‘মই মুছলমান, কিন্তু নামাজ নপঢ়ো’ কিয় ক’লে বিশিষ্ট অভিনেত্ৰী শ্বাবানা আজমীয়ে?

বলিউডৰ জ্যেষ্ঠ অভিনেত্ৰী শ্বাবানা আজমীয়ে ধৰ্ম, ব্যক্তিগত স্বাধীনতা আৰু উমৈহতীয়া দেৱানী বিধি (Common Civil Code) সন্দৰ্ভত কৰা মন্তব্যই শেহতীয়াকৈ চৰ্চা লাভ কৰিছে। অভিনেত্ৰীগৰাকীয়ে নিজকে মুছলমান বুলি পৰিচয় দিয়াৰ লগতে ঈদ, গাৰাৰা পোছাক, উৰ্দু ভাষা আৰু খাদ্যৰ প্ৰতি থকা ভালপোৱাৰ কথা উল্লেখ কৰিছে। অৱশ্যে, তেওঁলোকে নিয়মীয়াকৈ নামাজ নপঢ়ে বুলিও স্পষ্ট কৰে। শেহতীয়াকৈ IIMUN (India International Movement to Unite Nations)-ৰ ইউটিউব চেনেলত হোৱা এক সাক্ষাৎকাৰত শ্বাবানা আজমীয়ে এই মন্তব্য কৰে।

ধৰ্মৰ পৰা শান্তি পালে আপত্তি কিয়?

শ্বাবানা আজমীয়ে জনোৱা অনুসৰি, তেওঁৰ পিতৃ নাস্তিক আছিল, আনহাতে মাতৃয়ে কিছুমান ধৰ্মীয় পৰম্পৰা পালন কৰিছিল। তেওঁ কয় যে ‘মাশ্বাআল্লাহ’ আৰু ‘ইনশ্বাআল্লাহ’ৰ দৰে শব্দ তেওঁৰ বাবে ভাষা আৰু সংস্কৃতিৰ অংশ। তেওঁৰ স্বামী তথা প্ৰখ্যাত লেখক জাভেদ আখতাৰ এগৰাকী কঠোৰ নাস্তিক। শ্বাবানাৰ মতে, কোনো ব্যক্তিয়ে ধৰ্ম পালন কৰি মানসিক শান্তি লাভ কৰিলে তেওঁক বাধা দিয়াৰ প্ৰয়োজন নাই। একেদৰে, ধৰ্মত বিশ্বাস নকৰা লোকসকলৰ মতামত আৰু অনুভূতিকো সন্মান জনোৱা উচিত। অভিনেত্ৰীগৰাকীয়ে কয় যে ধৰ্ম আৰু ঈশ্বৰৰ প্ৰতি বিশ্বাস ব্যক্তিগত বিষয়। সেয়ে, চৰকাৰে কোনো ব্যক্তিৰ ব্যক্তিগত ধৰ্মীয় বিশ্বাসত হস্তক্ষেপ কৰিব নালাগে।

UCC নহয় ‘কমন চিভিল কোড’ৰহে পোষকতা

সাক্ষাৎকাৰত শ্বাবানা আজমীয়ে দেশত ‘ইউনিফৰ্ম চিভিল কোড’ৰ পৰিৱৰ্তে ‘কমন চিভিল কোড’ প্ৰৱৰ্তনৰ পোষকতা কৰে। তেওঁৰ মতে, এনে আইন প্ৰস্তুত কৰাৰ মূল লক্ষ্য হ’ব লাগে মহিলাৰ সমতা আৰু ন্যায় নিশ্চিত কৰা। তেওঁৰ পৰামৰ্শ অনুসৰি, বিভিন্ন ধৰ্মৰ ন্যায়সংগত বিধানসমূহ বিবেচনা কৰি এখন খচৰা প্ৰস্তুত কৰিব লাগে। তাৰ পাছত খচৰাখন ৰাজহুৱা আলোচনাৰ বাবে মুকলি কৰি বিভিন্ন পক্ষৰ মতামত গ্ৰহণ কৰি আইন প্ৰণয়ন কৰিব লাগে।

ব্যক্তিগত আইনত মহিলাৰ অধিকাৰৰ ওপৰত গুৰুত্ব

শ্বাবানাই কয় যে বিভিন্ন ধৰ্মৰ ব্যক্তিগত আইনত বিৱাহ, ভৰণ-পোষণ আৰু উত্তৰাধিকাৰৰ দৰে বিষয়ত মহিলাৰ সৈতে বৈষম্য হোৱাৰ উদাহৰণ আছে। ধৰ্মীয় পৰম্পৰাৰ নামত মহিলাৰ প্ৰতি অন্যায় কৰা আইনসমূহ ৰক্ষা কৰা উচিত নহয় বুলিও তেওঁ মত প্ৰকাশ কৰে। তেওঁৰ মতে, দেশ বিভাজনৰ সময়ত মুছলমান সম্প্ৰদায়ৰ মাজত নিৰাপত্তাহীনতাৰ অনুভূতি আছিল। সেই সময়ত ব্যক্তিগত আইন সম্পৰ্কে স্বাধীনতা দিয়া হৈছিল। আশা কৰা হৈছিল যে সময়ৰ লগে লগে সম্প্ৰদায়ৰ ভিতৰত আস্থা বৃদ্ধি পাব আৰু প্ৰয়োজনীয় সংস্কাৰৰ দাবী উঠিব। কিন্তু তেওঁৰ মতে, সেই প্ৰক্ৰিয়া সম্পূৰ্ণৰূপে আগবাঢ়িব পৰা নাই।

শ্বাবানা আজমীৰ বক্তব্যৰ মূল কথা হৈছে—ধৰ্মীয় স্বাধীনতাক সন্মান জনোৱাৰ লগতে সকলোৰে বাবে সমতা আৰু ন্যায় নিশ্চিত কৰাটোও সমানেই গুৰুত্বপূৰ্ণ।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ