জ্যোতিষশাস্ত্ৰত ৰাহু আৰু কেতুক ছায়া গ্ৰহ হিচাপে গণ্য কৰা হয়। এই দুয়োটা গ্ৰহৰ ৰাশি পৰিৱৰ্তনক জ্যোতিষৰ দৃষ্টিকোণৰ পৰা যথেষ্ট গুৰুত্বপূৰ্ণ বুলি ধৰা হয়। বিশ্বাস কৰা হয় যে ৰাহু আৰু কেতুৰ ৰাশি পৰিৱৰ্তনে মানুহৰ জীৱনৰ বিভিন্ন দিশত প্ৰভাৱ পেলাব পাৰে। বিশেষকৈ ব্যক্তিৰ চিন্তা-চৰ্চা, সিদ্ধান্ত গ্ৰহণৰ ক্ষমতা, কৰ্মজীৱন, পাৰিবাৰিক সম্পৰ্ক আৰু ভৱিষ্যতৰ পৰিকল্পনাত ইয়াৰ প্ৰভাৱ পৰিব পাৰে বুলি জ্যোতিষশাস্ত্ৰত উল্লেখ আছে।
২০২৬ চনৰ ২৫ নৱেম্বৰত ৰাহু আৰু কেতুৰ এক উল্লেখযোগ্য ৰাশি পৰিৱৰ্তন হ’ব বুলি জ্যোতিষীয় গণনাত কোৱা হৈছে। সেইদিনা বিয়লি ৪ বাজি ৩৪ মিনিটত এই পৰিৱৰ্তন ঘটিব। জ্যোতিষৰ মতে, ৰাহুৱে মকৰ ৰাশিত আৰু কেতুৱে কৰ্কট ৰাশিত প্ৰৱেশ কৰিব। এই অৱস্থান প্ৰায় ১৮ মাহলৈকে অৰ্থাৎ ডেৰ বছৰ ধৰি বাহাল থাকিব।
জ্যোতিষশাস্ত্ৰৰ বিশ্বাস অনুসৰি, এই পৰিৱৰ্তনে ১২টা ৰাশিৰ লোকৰ জীৱনতে বিভিন্ন ধৰণৰ প্ৰভাৱ পেলাব পাৰে। অৱশ্যে ইয়াৰ মাজতে চাৰিটা ৰাশিৰ লোকৰ বাবে এই সময়ছোৱা কিছু প্ৰত্যাহ্বানজনক হোৱাৰ সম্ভাৱনা প্ৰকাশ কৰা হৈছে। গতিকে এই চাৰিটা ৰাশিৰ লোকসকলে কৰ্মজীৱন, আৰ্থিক বিষয় আৰু পাৰিবাৰিক সম্পৰ্কৰ ক্ষেত্ৰত বিশেষ সাৱধানতা অৱলম্বন কৰাটো প্ৰয়োজন বুলি জ্যোতিষশাস্ত্ৰত কোৱা হৈছে।
১. মকৰ ৰাশি
মকৰ ৰাশিৰ জাতক-জাতিকাসকলৰ বাবে এই সময়ছোৱা বিশেষ পৰিৱৰ্তনৰ সময় হ’ব পাৰে। ৰাহু মকৰ ৰাশিত প্ৰৱেশ কৰাৰ ফলত নিজৰ পৰিচয় প্ৰতিষ্ঠা কৰা, কৰ্মক্ষেত্ৰত উন্নতি কৰা আৰু জীৱনত সফলতা লাভ কৰাৰ ইচ্ছা বৃদ্ধি পাব পাৰে বুলি জ্যোতিষশাস্ত্ৰত কোৱা হৈছে। এই সময়ছোৱাত কেৰিয়াৰ আৰু ভৱিষ্যতৰ পৰিকল্পনাক লৈ ডাঙৰ সিদ্ধান্ত লোৱাৰ কথা চিন্তা কৰিব পাৰে। অৱশ্যে যিকোনো সিদ্ধান্ত গ্ৰহণ কৰাৰ আগতে ভালদৰে চিন্তা-চৰ্চা কৰাটো প্ৰয়োজন। বিশেষকৈ কৰ্মক্ষেত্ৰত উৰ্ধতন বিষয়া বা সহকৰ্মীৰ সৈতে কথা-বতৰা পাতোঁতে সংযম বজাই ৰখা উচিত। খৰখেদাকৈ কোনো সিদ্ধান্ত লোৱাৰ পৰা আঁতৰি থাকিলে সম্ভাব্য সমস্যাৰ পৰা হাত সাৰিব পাৰিব।
২. কৰ্কট ৰাশি
কৰ্কট ৰাশিৰ জাতক-জাতিকাসকলৰ বাবে কেতুৰ ৰাশি পৰিৱৰ্তনে আৱেগিক আৰু পাৰিবাৰিক জীৱনত কিছু প্ৰভাৱ পেলাব পাৰে বুলি জ্যোতিষশাস্ত্ৰত কোৱা হৈছে। এই সময়ছোৱাত আপুনি আগতকৈ কিছু অন্তৰ্মুখী হৈ পৰিব পাৰে। সৰু সৰু কথাতো অধিক চিন্তা কৰাৰ প্ৰৱণতা বৃদ্ধি পাব পাৰে। পৰিয়ালৰ সদস্যসকলৰ সৈতে থকা সম্পৰ্কত কেতিয়াবা দূৰত্ব অনুভৱ কৰিব পাৰে। ঘৰুৱা পৰিৱেশতো কিছুমান বিষয়ক লৈ অস্বস্তিৰ সৃষ্টি হ’ব পাৰে। সেয়েহে এই সময়ছোৱাত পৰিয়ালৰ সদস্যসকলৰ সৈতে মুকলিকৈ কথা পতা আৰু আৱেগৰ বশৱৰ্তী হৈ কোনো সিদ্ধান্ত গ্ৰহণ নকৰাটো ভাল। পাৰস্পৰিক বুজাবুজি আৰু ধৈৰ্য বজাই ৰখাৰ ওপৰত গুৰুত্ব দিব লাগে।
৩. ধনু ৰাশি
ধনু ৰাশিৰ লোকসকলৰ বাবে এই ৰাহু-কেতুৰ পৰিৱৰ্তনে আৰ্থিক আৰু পাৰিবাৰিক বিষয়ত কিছু সাৱধানতা অৱলম্বন কৰাৰ ইংগিত দিয়ে বুলি জ্যোতিষশাস্ত্ৰত উল্লেখ কৰা হৈছে। এই সময়ছোৱাত হঠাতে খৰচ বৃদ্ধি পোৱাৰ সম্ভাৱনা থাকিব পাৰে। ইয়াৰ উপৰি নতুন কোনো ব্যৱসায় বা প্ৰকল্পত ধন বিনিয়োগ কৰাৰ চিন্তা মনলৈ আহিব পাৰে। কিন্তু ভালদৰে পৰীক্ষা-নিৰীক্ষা নকৰাকৈ কোনো আঁচনি বা ব্যৱসায়ত ধন বিনিয়োগ কৰাটো উচিত নহ’ব। বিশেষকৈ আৰ্থিক লেনদেনৰ ক্ষেত্ৰত সাৱধান হোৱা প্ৰয়োজন। অপ্ৰয়োজনীয় খৰচ নিয়ন্ত্ৰণ কৰাৰ লগতে ভৱিষ্যতৰ বাবে সঞ্চয়ৰ ওপৰত গুৰুত্ব দিয়ক। আনৰ কথাত প্ৰভাৱিত হৈ ডাঙৰ আৰ্থিক সিদ্ধান্ত গ্ৰহণ কৰাৰ পৰাও বিৰত থাকক।
৪. তুলা ৰাশি
তুলা ৰাশিৰ জাতক-জাতিকাসকলৰ বাবে ৰাহু আৰু কেতুৰ এই ৰাশি পৰিৱৰ্তনে কৰ্মজীৱন, সামাজিক সম্পৰ্ক আৰু ব্যক্তিগত জীৱনৰ ভাৰসাম্যত কিছু প্ৰভাৱ পেলাব পাৰে বুলি জ্যোতিষশাস্ত্ৰত বিশ্বাস কৰা হয়। এই সময়ছোৱাত কৰ্মক্ষেত্ৰত অনিশ্চয়তা বা অতিৰিক্ত দায়িত্বৰ সন্মুখীন হ’বলগীয়া হ’ব পাৰে। কামৰ চাপ বৃদ্ধি পোৱাৰ ফলত সময় আৰু শক্তিৰ সঠিক ব্যৱস্থাপনা কৰাটো প্ৰয়োজনীয় হৈ পৰিব। যিসকলে চাকৰি সলনি কৰাৰ কথা ভাবিছে, নতুন ব্যৱসায় আৰম্ভ কৰিব বিচাৰিছে অথবা কোনো ডাঙৰ অংশীদাৰিত্বত জড়িত হোৱাৰ পৰিকল্পনা কৰিছে, তেওঁলোকে খৰখেদা কৰা উচিত নহ’ব। যিকোনো সিদ্ধান্ত লোৱাৰ আগতে সকলো দিশ ভালদৰে বিবেচনা কৰক। কৰ্মক্ষেত্ৰত ধৈৰ্য আৰু পৰিকল্পনাৰে আগবাঢ়িলে সম্ভাৱ্য সমস্যাৰ পৰা হাত সাৰিব পাৰিব।
বিশেষ দ্ৰষ্টব্য: এই লেখাটো জ্যোতিষশাস্ত্ৰৰ পৰম্পৰাগত বিশ্বাস আৰু ব্যাখ্যাৰ আধাৰত প্ৰস্তুত কৰা হৈছে। ৰাহু-কেতুৰ ৰাশি পৰিৱৰ্তনৰ ফলত জীৱনত এনে পৰিৱৰ্তন নিশ্চিতভাৱে ঘটিব বুলি কোনো বৈজ্ঞানিক প্ৰমাণ নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ

















