ৰাজ্যবাসীলৈ বেয়া খবৰ! পুনৰ অসমত বৃদ্ধি পাব বিদ্যুতৰ মাচুল। প্ৰতি ইউনিট বিদ্যুতৰ মূল্য ৫ পইচাকৈ বৃদ্ধি কৰাৰ কথা ঘোষণা কৰিছে মুখ্যমন্ত্ৰী হিমন্ত বিশ্ব শৰ্মাই। অৱশ্যে এই বৃদ্ধি স্থায়ী নহয়, মাত্ৰ ৩ মাহৰ বাবেহে কাৰ্যকৰী হ’ব বুলি স্পষ্ট কৰি দিছে মুখ্যমন্ত্ৰীগৰাকীয়ে।
ৰাজ্যত বিদ্যুতৰ মাচুল বৃদ্ধিক লৈ এতিয়া চৰ্চা আৰম্ভ হৈছে। পেট্ৰ’ল আৰু ডিজেলৰ বৰ্ধিত মূল্যৰ প্ৰভাৱৰ বাবেই বিদ্যুতৰ মাচুল সাময়িকভাৱে বৃদ্ধি কৰাৰ সিদ্ধান্ত গ্ৰহণ কৰা হৈছে বুলি জানিবলৈ দিছে মুখ্যমন্ত্ৰী হিমন্ত বিশ্ব শৰ্মাই।
মুখ্যমন্ত্ৰীগৰাকীৰ মতে, প্ৰতি ইউনিটত ৫ পইচাৰ পৰা ১০ পইচালৈকে বিদ্যুতৰ মাচুল বৃদ্ধি হ’ব পাৰে। এই বৃদ্ধি কেৱল তিনিমাহৰ বাবেহে থাকিব। আন্তঃৰাষ্ট্ৰীয় পৰিস্থিতি আৰু যুদ্ধৰ প্ৰভাৱৰ ফলত পেট্ৰ’ল-ডিজেলৰ দাম বৃদ্ধি পোৱাৰ বাবে এই সাময়িক ব্যৱস্থা গ্ৰহণ কৰা হৈছে।
যুদ্ধৰ পৰিস্থিতি স্বাভাৱিক হ’লে কমিব পেট্ৰ’ল-ডিজেলৰ দাম
মুখ্যমন্ত্ৰী হিমন্ত বিশ্ব শৰ্মাই উল্লেখ কৰে যে, যুদ্ধৰ পৰিস্থিতি হ্ৰাস পালে পেট্ৰ’ল আৰু ডিজেলৰ মূল্যও কমিব। তেনে পৰিস্থিতিত বিদ্যুতৰ মাচুল বৃদ্ধিৰ এই ব্যৱস্থাও সাময়িকভাৱে বন্ধ হ’ব।
তেওঁ স্পষ্ট কৰি দিয়ে যে, এই বৃদ্ধি কোনো বৃহৎ পৰিমাণৰ নহয় আৰু ইয়াক লৈ অত্যধিক হৈ-চৈ কৰাৰ প্ৰয়োজন নাই। মাত্ৰ ৫ৰ পৰা ১০ পইচাৰ এই বৃদ্ধি তিনিমাহৰ বাবেহে প্ৰযোজ্য হ’ব।
বিদ্যুৎ গ্ৰাহকৰ ওপৰত কি প্ৰভাৱ পৰিব?
বিদ্যুতৰ মাচুল প্ৰতি ইউনিটত বৃদ্ধি পোৱাৰ ফলত ঘৰুৱা গ্ৰাহকৰ লগতে ব্যৱসায়িক গ্ৰাহকসকলৰো বিদ্যুৎ বিল কিছু পৰিমাণে বৃদ্ধি পাব পাৰে। অৱশ্যে এই বৃদ্ধিৰ প্ৰকৃত প্ৰভাৱ গ্ৰাহকৰ বিদ্যুৎ ব্যৱহাৰৰ পৰিমাণৰ ওপৰত নিৰ্ভৰ কৰিব।
মুখ্যমন্ত্ৰী হিমন্ত বিশ্ব শৰ্মাৰ এই ঘোষণাৰ পাছতে ৰাজ্যৰ বিদ্যুৎ গ্ৰাহকৰ মাজত বিষয়টোৱে বিশেষ চৰ্চা লাভ কৰিছে। তিনিমাহৰ পাছত বিদ্যুতৰ মাচুল পুনৰ আগৰ অৱস্থালৈ ঘূৰি আহিব নে নাই, সেয়া পৰৱৰ্তী পৰিস্থিতিৰ ওপৰত নিৰ্ভৰ কৰিব।
ৰাজ্যবাসীৰ বাবে এই বিদ্যুৎ মাচুল বৃদ্ধি সাময়িক হ’ব বুলি আশ্বাস দিছে মুখ্যমন্ত্ৰীগৰাকীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
