জনতা ভৱনৰ সন্মুখত এগৰাকী মাতৃৰ হিয়াভগা কান্দোন। পুত্ৰৰ ৰহস্যজনক মৃত্যুৰ উচিত তদন্ত আৰু ন্যায় বিচাৰি লখিমপুৰৰ পৰা আহি প্ৰতিবাদত বহিল এগৰাকী দুৰ্ভগীয়া মাতৃ। মাতৃগৰাকীৰ অভিযোগ, তেওঁৰ পুত্ৰ ৰাকেশ বৰাৰ মৃ*ত্যু সাধাৰণ দুৰ্ঘটনা নহয়, এয়া পৰিকল্পিত হ*ত্যাকাণ্ড। অভিযোগ অনুসৰি, চলিত বৰ্ষৰ ২৮ ফেব্ৰুৱাৰীত বগীনদীৰ ক’লাপানীত ৰাকেশ বৰাৰ ৰহস্যজনকভাৱে মৃ*ত্যু হৈছিল। ঘটনাৰ পিছতে ৰাকেশৰ মাতৃ লক্ষী ওৰফে জেৰিনা বৰাই বগীনদী থানাত এখন এজাহাৰ দাখিল কৰিছিল। কিন্তু জেৰিনা বৰাৰ এজাহাৰৰ কোনো গুৰুত্ব নিদিয়াৰ অভিযোগ বগীনদী থানাৰ বিৰুদ্ধে। জনৈক গংগাফুকন নামৰ এজন আৰক্ষী বিষয়াৰ বিৰুদ্ধে গুৰুতৰ অভিযোগ আনি স্থানীয় আৰক্ষীৰ পৰা ন্যায় নাপায় দুৰ্ভগীয়া মহিলাগৰাকীয়ে এতিয়া ৰাজ্যৰ মুখ্যমন্ত্ৰী হিমন্ত বিশ্ব শৰ্মাৰ ওচৰলৈ ন্যায় বিচাৰি অহা বুলিও সদৰী কৰে।
দুৰ্ভগীয়া মাতৃগৰাকীৰ অভিযোগ, ৰাকেশৰ শৰীৰত আঘাতৰ চিন আছিল। কিন্তু ৰাকেশে চলাই যোৱা স্কুটাৰখনত কোনো ধৰণৰ আঘাত বা দুৰ্ঘটনাৰ স্পষ্ট দাগ নাছিল। এই কথাই ঘটনাটো সন্দেহজনক কৰি তুলিছে বুলি দাবী কৰিছে মাতৃগৰাকীয়ে। ৰাকেশৰ মাতৃ জেৰিনা বৰাৰ অভিযোগ অনুসৰি, আৰক্ষীয়ে সমগ্ৰ ঘটনাটোক দুৰ্ঘটনাৰ ৰূপ দিয়াৰ চেষ্টা কৰিছে। আৰক্ষীৰ কাষ চাপিও তেওঁ পুত্ৰৰ মৃত্যুৰ সন্দৰ্ভত কোনো সন্তোষজনক উত্তৰ লাভ নকৰিলে বুলিও অভিযোগ কৰে।
এজাহাৰত পদ্মেশ্বৰ গগৈ, দিপু গগৈ, শৰৎ সোণোৱাল আৰু ৰুবুল তামুলীৰ নাম উল্লেখ কৰা হৈছিল বুলি মাতৃগৰাকীয়ে দাবী কৰিছে। কিন্তু এই লোকসকলৰ বিৰুদ্ধে উপযুক্ত ব্যৱস্থা গ্ৰহণ কৰা হোৱা নাই বুলিও অভিযোগ উত্থাপন কৰিছে তেওঁ। আনকি বৃহৎ ধনৰ বিনিময়ত আৰক্ষীক ‘মেনেজ’ কৰাৰো গুৰুতৰ অভিযোগ উত্থাপন কৰিছে মাতৃগৰাকীয়ে। অৱশ্যে এই অভিযোগসমূহৰ স্বতন্ত্ৰ সত্যতা এই মুহূৰ্তত নিশ্চিত হোৱা নাই।
পুত্ৰৰ মৃত্যুৰ উচিত তদন্ত আৰু ন্যায়ৰ দাবীত অৱশেষত জনতা ভৱনৰ সন্মুখত প্ৰতিবাদত বহিবলৈ বাধ্য হয় জেৰিনা বৰা। দুবছৰ পূৰ্বে স্বামী মিণ্টু বৰাৰো মৃত্যু হোৱা বুলি জানিবলৈ দিয়ে তেওঁ। স্বামীক হেৰুওৱাৰ পিছত পুত্ৰকো হেৰুওৱা মাতৃগৰাকীয়ে এতিয়া পুত্ৰৰ মৃত্যুৰ প্ৰকৃত সত্য পোহৰলৈ অহাটো বিচাৰিছে। জেৰিনা বৰাই মুখ্যমন্ত্ৰীক সাক্ষাৎ কৰি সমগ্ৰ ঘটনাৰ উচিত তদন্তৰ দাবী জনোৱাৰ লগতে কেন্দ্ৰীয় তদন্তকাৰী সংস্থা (CBI)-ৰ জৰিয়তে তদন্ত কৰাৰ বাবেও দাবী জনাব বুলি জানিবলৈ দিছে।
মাতৃগৰাকীৰ দাবী, তদন্ত নিৰপেক্ষভাৱে আগবঢ়াই ৰাকেশৰ মৃত্যুৰ প্ৰকৃত কাৰণ পোহৰলৈ আনিব লাগে আৰু দোষী কোনো ব্যক্তি থাকিলে তেওঁৰ বিৰুদ্ধে কঠোৰ আইনগত ব্যৱস্থা গ্ৰহণ কৰিব লাগে। পুত্ৰৰ মৃত্যুৰ ন্যায় নাপালে জনতা ভৱনৰ সন্মুখতে আত্মজাহৰো হুংকাৰ দিয়ে দুৰ্ভগীয়া জেৰিনা বৰাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
