নগাঁও লোকসভা উপ নিৰ্বাচনৰ প্ৰাকক্ষণত সমষ্টিটোৰ নিৰ্বাচনী প্ৰচাৰত ব্যাপক নিৰ্বাচনী হিংসাৰ ঘটনা পোহৰলৈ আহিছে। আজি চামগুৰিৰ বৰমা অঞ্চলত কংগ্ৰেছ-বিজেপিৰ সমৰ্থকৰ মাজত উত্তেজনাময় পৰিস্থিতিৰ সৃষ্টি হয়। কংগ্ৰেছৰ নিৰ্বাচনী সভালৈ গৈ থকা সময়তে কংগ্ৰেছ নেতা তথা সাংসদ গৌৰৱ গগৈৰ কনভয়ক লক্ষ্য কৰি শিলগুটি, কণী আৰু বটল নিক্ষেপ কৰাৰ অভিযোগ উত্থাপিত হৈছে। ঘটনাত গৌৰৱ গগৈৰ বাহনৰ গ্লাছ ভাঙি যোৱাৰ লগতে অঞ্চলটোত তীব্ৰ উত্তেজনাৰ সৃষ্টি হয়।
জানিব পৰা মতে, চামগুৰি সমষ্টিৰ লৰিমুখত অনুষ্ঠিত হ’বলগীয়া কংগ্ৰেছৰ এখন সভাত অংশগ্ৰহণ কৰিবলৈ কংগ্ৰেছৰ নেতা-কৰ্মীসকল গৈ আছিল। সেই সময়তে বৰমা অঞ্চলত প্ৰায় দুই শতাধিক লোকে মুখত ক’লা কাপোৰ বান্ধি কংগ্ৰেছ কৰ্মীসকলৰ যাত্ৰাত বাধা দিয়াৰ অভিযোগ উত্থাপিত হৈছে। কংগ্ৰেছ কৰ্মীসকলক উভতি যাবলৈ বাধ্য কৰোৱাৰ চেষ্টা চলোৱাৰ পিছতে পৰিস্থিতি অধিক উত্তপ্ত হৈ পৰে।
ইয়াৰ মাজতে কংগ্ৰেছ নেতা গৌৰৱ গগৈ, ছত্তীশগড়ৰ প্ৰাক্তন মুখ্যমন্ত্ৰী তথা কংগ্ৰেছ নেতা ভূপেশ বাঘেল, ৰকিবুল হুছেইন, শিৱামণি বৰা আৰু তাঞ্জিল হুছেইনকে ধৰি কংগ্ৰেছ নেতাসকলৰ বাহন সেই অঞ্চলৰ মাজেৰে পাৰ হৈ যোৱাৰ সময়ত পৰিস্থিতি অধিক উত্তেজনাপূৰ্ণ হৈ উঠে। অভিযোগ অনুসৰি, সেই সময়ত একাংশ লোকৰ পৰা কংগ্ৰেছ নেতাসকলৰ বাহনলৈ শিলগুটি, কণী আৰু কাঁচৰ বটল নিক্ষেপ কৰা হয়। গৌৰৱ গগৈৰ বাহনখনো লক্ষ্য কৰি শিলগুটি নিক্ষেপ কৰাৰ ফলত বাহনখনৰ গ্লাছ ভাঙি চূৰ্ণ-বিচূৰ্ণ হোৱা বুলি জানিব পৰা গৈছে।
ঘটনাৰ পিছতে গৌৰৱ গগৈ আৰু ৰকিবুল হুছেইনৰ বাহনো লোকসকলে ঘেৰাও কৰা বুলি অভিযোগ উত্থাপিত হৈছে। একাংশই বাহন আৱদ্ধ কৰি নেতাসকলক খেদি পঠোৱাৰ চেষ্টা কৰা বুলিও অভিযোগ উত্থাপিত হৈছে। ফলত কিছু সময়ৰ বাবে সমগ্ৰ বৰমা অঞ্চলত এক হাহাকাৰময় পৰিস্থিতিৰ সৃষ্টি হয়। পৰিস্থিতি নিয়ন্ত্ৰণৰ বাবে ঘটনাস্থলীত বৃহৎ সংখ্যক আৰক্ষীৰ দল মোতায়েন কৰা হয়। উত্তেজিত লোকসকলক আঁতৰাই পৰিস্থিতি নিয়ন্ত্ৰণলৈ আনিবলৈ আৰক্ষীয়ে লাঠিচালনা কৰিবলগীয়া হয় বুলি জানিব পৰা গৈছে।
ঘটনাক কেন্দ্ৰ কৰি চামগুৰিত ব্যাপক ৰাজনৈতিক উত্তেজনা বৃদ্ধি পোৱাৰ আশংকা কৰা হৈছে। বিশেষকৈ নিৰ্বাচনী সভাক কেন্দ্ৰ কৰি সংঘটিত এই ঘটনাই অঞ্চলটোৰ ৰাজনৈতিক পৰিৱেশ গৰম কৰি তুলিছে। ইফালে, ঘটনাটোত কোন কোন লোক জড়িত আছিল আৰু কিয় এনে পৰিস্থিতিৰ সৃষ্টি হ’ল, সেই বিষয়ে আৰক্ষীৰ তদন্তৰ পিছতহে অধিক তথ্য স্পষ্ট হ’ব। বৰ্তমান অঞ্চলটোত যাতে পুনৰ কোনো অপ্ৰীতিকৰ ঘটনা সংঘটিত নহয়, তাৰ বাবে নিৰাপত্তা ব্যৱস্থা কটকটীয়া কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
