এইবাৰ শীতত সলনি হ’ব নেকি সমগ্ৰ বিশ্বৰ জলবায়ু?

প্ৰশান্ত মহাসাগৰত সাগৰৰ পানীৰ উষ্ণতা স্বাভাৱিকতকৈ অধিক বৃদ্ধি পোৱাৰ ফলত সৃষ্টি হোৱা এল নিন’ (El Niño) পৰিঘটনা এইবাৰ অধিক শক্তিশালী ৰূপ লোৱাৰ আশংকা দেখা গৈছে। কল’ম্বিয়া বিশ্ববিদ্যালয়ৰ International Research Institute for Climate and Society (IRI)-ৰ শেহতীয়া পূৰ্বানুমান অনুসৰি, ২০২৬-২৭ চনৰ শীতকালত এল নিন’ অতি শক্তিশালী ৰূপত উপনীত হ’ব পাৰে।

IRIৰ ২১ ছেপ্টেম্বৰত প্ৰকাশিত ENSO পূৰ্বানুমান অনুসৰি, ছেপ্টেম্বৰৰ মাজভাগত এল নিন’ নিৰ্ণয়ৰ অন্যতম গুৰুত্বপূৰ্ণ Niño 3.4 সূচক +৩.০ ডিগ্ৰী চেলছিয়াছ পৰ্যন্ত বৃদ্ধি পাইছে। ১৩টা Dynamic Model আৰু ৯টা Statistical Modelসহ মুঠ ২২টা মডেলৰ বিশ্লেষণতো ২০২৬-২৭ৰ শীতকালত শক্তিশালী এল নিন’ হোৱাৰ সম্ভাৱনা প্ৰকাশ পাইছে।

পূৰ্বানুমান অনুসৰি, ২০২৭ চনৰ ফেব্ৰুৱাৰী পৰ্যন্ত এল নিন’ চলি থকাৰ আশংকা ১০০ শতাংশ বুলি IRI-এ উল্লেখ কৰিছে। অৱশ্যে ২০২৭ চনৰ মাজভাগলৈ এই সম্ভাৱনা প্ৰায় ৬১ শতাংশলৈ হ্ৰাস পাব পাৰে। প্ৰতিষ্ঠানটোৰ মতে, এই এল নিন’ পৰিঘটনা এতিয়ালৈ দেখা পোৱা শক্তিশালী এল নিন’সমূহৰ ভিতৰত অন্যতম হোৱাৰ সম্ভাৱনা আছে।

এল নিন’ মানে কি?

সহজ ভাষাত ক’বলৈ গ’লে, এল নিন’ হৈছে প্ৰশান্ত মহাসাগৰৰ নিৰ্দিষ্ট অংশত সাগৰৰ পানী স্বাভাৱিকতকৈ অধিক উষ্ণ হৈ উঠা এক প্ৰাকৃতিক জলবায়ু পৰিঘটনা। ইয়াৰ প্ৰভাৱ কেৱল প্ৰশান্ত মহাসাগৰৰ অঞ্চলতে সীমাবদ্ধ নাথাকে। পৃথিৱীৰ বিভিন্ন দেশৰ বৰষুণ, উষ্ণতা, খৰাং আৰু অতিবৃষ্টিৰ ওপৰতো ইয়াৰ প্ৰভাৱ পৰিব পাৰে।

ভাৰতৰ বাবে কিয় গুৰুত্বপূৰ্ণ?
ভাৰতৰ ক্ষেত্ৰত এল নিন’ক লৈ মূল চিন্তা হৈছে বৰষুণ আৰু কৃষি। অতীতৰ বহু শক্তিশালী এল নিন’ পৰিঘটনাৰ সৈতে ভাৰতত দুৰ্বল মৌচুমী বতাহ আৰু কম বৰষুণৰ সম্পৰ্ক দেখা গৈছে। বৰষুণ কমিলে খৰিফ শস্যৰ উৎপাদন, জলাশয়ৰ পানী আৰু জলসিঞ্চনৰ ওপৰত চাপ বৃদ্ধি পাব পাৰে।

অৱশ্যে কেৱল এল নিন’ৰ ওপৰত ভিত্তি কৰি ভাৰতৰ পৰৱৰ্তী মৌচুমী বৰষুণ বা কৃষি উৎপাদনৰ সঠিক পূৰ্বানুমান কৰিব নোৱাৰি। Indian Ocean Dipole (IOD), সাগৰৰ পৃষ্ঠৰ উষ্ণতা, বায়ুমণ্ডলীয় পৰিসঞ্চালন আৰু অন্যান্য জলবায়ুগত কাৰকেও ভাৰতৰ বতৰৰ ওপৰত যথেষ্ট প্ৰভাৱ পেলায়।

এইবাৰ Indian Ocean Dipole বা IOD-ও গুৰুত্বপূৰ্ণ হৈ পৰিছে। IRI-ৰ পূৰ্বানুমান অনুসৰি, ছেপ্টেম্বৰৰ পৰা ডিচেম্বৰ ২০২৬লৈ IOD ইতিবাচক অৱস্থাত থাকিব পাৰে। ইতিবাচক IOD-এ কেতিয়াবা এল নিন’ৰ ফলত ভাৰতীয় মৌচুমীৰ ওপৰত পৰা নেতিবাচক প্ৰভাৱ কিছু পৰিমাণে হ্ৰাস কৰিব পাৰে। কিন্তু ইয়াৰ প্ৰভাৱ সকলো অঞ্চলতে একে নহয়। সেয়েহে বৰ্তমানৰ পূৰ্বানুমানক ভাৰতত নিশ্চিতভাৱে কম বৰষুণ বা কৃষিৰ ক্ষতি হ’ব বুলি ধৰা উচিত নহয়। কিন্তু ২০২৬-২৭ চনত বিশ্বৰ লগতে ভাৰততো জলবায়ুগত অস্বাভাৱিক পৰিস্থিতিৰ আশংকা বৃদ্ধি পোৱাৰ এক গুৰুত্বপূৰ্ণ সংকেত হিচাপে এই এল নিন’ৰ পূৰ্বানুমানক দেখা হৈছে।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ