জুবিন গাৰ্গৰ ন্যায়ৰ দাবীত কঁপিব গুৱাহাটী! হিয়াৰ আমঠু জুবিন গাৰ্গৰ ন্যায়ৰ দাবীত পুনৰ একত্ৰিত হ’বলৈ সাজু হৈছে অনুৰাগীসকল। ৩০ অক্টোবৰত চচলত বৃহৎ প্ৰতিবাদৰ আহ্বান গৰিমা শইকীয়া গাৰ্গৰ। সামাজিক মাধ্যমযোগে এই প্ৰতিবাদৰ কথা ঘোষণা কৰিছে গৰিমা শইকীয়া গাৰ্গে।
দিনৰ ১০ বজাৰ পৰা দুপৰীয়া ২ বজালৈ অনুষ্ঠিত হ’বলগীয়া এই প্ৰতিবাদী কাৰ্যসূচীত জুবিন গাৰ্গক অন্তৰৰ পৰা ভালপোৱা প্ৰতিগৰাকী লোককে অংশগ্ৰহণ কৰিবলৈ আহ্বান জনোৱা হৈছে।
সামাজিক মাধ্যমত গৰিমা গাৰ্গে লিখিছে- “প্ৰাণৰ শিল্পী জুবিন গাৰ্গৰ ন্যায়ৰ দাবীত পুনৰবাৰ শান্তিপূৰ্ণ প্ৰতিবাদ কাৰ্যসূচী :
অহা ৩০ অক্টোবৰ, ২০২৬ তাৰিখে প্ৰাণৰ শিল্পী জুবিন গাৰ্গৰ ন্যায়ৰ দাবীত পুনৰবাৰ গুৱাহাটীৰ চচলত এক শান্তিপূৰ্ণ প্ৰতিবাদ কাৰ্যসূচী ৰূপায়ণ কৰিবলৈ সিদ্ধান্ত গ্ৰহণ কৰা হৈছে জুবিন ফেন ক্লাবৰ উদ্যোগত । ইতিমধ্যে এই কাৰ্যসূচী অনুষ্ঠিত কৰাৰ বাবে প্ৰয়োজনীয় প্ৰশাসনিক অনুমতি বিচাৰি আবেদন জনোৱা হৈছে। উল্লেখ্য যে, যোৱা ১২ অক্টোবৰ, ২০২৬ তাৰিখে হঠাতে সিদ্ধান্ত গ্ৰহণ কৰি আয়োজন কৰা কাৰ্যসূচীত বহু লোকে অংশগ্ৰহণ কৰাৰ ইচ্ছা প্ৰকাশ কৰিছিল যদিও সময়ৰ অভাৱত বহুতে উপস্থিত থাকিব পৰা নাছিল। সেয়েহে, অহা ৩০ অক্টোবৰ, ২০২৬ তাৰিখে অনুষ্ঠিত হ’বলগীয়া এই প্ৰতিবাদী কাৰ্যসূচীত সকলো জুবিন অনুৰাগী তথা জুবিন গাৰ্গক অন্তৰৰ পৰা ভালপোৱা প্ৰতিগৰাকী ব্যক্তিৰ স্বতঃস্ফূৰ্ত অংশগ্ৰহণ আশা কৰা হৈছে। এয়া কেৱল এক প্ৰতিবাদ নহয়, এয়া প্ৰাণৰ শিল্পীগৰাকীৰ ন্যায়ৰ বাবে একত্ৰিত হৈ মাত মতাৰ প্ৰয়াস। এইয়া সকলোৰে ঐক্যবদ্ধভাৱে, শান্তিপূৰ্ণভাৱে আৰু সমস্বৰে উত্থাপন কৰা ন্যায়ৰ দাবী হওঁক । প্ৰাণৰ শিল্পী জুবিন গাৰ্গৰ ন্যায়ৰ দাবীত সকলোৰে কণ্ঠবোৰ সন্মিলিত হওক।”
প্ৰতিবাদত অংশগ্ৰহণ কৰিবলৈ আহ্বান জনোৱাৰ লগতে কাৰ্যসূচীটো শান্তিপূৰ্ণভাৱে পালন কৰি সমস্বৰে ন্যায়ৰ দাবী উত্থাপন কৰিবলৈও আহ্বান জনোৱা হৈছে। জুবিন ফেন ক্লাবৰ আহ্বানত আয়োজন কৰা এই প্ৰতিবাদী কাৰ্যসূচীক লৈ অনুৰাগীসকলৰ মাজত বিশেষ চৰ্চা আৰম্ভ হৈছে।
(এই তথ্য যুগুতাইছে বৰষা মিশ্ৰই)
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
