নিজৰ কন্যাৰ স্কুলত নামভৰ্তিৰ ক্ষেত্ৰতো প্ৰৱঞ্চনাৰ অভিযোগ ঘনকান্ত গগৈৰ বিৰুদ্ধে। ভুৱা চেক প্ৰদান কৰি স্কুল কৰ্তৃপক্ষক প্ৰৱঞ্চনা কৰাৰ অভিযোগ উত্থাপন হৈছে ঘনকান্তৰ বিৰুদ্ধে। কেৱল সেয়াই নহয়, স্কুলৰ মাহেকীয়া মাচুলৰো কেইবাটাও কিস্তি এতিয়াও আদায় দিবলৈ বাকী থকা বুলি জানিব পৰা গৈছে। শেহতীয়াকৈ কন্যাৰ স্কুল কৰ্তৃপক্ষই ঘনকান্তৰ এই কাৰ্যকলাপৰ বিষয়ে নতুন তথ্য পোহৰলৈ আনিছে। এই অভিযোগ আনিছে গুৱাহাটীৰ সৰুসজাইস্থিত Little Genius pre School চেণ্টাৰটোৱে।
নিজৰ কন্যাৰ শিক্ষাৰ ক্ষেত্ৰতো ঘনকান্ত গগৈয়ে প্ৰৱঞ্চনাৰ আশ্ৰয় লোৱাৰ অভিযোগে বিষয়টোক লৈ নতুনকৈ চৰ্চাৰ সৃষ্টি কৰিছে। অভিযোগ অনুসৰি, ভুৱা চেক প্ৰদান কৰি স্কুল কৰ্তৃপক্ষক বিপদত পেলাইছিল ঘনকান্তই। আনহাতে, স্কুলৰ মাহেকীয়া মাচুলৰ কেইবাটাও কিস্তি পৰিশোধ নকৰাকৈ থৈ যোৱাৰ কথাও পোহৰলৈ আহিছে। এই ঘটনাই ঘনকান্তৰ বিৰুদ্ধে উত্থাপিত প্ৰৱঞ্চনাৰ অভিযোগক পুনৰ চৰ্চালৈ আনিছে।
ইফালে, বিলাস ইন কাণ্ডৰ মূল অভিযুক্ত ঘনকান্ত গগৈক লৈ আৰক্ষীৰ তদন্ত অব্যাহত আছে। পল্টনবজাৰ থানাত জেৰাৰ অন্তত পুৱতি নিশা তেওঁক লতাশিল থানালৈ লৈ যোৱা হয়। তাৰ পিছতে লতাশিল থানাত ঘনকান্তক অতি সংগোপনে মাৰাথন জেৰা চলোৱা হৈছে। জানিব পৰা মতে, উচ্চপদস্থ আৰক্ষী বিষয়াৰ এটা দলে ঘনকান্তক বিভিন্ন দিশৰ পৰা জেৰা অব্যাহত ৰাখিছে। বিলাস ইন কাণ্ডৰ সৈতে জড়িত বিভিন্ন তথ্যৰ সত্যতা নিৰূপণৰ লগতে ঘটনাটোৰ আঁৰৰ সকলো দিশ পোহৰলৈ অনাৰ চেষ্টা চলাইছে আৰক্ষীয়ে। ঘনকান্ত গগৈৰ বিৰুদ্ধে এটাৰ পিছত আন এটা অভিযোগ পোহৰলৈ অহাৰ মাজতে আৰক্ষীৰ তদন্তই কোন দিশে গতি কৰে, সেয়া এতিয়া লক্ষণীয় হৈ পৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
