সংসদ ভৱনৰ বাসগৃহৰ কোঠাৰ পৰা উদ্ধাৰ সাংসদৰ দ্বিতীয় পত্নীৰ মৃতদেহ। ঢাকা শ্বেৰ-ই-বাংলা নগৰ থানাৰ অন্তৰ্গত এম পি হোষ্টেলত উত্তেজনা। জানিব পৰা মতে, দেওবাৰে নিশা ঢাকা মহানগৰ আৰক্ষীয়ে ২০৩ নম্বৰ কোঠাৰ পৰা সাংসদ গাজী নাজৰুল ইছলামৰ পত্নীৰ মৃতদেহ উদ্ধাৰ কৰে। জানিব পৰা মতে, নিহত লোকজনৰ নাম মৰিয়ম বেগম। পশ্চিম বংগৰ সীমান্তৱৰ্তী সাতখিৰা অঞ্চলৰ এইজন সাংসদ বাংলাদেশ জামাত-ই-ইছলামীৰ নেতা বুলি জনা যায়। অতি সুৰক্ষিত সংসদ ভৱনৰ ভিতৰৰ বাসগৃহৰ পৰা মৃতদেহ উদ্ধাৰ হোৱা ঘটনাই সমগ্ৰ দেশতে ব্যাপক আলোড়নৰ সৃষ্টি কৰিছে।
আৰক্ষীৰ সূত্ৰৰ পৰা জানিব পৰা মতে, এয়া হ ত্যাকাণ্ড নে চৰম পন্থা, সেয়া এতিয়াও নিশ্চিত হোৱা নাই। অৱশ্যে আৰক্ষীয়ে ইতিমধ্যে ঘটনা সন্দৰ্ভত তদন্ত আৰম্ভ কৰিছে। মন কৰিবলগীয়া যে মৃত যুৱতীগৰাকীৰ সৈতে সাংসদ গাজী নাজৰুল ইছলামে কিছু অন্তৰংগ মুহূৰ্ত পাৰ কৰাৰ ভিডিঅ’ ক্লিপ জুলাই মাহত সমগ্ৰ দেশতে প্ৰচাৰিত হৈছিল। সেই সময়ত বিতৰ্কিত ভিডিঅ’টো প্ৰচাৰ হোৱাৰ পিছত সাংসদগৰাকীয়ে দ্বিতীয় পত্নীক তেওঁৰ অনুমতি সাপেক্ষে বিয়া কৰাইছে বুলি দাবী কৰিছিল। কিন্তু পিছত তেওঁৰ প্ৰথম পত্নীয়ে সেই দাবী অস্বীকাৰ কৰি কয় যে তেওঁ দ্বিতীয় বিবাহৰ বিষয়ে একো নাজানে।
সাংসদগৰাকীৰ বাসগৃহৰ পৰা ৰহস্যজনক পৰিস্থিতিত মৃতদেহ উদ্ধাৰ কৰাৰ পিছতে ঘটনাস্থলীত উপস্থিত হয় আইন প্ৰয়োগকাৰী বাহিনীৰ শীৰ্ষ বিষয়া। আৰক্ষীয়ে জনোৱা মতে, মৰণোত্তৰ পৰীক্ষাৰ প্ৰতিবেদন আৰু প্ৰাৰম্ভিক তদন্তৰ পিছতহে মৃত্যুৰ প্ৰকৃত কাৰণ স্পষ্ট হ’ব, আৰু সেয়া হত্যা নে আত্মহত্যা আছিল সেয়া অতি সোনকালে প্ৰকাশ পাব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
