও এই ক্ষেত্ৰত গুৰুত্বপূৰ্ণ। বিশেষকৈ T20 ক্ৰিকেটত APLত ভাল প্ৰদৰ্শন কৰা নতুন প্ৰতিভাসকলক অধিক সুযোগ দিয়াৰ প্ৰয়োজন আছে। কেৱল পূৰ্বৰ প্ৰদৰ্শনৰ ওপৰত নিৰ্ভৰ নকৰি বৰ্তমানৰ ফৰ্ম আৰু প্ৰদৰ্শনকো গুৰুত্ব দিলে অসমৰ ক্ৰিকেট দলটো অধিক শক্তিশালী হোৱাৰ সম্ভাৱনা আছে। ৰোহিত সেনে APLত নিজৰ সামৰ্থ্যৰ এক শক্তিশালী পৰিচয় দিছে। এতিয়া লক্ষ্য হ’ব লাগিব সেই প্ৰদৰ্শনক ঘৰুৱা T20 ক্ৰিকেটৰ ডাঙৰ মঞ্চলৈ লৈ যোৱা। পৰিশ্ৰম, ধৈৰ্য আৰু ধাৰাবাহিকতা বজাই ৰাখিব পাৰিলে কোকৰাঝাৰৰ এই যুৱ উইকেটকীপাৰ-বেটাৰে ভৱিষ্যতে অসমৰ ক্ৰিকেটত আৰু ডাঙৰ ভূমিকা ল’ব পাৰিব বুলি আশা কৰিব পাৰি।
এই প্ৰতিবেদন যুগুতাইছে মানসজ্যতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
