টীম ইণ্ডিয়াৰ অপেনিং বেটছমেন যশস্বী জয়ছোৱাল আৰু শ্ৰীলংকাৰ বলাৰ আছিথা ফাৰ্ণাণ্ডোৱে ICCৰ শাস্তিৰ সন্মুখীন হৈছে। কলম্বোত অনুষ্ঠিত ভাৰত-শ্ৰীলংকাৰ মাজৰ দ্বিতীয় টেষ্টৰ প্ৰথম দিনা দুয়োৰে মাজত হোৱা অখেলুৱৈসুলভ ঘটনাৰ বাবে এই শাস্তি দিয়া হৈছে।
ICCৰ নিয়ম ভংগ কৰাৰ অভিযোগত দুয়োজন খেলুৱৈৰ মেচ ফীজৰ ২৫ শতাংশকৈ জৰিমনা হিচাপে কৰ্তন কৰা হ’ব। লগতে দুয়োজন খেলুৱৈকে এটাকৈ ডিমেৰিট পইণ্ট দিয়া হৈছে। ঘটনাটো ভাৰতৰ ইনিংছৰ ১৭ অভাৰত সংঘটিত হয়। আছিথা ফাৰ্ণাণ্ডোৱে যশস্বী জয়ছোৱালক আউট কৰাৰ পিছত দুয়োজনৰ মাজত প্ৰথমে কথাৰ কাটাকাটি হয়। ইয়াৰ পিছত ফাৰ্ণাণ্ডোৱে যশস্বী জয়ছোৱালৰ ফালে মূৰ আগবঢ়াই দিয়ে। প্ৰত্যুত্তৰত যশস্বীয়েও আগলৈ হালি দিয়াত দুয়োজনৰ মূৰ ইজনে সিজনৰ সৈতে খুন্দা খায়।
ICCৰ মতে, এই ঘটনাই খেলুৱৈৰ সৈতে অনুপযুক্ত শাৰীৰিক সংস্পৰ্শৰ নিয়ম ভংগ কৰিছে। অৱশ্যে বিগত ২৪ মাহত দুয়োজন খেলুৱৈৰ বিৰুদ্ধে কোনো পূৰ্বৰ অপৰাধৰ ৰেকৰ্ড নাছিল।
যশস্বী জয়ছোৱাল আৰু ফাৰ্ণাণ্ডোৱে নিজৰ ভুল স্বীকাৰ কৰি ICCৰ মেচ ৰেফাৰী এণ্ডি পাইক্ৰফটে দিয়া শাস্তি গ্ৰহণ কৰে। সেয়েহে এই বিষয়ত কোনো আনুষ্ঠানিক শুনানিৰ প্ৰয়োজন নহ’ল। কলম্বোত অনুষ্ঠিত টেষ্টখনৰ তৃতীয় দিনা লান্সৰ সময়লৈ শ্ৰীলংকাই ৪ উইকেটৰ বিনিময়ত সংগ্ৰহ কৰিছে ১৩০ ৰান। ইয়াৰ আগেয়ে দেৱদত্ত পাডিক্কেল আৰু ধ্ৰুৱ জুৰেলৰ শতকীয় ইনিংছৰ সহায়ত ভাৰতে ৫০৩ ৰানত ইনিংছ ঘোষণা কৰিছিল।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
