কৰ্মচাৰীৰ প্ৰতি এগৰাকী মালিকনীৰ মৰম আৰু উদাৰতাৰ এক সুন্দৰ উদাহৰণ পোহৰলৈ আহিছে। শীতৰ প্ৰচণ্ড ঠাণ্ডাত ইলেক্ট্ৰিক স্কুটাৰেৰে কৰ্মস্থলীলৈ অহা-যোৱা কৰি কষ্ট কৰা কৰ্মচাৰীসকলৰ কথা চিন্তা কৰি নিজৰ প্ৰতিষ্ঠানৰ শীৰ্ষ প্ৰদৰ্শনকাৰী কৰ্মচাৰীক নতুন বাহন উপহাৰ দিছে। বাহনো পিছে এলা-পেচা নহয়, উপহাৰ দিছে একেবাৰে নতুন BMW বিলাসী বাহন। এই ব্যতিক্ৰমী উপহাৰৰ বাবে ছ’চিয়েল মিডিয়াত ব্যাপক প্ৰশংসা লাভ কৰিছে চীনৰ হেনান প্ৰদেশৰ বিফ হটপট ৰেষ্টুৰেণ্ট চেইনৰ স্বত্বাধিকাৰী মা য়ানলীয়ে।
ছাউথ চাইনা মৰ্নিং পোষ্ট (SCMP)-ৰ প্ৰতিবেদন অনুসৰি, যোৱা ২৪ ছেপ্টেম্বৰত কৰ্মচাৰীসকলক এই বিশেষ উপহাৰ প্ৰদান কৰা হয়। উপহাৰ দিয়া প্ৰতিখন BMW গাড়ীৰ মূল্য আছিল প্ৰায় ৩ লাখ চীনা ইউয়ান, যিটো ভাৰতীয় মুদ্ৰাত প্ৰায় ৪৩ লাখ টকাৰ সমান। আটাইতকৈ উল্লেখযোগ্য কথাটো হ’ল, মা য়ানলীয়ে নিজৰ ধনেৰে গাড়ীকেইখন ক্ৰয় কৰি কোনো চৰ্ত, বণ্ড বা চুক্তি নোহোৱাকৈ পোনপটীয়াকৈ কৰ্মচাৰীসকলৰ নামত পঞ্জীয়ন কৰি দিছিল।
মা য়ানলীয়ে কৰ্মচাৰীসকলক BMW গাড়ী উপহাৰ দিয়াৰ চিন্তাটো কৰিছিল যোৱা শীতকালত। বিগত আঠ বছৰ ধৰি ৰেষ্টুৰেণ্টখনত কাম কৰি অহা লি জি নামৰ এগৰাকী কৰ্মচাৰীয়ে প্ৰতিদিনে পুৱা ইলেক্ট্ৰিক স্কুটাৰেৰে কৰ্মস্থলীলৈ অহা-যোৱা কৰিছিল। এদিন পুৱাই প্ৰচণ্ড ঠাণ্ডাৰ মাজেৰে স্কুটাৰ চলাই ৰেষ্টুৰেণ্টত উপস্থিত হৈছিল লি জি। বৰফৰ দৰে ঠাণ্ডা বতাহৰ বাবে তেওঁৰ মুখখন ৰঙা পৰি গৈছিল, কাণ দুখন নীলা হৈ পৰিছিল আৰু হাত দুখন ঠাণ্ডাত অজ্ঞান হোৱাৰ দৰে হৈছিল।
কৰ্মচাৰীৰ এনে অৱস্থা দেখি মা য়ানলীৰ মনত গভীৰ প্ৰভাৱ পৰে। দীৰ্ঘদিন ধৰি নিষ্ঠাৰে কাম কৰি অহা কৰ্মচাৰীসকলে প্ৰতিদিনে এনে কষ্টৰ মাজেৰে কৰ্মস্থলীলৈ আহিবলগীয়া হোৱাটো তেওঁ অনুভৱ কৰে। তাৰ পিছতেই কৰ্মচাৰীসকলৰ যাতায়াতৰ কষ্ট কমোৱাৰ লগতে তেওঁলোকৰ প্ৰতি কৃতজ্ঞতা প্ৰকাশ কৰিবলৈ গাড়ী উপহাৰ দিয়াৰ পৰিকল্পনা কৰে।
এই উপহাৰ লাভ কৰি স্বাভাৱিকতেই আনন্দত আত্মহাৰা হৈ পৰে কৰ্মচাৰী লি জি। তেওঁ কয় যে ইমান ডাঙৰ উপহাৰ লাভ কৰিব বুলি তেওঁ কেতিয়াও সপোনতো ভবা নাছিল। লি জিৰ ভাষ্য অনুসৰি, স্বত্বাধিকাৰীয়ে তেওঁক গাড়ী দিব বুলি আগতীয়াকৈ একো কোৱা নাছিল। বৰঞ্চ তেওঁক কেৱল এটা ‘ডাঙৰ খেলনা’ উপহাৰ দিয়াৰ কথা কৈ শ্ব’ৰুমলৈ লৈ গৈছিল। কিন্তু শ্ব’ৰুমত উপস্থিত হোৱাৰ পিছতহে লি জিয়ে প্ৰকৃত আচৰিত উপহাৰটোৰ বিষয়ে জানিব পাৰে। তাত তেওঁৰ নামত এখন ধুনীয়া বগা ৰঙৰ বিএমডব্লিউ গাড়ী পঞ্জীয়ন কৰা হৈছিল। গাড়ীখন লাভ কৰিবলৈ তেওঁ এটকাও খৰচ কৰিবলগীয়া নহ’ল।
লি জিৰ উপৰি আন এগৰাকী মহিলা কৰ্মচাৰী লিউ ইংইঙেও এখন ধূসৰ ৰঙৰ বিএমডব্লিউ গাড়ী উপহাৰ হিচাপে লাভ কৰে। লিউৱে কয় যে তেওঁৰ মালিকে তেওঁৰ কামৰ প্ৰতি থকা নিষ্ঠা আৰু উন্নত প্ৰদৰ্শনৰ কথা স্বীকাৰ কৰি গাড়ীখন উপহাৰ দিছিল। মালিকৰ মতে, তেওঁ এই উপহাৰৰ সম্পূৰ্ণ যোগ্য।
মা য়ানলীয়ে কেৱল গাড়ী উপহাৰ দিয়াৰ ক্ষেত্ৰতেই নহয়, কৰ্মচাৰীসকলৰ সামগ্ৰিক কল্যাণৰ ক্ষেত্ৰতো বিশেষ গুৰুত্ব দিয়ে। প্ৰায় ২০ বছৰ ধৰি কেটাৰিং উদ্যোগৰ সৈতে জড়িত হৈ থকা তেওঁ চীনৰ পৰম্পৰাগত উৎসৱসমূহৰ সময়তো কৰ্মচাৰীসকলক দৈনন্দিন প্ৰয়োজনীয় সামগ্ৰী আৰু নগদ ধন উপহাৰ হিচাপে প্ৰদান কৰে।
চীনত কৰ্মচাৰীৰ প্ৰতি উদাৰ মনোভাৱৰ বাবে চৰ্চিত আন এজন ব্যৱসায়ী হৈছে হেনান কুৱাংছান ক্ৰেন কোম্পানীৰ অধ্যক্ষ কুই পেইজুন। প্ৰতিবেদন অনুসৰি, যোৱা বসন্ত উৎসৱৰ পূৰ্বে তেওঁ নিজৰ কোম্পানীৰ কৰ্মচাৰীসকলক ১৮ কোটি ইউয়ানৰ বোনাছ বিতৰণ কৰিছিল। ভাৰতীয় মুদ্ৰাত এই ধনৰ পৰিমাণ প্ৰায় ২১২ কোটি টকা। এই বোনাছৰ পৰিমাণ কোম্পানীটোৰ আগৰ বছৰৰ মুঠ লাভৰ প্ৰায় দুই-তৃতীয়াংশ আছিল বুলি জানিব পৰা গৈছে। ইয়াৰ উপৰি, মহিলা দিৱসত কোম্পানীটোৰ প্ৰতিগৰাকী মহিলা কৰ্মচাৰীক ৮০০ ইউয়ানকৈ প্ৰদান কৰা হয়। আনহাতে, গ্ৰাম্য শ্ৰমিকসকলক শস্য চপোৱাৰ সময়ত সহায়ৰ বাবে বছৰি ১,০০০ ইউয়ানকৈ দিয়া হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
