ভাৰতীয় ক্ৰিকেট দলৰ তাৰকা বেগী বলাৰ মহম্মদ ছামিয়ে টেষ্ট ক্ৰিকেটৰ পৰা অৱসৰ ঘোষণা কৰিছে। ৬ নৱেম্বৰত নিজৰ ছ’চিয়েল মিডিয়া একাউণ্টত এক আৱেগিক বাৰ্তা প্ৰকাশ কৰি অনুৰাগীসকলক এই কথা জনায় ছামিয়ে। ইয়াৰ লগে লগে ভাৰতীয় ক্ৰিকেটৰ অন্যতম শ্ৰেষ্ঠ বেগী বলাৰগৰাকীৰ ১৩ বছৰীয়া টেষ্ট কেৰিয়াৰৰ অন্ত পৰে। ভাৰতীয় দলৰ হৈ মহম্মদ ছামিয়ে মুঠ ৬৪খন টেষ্ট মেচ খেলি ২২৯টা উইকেট দখল কৰিবলৈ সক্ষম হৈছিল। তেওঁৰ বলিঙে বহু গুৰুত্বপূৰ্ণ মেচত ভাৰতীয় দলক সফলতা প্ৰদান কৰিছিল।
অভিষেকৰ দিনটোতে অৱসৰৰ ঘোষণা
মহম্মদ ছামিৰ টেষ্ট কেৰিয়াৰৰ সৈতে ৬ নৱেম্বৰ তাৰিখটোৰ এক বিশেষ সম্পৰ্ক আছে। ২০১৩ চনৰ ৬ নৱেম্বৰত কলকাতাৰ ইডেন গাৰ্ডেনত ৱেষ্ট ইণ্ডিজৰ বিৰুদ্ধে টেষ্ট ক্ৰিকেটত অভিষেক ঘটিছিল ছামিৰ। আশ্চৰ্যজনকভাৱে, ১৩ বছৰৰ পাছত একে তাৰিখতে তেওঁ টেষ্ট ক্ৰিকেটৰ পৰা অৱসৰ ঘোষণা কৰে। অৰ্থাৎ যিটো দিনত ছামীয়ে টেষ্ট ক্ৰিকেটৰ যাত্ৰা আৰম্ভ কৰিছিল, সেই একেটা দিনতে তেওঁ এই ফৰ্মেটৰ পৰা বিদায় লোৱাৰ সিদ্ধান্ত গ্ৰহণ কৰে।
অভিষেক টেষ্টতে ৯টা উইকেট দখল
টেষ্ট ক্ৰিকেটত মহম্মদ ছামিৰ আৰম্ভণি আছিল অতি চমকপ্ৰদ। ৱেষ্ট ইণ্ডিজৰ বিৰুদ্ধে অভিষেক মেচখনত তেওঁ দুয়োটা ইনিংছ মিলাই মুঠ ৯টা উইকেট দখল কৰিছিল। প্ৰথম ইনিংছত ছামীয়ে ১৭ অভাৰ বলিং কৰি ৭১ ৰানৰ বিনিময়ত ৪টা উইকেট লাভ কৰিছিল। আনহাতে, দ্বিতীয় ইনিংছত ১৩.১ অভাৰ বলিং কৰি ৪৭ ৰানৰ বিনিময়ত ৫টা উইকেট দখল কৰিবলৈ সক্ষম হৈছিল ছামিয়ে।
অন্তিম টেষ্ট মেচতো উজ্জ্বল প্ৰদৰ্শন
মহম্মদ ছামীয়ে নিজৰ টেষ্ট কেৰিয়াৰৰ অন্তিমখন মেচতো বলিঙেৰে সকলোকে মুগ্ধ কৰিছিল। অষ্ট্ৰেলিয়াৰ বিৰুদ্ধে বিশ্ব টেষ্ট চেম্পিয়নশ্বিপৰ ফাইনেল আছিল তেওঁৰ অন্তিমখন টেষ্ট মেচ। সেই মেচখনত ছামিয়ে দুয়োটা ইনিংছ মিলাই ৪টা উইকেট দখল কৰিছিল। যদিও তেওঁ নিজৰ বলিঙেৰে দলৰ বাবে গুৰুত্বপূৰ্ণ অৱদান আগবঢ়াইছিল, তথাপি পৰৱৰ্তী সময়ত আঘাতৰ সমস্যাৰ বাবে টেষ্ট ক্ৰিকেটৰ পৰা আঁতৰি থাকিবলগীয়া হয়।
মহম্মদ ছামিৰ ১৩ বছৰীয়া টেষ্ট কেৰিয়াৰ বহু স্মৰণীয় প্ৰদৰ্শন, দুৰ্দান্ত বলিং আৰু অসাধাৰণ সফলতাৰে ভৰি আছে। ৬৪খন টেষ্ট মেচত ২২৯টা উইকেট দখল কৰি তেওঁ ভাৰতীয় ক্ৰিকেটৰ ইতিহাসত নিজৰ নাম সোণালী আখৰেৰে লিপিবদ্ধ কৰিলে। তেওঁৰ অৱসৰে ভাৰতীয় টেষ্ট ক্ৰিকেটত এক বিশেষ অধ্যায়ৰ সমাপ্তি ঘটালে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
