নিজৰ প্ৰেমৰ সম্পৰ্কত বাধা দিয়াৰ বাবেই পিতৃক হ*ত্যাৰ ষড়যন্ত্ৰ কৰাৰ অভিযোগ উত্থাপন হৈছে এগৰাকী নাবালিকা কন্যা আৰু তেওঁৰ ২১ বছৰীয়া প্ৰেমিকৰ বিৰুদ্ধে। এই ঘটনাৰ পিছতে আৰক্ষীয়ে দুয়োকে গ্ৰেপ্তাৰ কৰিছে। উত্তৰ প্ৰদেশৰ ইটাৱাত সংঘটিত হৈছে এই চাঞ্চল্যকৰ হ*ত্যাকাণ্ডৰ ঘটনা।
আৰক্ষীৰ তথ্য অনুসৰি, ২১ অক্টোবৰৰ নিশা ইটাৱাৰ চিভিল লাইনছ থানা এলেকাৰ কান্সীৰাম কলনীত এই হ*ত্যাকাণ্ড সংঘটিত হৈছিল। অভিযুক্তসকলে পিতৃ শ্যামসুন্দৰ কাথেৰিয়াৰ মৃ*তদেহ তিনিখন কম্বলেৰে মেৰিয়াই এটা ট্ৰাংকৰ ভিতৰত লুকুৱাই ৰখাৰ অভিযোগ উত্থাপন হৈছে। ঘৰৰ ভিতৰৰ পৰা দুৰ্গন্ধ ওলাবলৈ ধৰাৰ পিছতহে ঘটনাটো পোহৰলৈ আহে।
শ্যামসুন্দৰ কাথেৰিয়াই কান্সীৰাম কলনীত তেওঁৰ কনিষ্ঠ কন্যাৰ সৈতে বাস কৰিছিল। তেওঁৰ জ্যেষ্ঠ কন্যাৰ ইতিমধ্যে বিয়া হৈছিল আৰু তেওঁ যশৱন্তনগৰ অঞ্চলৰ ভেকনপুৰ গাঁৱত শহুৰেকৰ সৈতে বাস কৰিছিল। পৰিয়ালৰ সূত্ৰ অনুসৰি, দুই-তিনিদিন ধৰি পিতৃ আৰু ভগ্নীৰ সৈতে যোগাযোগ কৰিব নোৱাৰাত শ্যামসুন্দৰৰ জ্যেষ্ঠ কন্যাৰ সন্দেহ হয়। ইয়াৰ পিছতে তেওঁ শহুৰেকৰ সৈতে পিতৃৰ ঘৰলৈ আহে। ঘৰলৈ আহি তেওঁ পিতৃৰ মৃ*তদেহ এটা ট্ৰাংকৰ ভিতৰত লুকুৱাই থোৱা অৱস্থাত উদ্ধাৰ কৰে। আনহাতে, কনিষ্ঠ ভগ্নীৰ কোনো সন্ধান পোৱা নাছিল। এই ঘটনাৰ পিছতে আৰক্ষীক খবৰ দিয়া হয়। আৰক্ষীয়ে ঘটনাস্থলীত উপস্থিত হৈ তদন্ত আৰম্ভ কৰে।
আৰক্ষীৰ তদন্তত পোহৰলৈ অহা তথ্য অনুসৰি, অভিযুক্ত কন্যাৰ সৈতে বাকেৱাৰ থানা এলেকাৰ মতানতোলা আহেৰিপুৰৰ বাসিন্দা অভিলাষ সিং ওৰফে ছ’টুৰ প্ৰায় পাঁচ মাহ ধৰি প্ৰেমৰ সম্পৰ্ক আছিল। আৰক্ষীৰ দাবী অনুসৰি, শ্যামসুন্দৰে কন্যাৰ এই প্ৰেমৰ সম্পৰ্কৰ বিষয়ে জানিব পাৰি ইয়াৰ বিৰোধিতা কৰিছিল। ইয়াকে লৈ পিতৃ আৰু কন্যাৰ মাজত বিবাদৰ সৃষ্টি হৈছিল বুলি আৰক্ষীয়ে সন্দেহ কৰিছে। আৰক্ষীৰ অভিযোগ অনুসৰি, অভিযুক্ত কন্যাই প্ৰেমিকৰ সৈতে থাকিব বিচাৰিছিল। সেই উদ্দেশ্যে দুয়োজনে মিলি শ্যামসুন্দৰক হ*ত্যাৰ পৰিকল্পনা কৰিছিল বুলি তদন্তত প্ৰকাশ পাইছে।
আৰক্ষীৰ মতে, হ*ত্যাকাণ্ড সংঘটিত হোৱা নিশা শ্যামসুন্দৰক চাহত টোপনিৰ ঔষধ মিহলাই দিয়া হৈছিল। তেওঁ অচেতন হৈ পৰাৰ পিছত তেওঁক বিচনাত বান্ধি ৰখা হৈছিল বুলি অভিযোগ উঠিছে। ইয়াৰ পিছতে তেওঁৰ মূৰত ছুৰীৰে আঘাত কৰাৰ লগতে এটা গধুৰ শিলেৰে একাধিকবাৰ প্ৰহাৰ কৰা হৈছিল বুলি আৰক্ষীয়ে দাবী কৰিছে। এই আক্ৰমণৰ ফলতেই শ্যামসুন্দৰৰ মৃ*ত্যু হোৱা বুলি তদন্তকাৰী বিষয়াসকলে জনাইছে।
হ*ত্যাকাণ্ডৰ পিছত মৃতদেহটো তিনিখন কম্বলেৰে মেৰিয়াই এটা ট্ৰাংকৰ ভিতৰত ভৰাই লুকুৱাই ৰখা হৈছিল বুলি অভিযোগ উঠিছে। লগতে, মৃ*তকৰ মোবাইল ফোনটোও নলাত পেলাই দিয়া হৈছিল বুলি আৰক্ষীয়ে জানিবলৈ দিয়ে। প্ৰাথমিক তদন্তত মৃ*তদেহটো ফ্ৰীজত ৰাখিবলৈ চেষ্টা কৰা হৈছিল নেকি, সেই দিশটোও পৰীক্ষা কৰা হৈছে। অৱশ্যে এই সন্দৰ্ভত সকলো তথ্য এতিয়াও স্পষ্ট হোৱা নাই।
ঘটনাৰ পিছতে চিভিল লাইনছ আৰক্ষী থানাত গোচৰ ৰুজু কৰি তদন্ত আৰম্ভ কৰা হয়। ইটাৱাৰ জ্যেষ্ঠ আৰক্ষী অধীক্ষক ব্ৰিজেশ কুমাৰ শ্ৰীবাস্তৱৰ নিৰ্দেশত বিশেষ অভিযানকাৰী দল (এছ অ’ জি), চোৱাচিতা শাখা আৰু স্থানীয় আৰক্ষীয়ে তদন্ত অব্যাহত ৰাখে। তদন্তৰ সময়ত আৰক্ষীয়ে অভিযুক্ত নাবালিকাগৰাকীৰ প্ৰেমৰ সম্পৰ্কৰ বিষয়ে তথ্য লাভ কৰে। ইয়াৰ ভিত্তিত অভিযান চলাই আৰক্ষীয়ে অভিলাষ সিং আৰু নাবালিকাক গ্ৰেপ্তাৰ কৰা হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
