কংগ্ৰেছ নেত্ৰী ছোনিয়া গান্ধীৰ বিৰুদ্ধে উঠিছে এক গুৰুতৰ অভিযোগ! টিকট প্ৰদানৰ নামত ৭ কোটি টকা লোৱাৰ গুৰুতৰ অভিযোগ উঠিছে প্ৰিয়ংকা গান্ধীৰ বিৰুদ্ধে। দিল্লীৰ ১০ জনপথস্থিত প্ৰিয়ংকা গান্ধীৰ বাসগৃহৰ বাহিৰত এজন ব্যক্তিয়ে প্ৰতিবাদ সাব্যস্ত কৰাক লৈ ৰাজনৈতিক মহলত চৰ্চা চলিছে। গৌৰৱ কুমাৰ নামৰ ব্যক্তিজনে অভিযোগ কৰিছে যে তেওঁৰ পত্নীক লোকসভা নিৰ্বাচনত প্ৰতিদ্বন্দ্বিতা কৰাৰ বাবে দলীয় টিকট দিয়াৰ প্ৰতিশ্ৰুতি দি প্ৰিয়ংকা গান্ধী ৱাদ্ৰাক ৭ কোটি টকা দিয়া হৈছিল। কিন্তু টিকট লাভ নকৰাত তেওঁ সেই ধন ঘূৰাই বিচাৰিছে।
উল্লেখ্য যে, গৌৰৱ কুমাৰ হাৰিয়ানা মহিলা কংগ্ৰেছৰ প্ৰাক্তন সাধাৰণ সম্পাদিকা এগৰাকীৰ স্বামী। তেওঁৰ দাবী অনুসৰি, পত্নীক নিৰ্বাচনত প্ৰতিদ্বন্দ্বিতা কৰাৰ সুযোগ দিয়াৰ আশাত তেওঁ এই বৃহৎ পৰিমাণৰ ধন আদায় দিছিল। কিন্তু প্ৰতিশ্ৰুতি অনুসৰি টিকট নোপোৱাত তেওঁ ক্ষোভ প্ৰকাশ কৰে। প্ৰতিবাদৰ সময়ত গৌৰৱ কুমাৰে নিজকে জুই লগাই দিয়াৰ ভাবুকিও দিয়ে বুলি জানিব পৰা গৈছে। ঘটনাটোৰ পিছতে দিল্লী আৰক্ষী এই বিষয়টোৰ সৈতে জড়িত হয় আৰু অভিযোগ দাখিল কৰা হোৱা বুলি প্ৰতিবেদনত উল্লেখ কৰা হৈছে।
বিজেপিৰ কঠোৰ সমালোচনা
এই ঘটনাক কেন্দ্ৰ কৰি বিজেপিয়েও কংগ্ৰেছক লক্ষ্য কৰি সমালোচনা কৰিছে। বিজেপিৰ ৰাষ্ট্ৰীয় মুখপাত্ৰ প্ৰদীপ ভাণ্ডাৰীয়ে ২০২৬ চনৰ ৩ মাৰ্চত বিজেপিৰ মুখ্য কাৰ্যালয়ত অনুষ্ঠিত এখন সংবাদমেলত এই বিষয়টো উত্থাপন কৰিছিল। তেওঁ অভিযোগ কৰে যে কংগ্ৰেছত টিকট দিয়াৰ নামত ধনৰ লেনদেন হোৱা বুলি সন্দেহৰ সৃষ্টি হৈছে। প্ৰদীপ ভাণ্ডাৰীৰ দাবী অনুসৰি, কংগ্ৰেছৰ একাংশ জ্যেষ্ঠ নেতাৰ ব্যক্তিগত সহায়কৰ জৰিয়তে ধন আদান-প্ৰদান কৰা হৈছিল। ইয়াৰ সৈতে প্ৰিয়ংকা গান্ধী ৱাদ্ৰাৰ সৈতে সম্পৰ্ক থকা লোকো জড়িত আছিল বুলি তেওঁ অভিযোগ কৰে।
তেওঁ লগতে দাবী কৰে যে হোৱাটছএপৰ কথোপকথনে এই অভিযোগৰ প্ৰাথমিক প্ৰমাণ দাঙি ধৰিছে। তেওঁৰ মতে, হাৰিয়ানাৰ বাৱাল বিধানসভা সমষ্টিৰ টিকট দিয়াৰ নামতো ধন দাবী কৰাৰ অভিযোগ উত্থাপন হৈছে। এই সমগ্ৰ বিষয়টোত কংগ্ৰেছৰ জ্যেষ্ঠ নেতা কে চি বেণুগোপালক মধ্যস্থতাকাৰী হিচাপে ব্যৱহাৰ কৰা হৈছিল বুলিও বিজেপিৰ মুখপাত্ৰগৰাকীয়ে অভিযোগ কৰে।
হোৱাটছএপৰ কথোপকথনক লৈও চৰ্চা
প্ৰদীপ ভাণ্ডাৰীয়ে সংবাদমেলত দাবী কৰে যে গৌৰৱ কুমাৰে প্ৰিয়ংকা গান্ধী ৱাদ্ৰা, কে চি বেণুগোপাল আৰু কে সুৰেশৰ ব্যক্তিগত সহায়কৰ সৈতে হোৱা হোৱাটছএপৰ কথোপকথন ৰাজহুৱা কৰিছিল। এই কথোপকথনৰ জৰিয়তে টিকটৰ নামত ধন লোৱাৰ অভিযোগ পোহৰলৈ অহা বুলি তেওঁ মন্তব্য কৰে। ঘটনাটোৱে কংগ্ৰেছৰ দলীয় টিকট বিতৰণৰ স্বচ্ছতা আৰু ৰাজনৈতিক দলসমূহত ধনৰ লেনদেনৰ অভিযোগক লৈ নতুন বিতৰ্কৰ সৃষ্টি কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
