টিভিৰ পৰ্দাত তেওঁ আছিল ‘মহাভাৰত’ৰ শক্তিশালী ভীম। যাৰ কাম আছিল অন্যায়ৰ বিৰুদ্ধে যুঁজ দিয়া। কিন্তু বাস্তৱত সেই অভিনেতাৰ বিৰুদ্ধে গুৰুতৰ অভিযোগ উত্থাপন হৈছে। তেওঁ এগৰাকী মহিলাক বিয়াৰ প্ৰতিশ্ৰুতি দি দিনৰ পিছত দিন প্ৰতাৰণা কৰাৰ। কেৱল সেয়াই নহয়, তেওঁৰ বিৰুদ্ধে হাৰাশাস্তিৰ এজাহাৰো দাখিল কৰা হৈছে। আৰু এই ঘটনাৰ বাবেই ইতিমধ্যে আৰক্ষীয়ে তেওঁক মুম্বাই বিমানবন্দৰৰ পৰা গ্ৰেপ্তাৰ কৰিছে।
এই সম্পৰ্ক কেনেকৈ আৰম্ভ হ’ল?
সৌৰভ গুৰ্জাৰ প্ৰথমে WWE মল্লযুঁজাৰু। কিন্তু ২০১৩-১৪ চনত সৰু পৰ্দাৰ ধাৰাবাহিক ‘মহাভাৰত’ত ভীমৰ চৰিত্ৰত অভিনয় কৰি জনপ্ৰিয় হৈ পৰিছিল। এক প্ৰতিবেদন অনুসৰি ২০২১ চনত ইনষ্টাগ্ৰামত এগৰাকী মহিলাক লগ পাইছিল এই জনপ্ৰিয় অভিনেতাগৰাকীয়ে।ক্ৰমান্বয়ে তেওঁলোকে হোৱাটছএপত কথা পাতিবলৈ আৰম্ভ কৰিছিল আৰু তেওঁলোকৰ সম্পৰ্ক বাঢ়ি আহিছিল। মহিলাগৰাকীয়ে লিখিত এজাহাৰত আৰক্ষীক জনাইছে যে সৌৰভে তেওঁক বিয়াৰ প্ৰতিশ্ৰুতি দিছিল। এটা সময়ত তেওঁলোকে আনকি আমেৰিকাতো একেলগে থাকিবলৈ আৰম্ভ কৰিছিল।
চাকৰি এৰি ভাৰতলৈ উভতি অহা
মহিলাগৰাকীয়ে দাবী কৰে যে সৌৰভেই তেওঁক আমেৰিকাত ভাল চাকৰি এৰিবলৈ পতিয়ন নিয়াইছিল। পৰিকল্পনা আছিল যে দুয়োজনে ভাৰতলৈ উভতি আহি একেলগে নতুন ব্যৱসায় আৰম্ভ কৰিব। সেই কথাত অন্ধভাৱে বিশ্বাস কৰি মহিলাগৰাকীয়ে নিজৰ কেৰিয়াৰ এৰি ভাৰতলৈ উভতি আহিল। কিন্তু তাৰ পিছত পৰিস্থিতি সম্পূৰ্ণৰূপে সলনি হ’ল।
বিয়াৰ কথা কওঁতে অভিনেতাজন সলনি হ’ল
আৰক্ষীৰ সূত্ৰ অনুসৰি ভাৰতলৈ উভতি অহাৰ পিছত ২০২৫ চনৰ অক্টোবৰৰ পৰা ২০২৬ চনৰ মাৰ্চ মাহলৈকে দুয়ো একেলগে আছিল। কিন্তু মহিলাগৰাকীয়ে যেতিয়াই বিবাহৰ বিষয়টো উত্থাপন কৰিছিল তেতিয়াই সৌৰভে বিভিন্ন ধৰণে ইয়াক এৰাই চলিছিল। পিছত সৌৰভে ফোন নম্বৰটো ব্লক কৰি দিয়ে।
আৰক্ষীৰ জালত অভিনেতা
অসহায় মহিলাগৰাকীয়ে গাচিবৌলি আৰক্ষীৰ কাষ চাপিল। তাতেই অভিনেতাজনৰ বিৰুদ্ধে লিখিত এজাহাৰ দাখিল কৰে। অভিযোগ লাভ কৰাৰ পিছতে আৰক্ষীয়ে তদন্ত আৰম্ভ কৰে। খবৰ অনুসৰি সৌৰভক মুম্বাই বিমানবন্দৰত আবদ্ধ কৰি ৰাখিছে। তাৰ পৰা আৰক্ষীয়ে পোনে পোনে হায়দৰাবাদলৈ লৈ যায়। তেওঁক ন্যায়িক জিম্মালৈ প্ৰেৰণ কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
