ধুবুৰী জিলাৰ ছাগলীয়া অঞ্চলত মানৱ সমাজক লজ্জানত কৰা এক গুৰুতৰ ঘটনা পোহৰলৈ আহিছে। এগৰাকী কিশোৰীক দলবদ্ধ ধ*ৰ্ষণ কৰাৰ লগতে সমগ্ৰ ঘটনাটো মোবাইল ফোনত ভিডিঅ’ কৰি পিছত সেই ভিডিঅ’ ভাইৰেল কৰাৰ অভিযোগ উত্থাপিত হৈছে। ঘটনাটোক কেন্দ্ৰ কৰি অঞ্চলটোত তীব্ৰ প্ৰতিক্ৰিয়াৰ সৃষ্টি হৈছে।
অভিযোগ অনুসৰি, বিশ্বজিৎ ৰায়, দ্বীপ ৰায় আৰু শিৱা ৰায় নামৰ তিনিজন যুৱকে কিশোৰীগৰাকীৰ সৈতে এই কাণ্ড সংঘটিত কৰে। কেৱল সেয়াই নহয়, তিনিওজনে ঘটনাটোৰ ভিডিঅ’ প্ৰস্তুত কৰি বিভিন্নজনৰ মোবাইল ফোনলৈ প্ৰেৰণ কৰাৰ অভিযোগো উত্থাপিত হৈছে।
ঘটনাৰ পিছত গৌৰীপুৰৰ অলয় কুমাৰ ৰায় নামৰ এজন লোকলৈও উক্ত ভিডিঅ’ প্ৰেৰণ কৰাৰ অভিযোগ উঠিছে। পৰৱৰ্তী সময়ত অলয় কুমাৰ ৰায়ে ভিডিঅ’টো আন লোকৰ মাজত মোবাইলে মোবাইলে প্ৰচাৰ কৰাৰ অভিযোগ উত্থাপিত হৈছে। আনহাতে, এই ভিডিঅ’টোক অ*স্ত্ৰ হিচাপে ব্যৱহাৰ কৰি অলয়ে কিশোৰীগৰাকীক ব্লেকমেইল কৰাৰো অভিযোগ উত্থাপন হৈছে। ঘটনাটোৱে কিশোৰীগৰাকীক মানসিকভাৱে যথেষ্ট সমস্যাৰ সন্মুখীন কৰোৱাৰ অভিযোগো প্ৰকাশ পাইছে।
অৱশেষত ভুক্তভোগী কিশোৰীগৰাকীয়ে সমগ্ৰ ঘটনা সন্দৰ্ভত ছাগলীয়া আৰক্ষী চকীত এজাহাৰ দাখিল কৰে। এজাহাৰৰ ভিত্তিত আৰক্ষীয়ে তদন্ত আৰম্ভ কৰে আৰু কিশোৰীগৰাকীৰ অভিযোগৰ ভিত্তিত POCSO আইনৰ অধীনত গোচৰ ৰুজু কৰে। আৰক্ষীয়ে তদন্ত চলাই অভিযুক্ত অলয় কুমাৰ ৰায়ক গ্ৰেপ্তাৰ কৰে। গ্ৰেপ্তাৰৰ পিছত আদালতত হাজিৰ কৰোৱাৰ পাছত তেওঁক জে’ল হাজোতলৈ প্ৰেৰণ কৰা হৈছে।
ইফালে, ঘটনাটোৰ মূল অভিযুক্ত হিচাপে অভিযোগ উঠা বিশ্বজিৎ ৰায়, দ্বীপ ৰায় আৰু শিৱা ৰায় বৰ্তমানেও পলাতক হৈ আছে বুলি জানিব পৰা গৈছে। তেওঁলোকক গ্ৰেপ্তাৰৰ বাবে আৰক্ষীয়ে অভিযান অব্যাহত ৰাখিছে। ঘটনাটোৰ তদন্তৰ জৰিয়তে দলবদ্ধ ধ*ৰ্ষণৰ অভিযোগ, ভিডিঅ’ প্ৰস্তুত আৰু প্ৰচাৰ কৰাৰ অভিযোগ তথা কিশোৰীগৰাকীক ব্লেকমেইল কৰাৰ অভিযোগৰ সত্যতা নিৰ্ণয় কৰাৰ চেষ্টা চলাইছে আৰক্ষীয়ে।
এই ঘটনাৰ খবৰ পোহৰলৈ অহাৰ পিছতে বিভিন্ন দল-সংগঠনে তীব্ৰ প্ৰতিক্ৰিয়া প্ৰকাশ কৰিছে। অভিযুক্তসকলক শীঘ্ৰে গ্ৰেপ্তাৰ কৰি কঠোৰ শাস্তি প্ৰদান কৰাৰ দাবীত প্ৰতিবাদ আৰম্ভ কৰিছে বিভিন্ন সংগঠনে। ঘটনাটোৱে পুনৰবাৰ কিশোৰী আৰু মহিলাৰ সুৰক্ষা, ছ’চিয়েল মিডিয়াত যৌ*ন নিৰ্যাতনৰ ভিডিঅ’ প্ৰচাৰ আৰু ব্লেকমেইলৰ দৰে গুৰুতৰ অপৰাধৰ বিৰুদ্ধে কঠোৰ ব্যৱস্থাৰ প্ৰয়োজনীয়তা উত্থাপন কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
