শীঘ্ৰেই বজাৰলৈ আহিব প্ৰটিনযুক্ত বীয়েৰ!

স্বাস্থ্য উন্নত কৰা, শৰীৰৰ অতিৰিক্ত চৰ্বি কমোৱা বা ফিটনেছ বজাই ৰখাৰ ক্ষেত্ৰত প্ৰটিনৰ গুৰুত্ব যথেষ্ট। বিগত কেইবছৰমানত বজাৰত প্ৰটিনযুক্ত বিভিন্ন খাদ্য আৰু পানীয়ৰ চাহিদা দ্ৰুতগতিত বৃদ্ধি পাইছে। এতিয়া এই তালিকাত যোগ হ’ব পাৰে প্ৰটিনযুক্ত বীয়েৰ। হয়, শুনিবলৈ কিছু আচৰিত যেন লাগিলেও বীয়েৰকো ‘স্বাস্থ্যকৰ’ ৰূপ দিয়াৰ প্ৰয়াস চলিছে। বিশ্বৰ অন্যতম বৃহৎ ব্ৰুয়াৰ কোম্পানীয়ে ইতিমধ্যে এনে সামগ্ৰীৰ প্ৰস্তুতি আৰম্ভ কৰিছে। কেৱল এটা কোম্পানীয়েই নহয়, আন কেইবাটাও কোম্পানীয়েও কম পৰিমাণৰ পেকেজত প্ৰটিন, ইলেক্ট্ৰ’লাইট আদি উপাদান যোগ কৰি নতুন ধৰণৰ বিয়েৰ বজাৰত আনিবলৈ পৰিকল্পনা কৰিছে। ইয়াৰ মূল লক্ষ্য হৈছে স্বাস্থ্য আৰু ফিটনেছৰ প্ৰতি অধিক সচেতন হৈ পৰা গ্ৰাহকৰ পৰিৱৰ্তিত পছন্দৰ সৈতে খাপ খোৱা।

ফিটনেছ অনুৰাগী যুৱক-যুৱতীক লক্ষ্য

নতুন প্ৰজন্মৰ মাজত জিম, ব্যায়াম আৰু স্বাস্থ্যসন্মত জীৱনশৈলীৰ প্ৰতি আগ্ৰহ বৃদ্ধি পাইছে। এই গ্ৰাহকসকলক লক্ষ্য কৰিয়েই কোম্পানীসমূহে কম কেলৰি আৰু অধিক প্ৰটিনযুক্ত বিয়েৰৰ বিকল্প আনিবলৈ চেষ্টা কৰিছে। ইয়াৰ আন এটা কাৰণ হৈছে জেন-জেড প্ৰজন্মৰ মাজত পূৰ্বৰ প্ৰজন্মৰ তুলনাত মদ্যপানৰ প্ৰতি আগ্ৰহ কিছু কমি অহা। সেয়ে বিয়েৰ কোম্পানীসমূহে নতুন ধৰণৰ সামগ্ৰীৰ জৰিয়তে এই গ্ৰাহকসকলক পুনৰ আকৰ্ষণ কৰাৰ চেষ্টা কৰিছে। ইতিমধ্যে ব্ৰাজিলত Spaten নামৰ বিয়েৰ ব্ৰেণ্ডে প্ৰটিন-ভিত্তিক সংস্কৰণ মুকলি কৰিছে বুলি জানিব পৰা গৈছে। আগন্তুক সময়ত কম কেলৰি আৰু শূন্য এলকহলযুক্ত বীয়েৰত প্ৰটিন আৰু ইলেক্ট্ৰ’লাইটৰ দৰে উপাদান যোগ কৰি বজাৰ সম্প্ৰসাৰণৰ পৰিকল্পনাও কৰা হৈছে। কোম্পানীসমূহৰ লক্ষ্য হৈছে মাজে-সময়ে বীয়েৰ খোৱা লোকসকলৰ মাজত ইয়াৰ সেৱন বৃদ্ধি কৰা।

সঁচাকৈয়ে স্বাস্থ্যকৰ হ’বনে?

ইয়াতেই আহে আটাইতকৈ গুৰুত্বপূৰ্ণ প্ৰশ্নটো। বীয়েৰত প্ৰটিন বা ইলেক্ট্ৰ’লাইট যোগ কৰিলে সেয়া সঁচাকৈয়ে স্বাস্থ্যকৰ পানীয় হৈ পৰিবনে? প্ৰটিন যোগ কৰিলে পানীয়টোৰ পুষ্টিগত মূল্য কিছু বৃদ্ধি পাব পাৰে। কিন্তু ইয়াৰ ফলত এলকহলৰ ক্ষতিকাৰক প্ৰভাৱ নাইকিয়া নহয়। অৰ্থাৎ বিয়েৰত প্ৰটিন থাকিলেও ইয়াত থকা এলকহল শৰীৰৰ ওপৰত আগৰ দৰেই প্ৰভাৱ পেলাব পাৰে। এলকহল হৈছে এক মনোসক্ৰিয় আৰু নিচাযুক্ত পদাৰ্থ। বিশ্ব স্বাস্থ্য সংস্থাৰ মতে, এলকহল সেৱনৰ সৈতে ২০০ৰো অধিক ৰোগ, আঘাত আৰু অন্যান্য স্বাস্থ্যজনিত সমস্যাৰ সম্পৰ্ক আছে। এলকহলক কৰ্কট ৰোগৰ সৈতে জড়িত এটা কাৰ্চিনোজেন হিচাপেও গণ্য কৰা হয়। ইয়াৰ ফলত স্তন, যকৃত, কলৰেক্টাল আৰু খাদ্যনলীৰ কৰ্কট ৰোগৰ আশংকা বৃদ্ধি পাব পাৰে। সেয়ে কেৱল বীয়েৰত অলপ প্ৰটিন যোগ কৰা হৈছে বুলিয়েই ইয়াক নিয়মিতভাৱে সেৱন কৰিব পৰা ‘স্বাস্থ্যকৰ পানীয়’ বুলি ধৰি লোৱাটো উচিত নহয়।

ইলেক্ট্ৰ’লাইট থাকিলেই হাইড্ৰেচন ভাল হ’বনে?

ছডিয়াম আৰু পটাছিয়ামৰ দৰে ইলেক্ট্ৰ’লাইটে শৰীৰৰ তৰল পদাৰ্থৰ ভাৰসাম্য ৰক্ষা কৰাত গুৰুত্বপূৰ্ণ ভূমিকা পালন কৰে। বিশেষকৈ অধিক ঘাম ওলোৱা, দীঘলীয়া সময় ব্যায়াম কৰা বা পানীলগাৰ সময়ত ইলেক্ট্ৰ’লাইট উপকাৰী হ’ব পাৰে। কিন্তু এলকহলযুক্ত পানীয়ত ইলেক্ট্ৰ’লাইট যোগ কৰিলেই সেই পানীয় হাইড্ৰেচনৰ বাবে উপযোগী হৈ নপৰে। কাৰণ এলকহলে প্ৰস্ৰাৱৰ পৰিমাণ বৃদ্ধি কৰিব পাৰে আৰু ইয়াৰ ফলত শৰীৰত পানীৰ অভাৱ হ’ব পাৰে। লগতে শৰীৰৰ ইলেক্ট্ৰ’লাইটৰ ভাৰসাম্যতো প্ৰভাৱ পৰিব পাৰে। সেয়ে কোনো এলকহলযুক্ত পানীয়ত ‘ইলেক্ট্ৰ’লাইট’ লিখা থাকিলেই ইয়াক সাধাৰণ পানী বা হাইড্ৰেচন ড্ৰিংকৰ বিকল্প হিচাপে গ্ৰহণ কৰাটো উচিত নহয়।

স্বাস্থ্যৰ নামত নতুন বিপণন কৌশল?

বিশেষজ্ঞসকলে এনে সামগ্ৰীৰ ক্ষেত্ৰত সাৱধান হ’বলৈ কয়। কাৰণ প্ৰটিন, ইলেক্ট্ৰ’লাইট বা কম কেলৰিৰ দৰে শব্দই কোনো এটা এলকহলযুক্ত সামগ্ৰীক গ্ৰাহকৰ আগত স্বাস্থ্যকৰ যেন প্ৰতীয়মান কৰাব পাৰে। কোম্পানীসমূহে মূলতঃ স্বাস্থ্য আৰু ফিটনেছৰ ক্ৰমবৰ্ধমান জনপ্ৰিয়তাক ব্যৱহাৰ কৰি নতুন গ্ৰাহক আকৰ্ষণ কৰাৰ চেষ্টা কৰিছে। কিন্তু কোনো সামগ্ৰীত উপকাৰী পুষ্টিকৰ উপাদান যোগ কৰা মানেই সেই সামগ্ৰীত থকা এলকহলৰ ক্ষতিকাৰক প্ৰভাৱ নোহোৱা হৈ নাযায়। অৰ্থাৎ প্ৰটিনযুক্ত বা ইলেক্ট্ৰ’লাইটযুক্ত বিয়েৰ মানেই স্বাস্থ্যকৰ বিয়েৰ নহয়।

বিশ্ব স্বাস্থ্য সংস্থাইও স্পষ্টভাৱে সকীয়াই আহিছে যে এলকহল সেৱনৰ কোনো সম্পূৰ্ণ বিপদমুক্ত মাত্ৰা নাই। সেয়ে স্বাস্থ্য আৰু ফিটনেছৰ নামত নতুন ধৰণৰ বিয়েৰ বজাৰত আহিলেও গ্ৰাহকে ‘স্বাস্থ্যকৰ’ বুলি ধৰি লৈ অধিক পৰিমাণে সেৱন কৰাটো উচিত নহয়। স্বাস্থ্যৰ বাবে আটাইতকৈ গুৰুত্বপূৰ্ণ কথাটো হ’ল—পানীয়ত প্ৰটিন বা ইলেক্ট্ৰ’লাইট আছে নে নাই, তাৰ লগতে তাত এলকহল আছে নে নাই আৰু ইয়াৰ সামগ্ৰিক প্ৰভাৱ কি, সেই কথাও বিবেচনা কৰা।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ