কেন্দ্ৰীয় চৰকাৰৰ কৰ্মচাৰী আৰু পেঞ্চনাৰ সংগঠনসমূহে কমিউটেড পেঞ্চন ঘূৰাই দিয়াৰ বৰ্তমানৰ ১৫ বছৰৰ সময়সীমা কমোৱাৰ দাবী জনাইছে। কেইবাটাও সংগঠনে অষ্টম দৰমহা আয়োগৰ ওচৰত এই দাবী উত্থাপন কৰি কৈছে যে ১০ৰ পৰা ১২ বছৰৰ ভিতৰতে কমিউট কৰা পেঞ্চনৰ অংশ পুনৰ ঘূৰাই দিয়া উচিত। সংগঠনসমূহৰ মতে, বৰ্তমানৰ ১৫ বছৰৰ নিয়ম বহু বছৰ পূৰ্বে সেই সময়ৰ সুতৰ হাৰ, আয়ুস, মৃত্যুৰ হাৰ আৰু অন্যান্য আৰ্থিক-এচ্যুৱেৰিয়েল তথ্যৰ ওপৰত ভিত্তি কৰি প্ৰস্তুত কৰা হৈছিল। কিন্তু এতিয়া দেশৰ আৰ্থিক আৰু জনগাঁথনিগত পৰিস্থিতি বহু সলনি হৈছে। সেয়ে পুৰণি নিয়মটো পুনৰ পৰ্যালোচনা কৰাৰ প্ৰয়োজন আছে।
কমিউটেড পেঞ্চন মানে কি?
অৱসৰ গ্ৰহণৰ সময়ত কেন্দ্ৰীয় চৰকাৰৰ কৰ্মচাৰীয়ে নিজৰ মৌলিক পেঞ্চনৰ ৪০ শতাংশ পৰ্যন্ত এককালীন ধন হিচাপে ল’ব পাৰে। পেঞ্চনৰ এই অংশটো আগতীয়াকৈ একেলগে লোৱাকে কমিউটেড পেঞ্চন বুলি কোৱা হয়। উদাহৰণস্বৰূপে, কোনো কৰ্মচাৰীৰ মৌলিক মাহিলী পেঞ্চন যদি ৩৫,০০০ টকা হয়, তেন্তে তেওঁ ইয়াৰ ৪০ শতাংশ অৰ্থাৎ ১৪,০০০ টকা কমিউট কৰিব পাৰে। তাৰ বিনিময়ত তেওঁ এককালীন ধন লাভ কৰে। কিন্তু তাৰ পিছত প্ৰতি মাহে পেঞ্চনৰ পৰা এই ১৪,০০০ টকা কমি যায়। বৰ্তমানৰ নিয়ম অনুসৰি, এই কৰ্তন ১৫ বছৰলৈ চলাৰ পিছত কমিউট কৰা পেঞ্চনৰ অংশ পুনৰ মাহিলী পেঞ্চনত যোগ হয়।
সংগঠনসমূহে কি দাবী কৰিছে?
বিভিন্ন কৰ্মচাৰী আৰু পেঞ্চনাৰ সংগঠনে বিভিন্ন সময়সীমাৰ প্ৰস্তাৱ আগবঢ়াইছে। নেশ্যনেল কাউন্সিল অব জইণ্ট কনছালটেটিভ মেচিনেৰী (NC-JCM), অল ইণ্ডিয়া ডিফেন্স এম্প্লয়িজ ফেডাৰেচন (AIDEF) আৰু ফেডাৰেচন অৱ নেশ্যনেল পোষ্টেল অৰ্গেনাইজেচনছ (FNPO)-এ ১১ বছৰৰ পিছতে পেঞ্চনৰ কমিউট কৰা অংশ পুনৰ ঘূৰাই দিয়াৰ দাবী জনাইছে। আনহাতে, ভাৰতীয় ৰেলৱে কাৰিকৰী তত্বাৱধায়ক সংগঠনে ১২ বছৰৰ সময়সীমাৰ পৰামৰ্শ দিছে। সৰ্বভাৰতীয় নতুন পেঞ্চন আঁচনি কৰ্মচাৰী ফেডাৰেচনে ১০ বছৰৰ দাবী জনাইছে। ভাৰত পেঞ্চনাৰ সমাজ আৰু সৰ্ব পেঞ্চনাৰ সন্থায়ো ১১ বছৰৰ সময়সীমাৰ পোষকতা কৰিছে।
কিয় ১৫ বছৰৰ সময়সীমা কমাব বিচাৰিছে?
পেঞ্চনাৰ সংগঠনসমূহৰ মূল যুক্তি হ’ল—১৫ বছৰৰ সময়সীমা নিৰ্ধাৰণ কৰা সময়ত যি আৰ্থিক আৰু এচ্যুৱেৰিয়েল তথ্য ব্যৱহাৰ কৰা হৈছিল, সেই তথ্য এতিয়া বহু পুৰণি। বিশেষকৈ সুতৰ হাৰ, মানুহৰ গড় আয়ুস, মৃত্যুৰ হাৰ আৰু অন্যান্য আৰ্থিক পৰিস্থিতিৰ যথেষ্ট পৰিৱৰ্তন হৈছে। সেয়ে বৰ্তমানৰ তথ্যৰ ভিত্তিত কমিউটেড পেঞ্চন পুনৰুদ্ধাৰৰ সময় পুনৰ নিৰ্ধাৰণ কৰা উচিত বুলি সংগঠনসমূহে কৈছে। NC-JMCMৰ হিচাপ অনুসৰি, ৬১ বছৰ বয়সত অৱসৰ লোৱা এজন পেঞ্চনাৰৰ ক্ষেত্ৰত কমিউটেচন ফেক্টৰ ৮.১৯৪ ধৰা হয়। অৰ্থাৎ প্ৰতি ১০০ টকা মাহিলী পেঞ্চন কমিউট কৰিলে তেওঁ এককালীন হিচাপে প্ৰায় ৯,৮৩৩ টকা লাভ কৰে। কিন্তু ইয়াৰ বিপৰীতে তেওঁৰ মাহিলী পেঞ্চনৰ পৰা ১০০ টকাকৈ কৰ্তন চলি থাকে। ১০ বছৰত এই কৰ্তনৰ পৰিমাণ হয় ১২,০০০ টকা আৰু ১৫ বছৰত হয় ১৮,০০০ টকা। ইয়াৰ ভিত্তিত সংগঠনটোৱে যুক্তি দিছে যে এককালীন হিচাপে আগতীয়াকৈ লাভ কৰা ধনৰাশি প্ৰায় ১০ বছৰৰ ভিতৰতে পেঞ্চনৰ কৰ্তনৰ জৰিয়তে পূৰণ হৈ যায়। গতিকে তাৰ পিছতো বহু বছৰ ধৰি কৰ্তন চলাই যোৱাটো পেঞ্চনাৰসকলৰ বাবে অন্যায়। সেয়ে ১১ বছৰৰ পিছতে কমিউট কৰা পেঞ্চনৰ অংশ পুনৰ ঘূৰাই দিয়াৰ দাবী উত্থাপন কৰা হৈছে।
পেঞ্চনাৰসকলৰ কিমান লাভ হ’ব পাৰে?
এই নিয়ম সলনি হ’লে অধিক পেঞ্চন লাভ কৰা অৱসৰপ্ৰাপ্ত কৰ্মচাৰীসকলৰ বাবে যথেষ্ট আৰ্থিক লাভ হ’ব পাৰে। ধৰা হওক, এজন পেঞ্চনাৰে প্ৰতিমাহে ৩৫,০০০ টকা মৌলিক পেঞ্চন লাভ কৰে আৰু তেওঁ পেঞ্চনৰ ৪০ শতাংশ অৰ্থাৎ ১৪,০০০ টকা কমিউট কৰিছে। যদি ১১ বছৰৰ পিছত কমিউট কৰা পেঞ্চন পুনৰ ঘূৰাই দিয়া হয়, তেন্তে ১৩২ মাহলৈকে তেওঁৰ পেঞ্চনৰ পৰা ১৪,০০০ টকাকৈ কৰ্তন হ’ব। অৰ্থাৎ মুঠ কৰ্তন হ’ব ১৮.৪৮ লাখ টকা। কিন্তু বৰ্তমানৰ ১৫ বছৰৰ নিয়ম অনুসৰি ১৮০ মাহলৈকে ১৪,০০০ টকাকৈ কৰ্তন হ’ব। অৰ্থাৎ মুঠ ২৫.২০ লাখ টকা কৰ্তন হ’ব। দুয়োটাৰ মাজত পাৰ্থক্য প্ৰায় ৬.৭২ লাখ টকা। অৰ্থাৎ ১৫ বছৰৰ সলনি ১১ বছৰত পেঞ্চন পুনৰ ঘূৰাই দিলে এই উদাহৰণত পেঞ্চনাৰে প্ৰায় ৬.৭২ লাখ টকাৰ অতিৰিক্ত সুবিধা লাভ কৰিব পাৰে।
এতিয়া সিদ্ধান্ত কি হ’ব?
অষ্টম দৰমহা আয়োগে কৰ্মচাৰী আৰু পেঞ্চনাৰ সংগঠনসমূহৰ এই দাবীসমূহ বিবেচনা কৰি চৰকাৰক পৰামৰ্শ দিব পাৰে। কিন্তু এতিয়ালৈকে ১৫ বছৰৰ নিয়ম সলনি হোৱা নাই। অৰ্থাৎ চৰকাৰে নতুন নিয়ম ঘোষণা নকৰালৈকে কমিউটেড পেঞ্চনৰ বৰ্তমানৰ ১৫ বছৰৰ পুনৰুদ্ধাৰ ব্যৱস্থাই প্ৰযোজ্য হৈ থাকিব। অষ্টম দৰমহা আয়োগৰ চূড়ান্ত পৰামৰ্শ আৰু তাৰ পিছত কেন্দ্ৰীয় চৰকাৰৰ সিদ্ধান্তৰ ওপৰত নিৰ্ভৰ কৰিব যে কমিউটেড পেঞ্চন ১০, ১১ বা ১২ বছৰৰ ভিতৰত পুনৰ ঘূৰাই দিয়াৰ নিয়ম কৰা হ’ব নে বৰ্তমানৰ ১৫ বছৰেই বাহাল থাকিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
