বহু বছৰ ধৰি ধূমপান কৰি অহা লোকৰ মনত এটা প্ৰশ্ন প্ৰায়ে উদয় হয়—ধূমপান এৰি দিলে ক্ষতিগ্ৰস্ত হাওঁফাওঁ পুনৰ সুস্থ হ’ব পাৰেনে? একেদৰে, দীৰ্ঘদিন ধৰি প্ৰদূষিত পৰিৱেশত বাস কৰা লোকসকলেও হাওঁফাওঁৰ স্বাস্থ্যক লৈ চিন্তিত হোৱা স্বাভাৱিক। ভাৰতত হাওঁফাওঁৰ কৰ্কট ৰোগৰ লগতে বিভিন্ন শ্বাস-প্ৰশ্বাসজনিত সমস্যাৰ সংখ্যাও বৃদ্ধি পাইছে। কেৱল ধূমপায়ীসকলেই নহয়, ধূমপান নকৰা লোকসকলো বায়ু প্ৰদূষণৰ বাবে হাওঁফাওঁৰ বিভিন্ন সমস্যাৰ সন্মুখীন হৈছে। বিশেষকৈ উত্তৰ ভাৰতকে ধৰি দেশৰ বহু অঞ্চলত বায়ু প্ৰদূষণৰ মাত্ৰা অধিক হোৱাৰ ফলত শ্বাস-প্ৰশ্বাসজনিত ৰোগৰ আশংকা বৃদ্ধি পাইছে। এই পৰিস্থিতিত প্ৰশ্নটো হ’ল—ধূমপান আৰু বায়ু প্ৰদূষণৰ ফলত ক্ষতিগ্ৰস্ত হোৱা হাওঁফাওঁ পুনৰ আগৰ অৱস্থালৈ ঘূৰি আহিব পাৰেনে?
ডাঃ সুশীল কুমাৰ উপাধ্যায়, পৰামৰ্শদাতা, পালমোনাৰী এণ্ড শ্লিপ মেডিচিন, কৈলাস দীপক হাস্পতালৰ মতে, ইয়াৰ উত্তৰ কিছু পৰিমাণে আশাব্যঞ্জক। তেওঁ কয় যে ধূমপান সম্পূৰ্ণৰূপে এৰি দিয়াৰ পিছত হাওঁফাওঁৰ কাৰ্যক্ষমতা কিছু পৰিমাণে উন্নত হ’ব পাৰে। অৱশ্যে কিমানখিনি উন্নতি হ’ব সেয়া ব্যক্তিজনৰ হাওঁফাওঁ কিমান পৰিমাণে ক্ষতিগ্ৰস্ত হৈছে তাৰ ওপৰত নিৰ্ভৰ কৰে।
ধূমপানৰ ফলত হাওঁফাওঁ আৰু বায়ুপথৰ ওপৰত দীৰ্ঘম্যাদী ক্ষতিকাৰক প্ৰভাৱ পৰে। কিন্তু ধূমপান বন্ধ কৰাৰ পিছত শৰীৰে লাহে লাহে নিজৰ পুনৰুদ্ধাৰ প্ৰক্ৰিয়া আৰম্ভ কৰে। হাওঁফাওঁৰ স্বাস্থ্য উন্নত কৰাৰ ক্ষেত্ৰত আটাইতকৈ গুৰুত্বপূৰ্ণ পদক্ষেপটো হ’ল ধূমপান সম্পূৰ্ণৰূপে এৰি দিয়া। চিগাৰেটৰ ধোঁৱাই বায়ুপথৰ ক্ষতি কৰাৰ লগতে হাওঁফাওঁৰ পৰা শ্লেষ্মা আৰু অন্যান্য ক্ষতিকাৰক পদাৰ্থ বাহিৰ কৰি দিয়াৰ স্বাভাৱিক ক্ষমতাতো বাধা দিয়ে। ধূমপান এৰি দিয়াৰ পিছত এই প্ৰক্ৰিয়া লাহে লাহে উন্নত হ’বলৈ ধৰে। ফলত সময়ৰ লগে লগে কাহ, শ্লেষ্মা জমা হোৱা আৰু উশাহ-নিশাহত হোৱা অসুবিধাৰ দৰে কিছু লক্ষণ কমিব পাৰে।
ধূমপানৰ লগতে বায়ু প্ৰদূষণো হাওঁফাওঁৰ বাবে যথেষ্ট ক্ষতিকাৰক। সেয়ে প্ৰদূষণৰ মাত্ৰা অত্যধিক হ’লে যিমান পাৰি তেনে পৰিৱেশৰ পৰা আঁতৰি থকাটো উচিত। বায়ুৰ গুণাগুণ অতি বেয়া হৈ থকা সময়ত বাহিৰত ব্যায়াম বা অধিক সময় কটোৱাৰ পৰা বিৰত থাকিব লাগে। বাহিৰলৈ ওলাবলগীয়া হ’লে পৰিস্থিতি অনুসৰি ভাল মানৰ মাস্ক ব্যৱহাৰ কৰাটোও উপকাৰী হ’ব পাৰে।
হাওঁফাওঁৰ স্বাস্থ্য আৰু সামগ্ৰিক শাৰীৰিক সক্ষমতা বজাই ৰাখিবলৈ নিয়মিত শাৰীৰিক ব্যায়াম গুৰুত্বপূৰ্ণ। নিয়মিত ব্যায়ামে শাৰীৰিক ফিটনেছ উন্নত কৰাৰ লগতে শ্বাস-প্ৰশ্বাসৰ ক্ষমতা বজাই ৰখাত সহায় কৰিব পাৰে। অৱশ্যে কোনো ব্যক্তিৰ হাওঁফাওঁত ইতিমধ্যে স্থায়ী ক্ষতি থাকিলে সেই ক্ষতি সম্পূৰ্ণৰূপে আগৰ অৱস্থালৈ ঘূৰাই নিয়া সদায় সম্ভৱ নহয়। সেয়ে আৰম্ভণিৰ পৰাই ধূমপান আৰু অত্যধিক প্ৰদূষণৰ পৰা নিজকে সুৰক্ষিত ৰখাটো অত্যন্ত গুৰুত্বপূৰ্ণ।
এই লক্ষণসমূহ দেখা দিলে চিকিৎসকৰ পৰামৰ্শ লওক
যদি দীৰ্ঘদিন ধৰি কাহ হৈ থাকে, সঘনাই উশাহ-নিশাহত অসুবিধা হয়, বুকুত অস্বস্তি অনুভৱ হয় বা বাৰে বাৰে শ্বাস-প্ৰশ্বাসজনিত সমস্যাত ভুগিবলগীয়া হয়, তেন্তে ইয়াক সাধাৰণ সমস্যা বুলি অৱহেলা কৰা উচিত নহয়। এনে লক্ষণ দেখা দিলে চিকিৎসকৰ পৰামৰ্শ লৈ প্ৰয়োজনীয় পৰীক্ষা কৰোৱাটো জৰুৰী। বিশেষকৈ বহু বছৰ ধৰি ধূমপান কৰা লোকসকলে হাওঁফাওঁৰ স্বাস্থ্যৰ প্ৰতি অধিক সতৰ্ক হোৱা উচিত। ধূমপান যিমান সোনকালে সম্ভৱ সম্পূৰ্ণৰূপে এৰি দিয়া আৰু বায়ু প্ৰদূষণৰ সংস্পৰ্শ কমোৱাই হাওঁফাওঁৰ স্বাস্থ্য সুৰক্ষিত ৰখাৰ অন্যতম গুৰুত্বপূৰ্ণ উপায়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
