অসম লাইভ২৪ঃ এটা বিশেষ ঘটনাই সলাইছে চিকিৎসকৰ বৃত্তিকো। চিকিৎসকজন এতিয়া একাধাৰে যান-বাহন আৰক্ষীও। ৰোগীক চিকিৎসা দিয়াৰ ওপৰিও যান-বাহন আৰক্ষীৰ দায়িত্বও পালন কৰিছে চিকিৎসকগৰাকীয়ে। প্ৰথমটো পেছাৰ সৈতে তেওঁ দীৰ্ঘদিন ধৰি জড়িত যদিও দ্বিতীয় পেছাটোৰ সৈতে তেঁওৰ পৰিচয় ঘটিছে ২০২২ চনতহে।
কৃষ্ণ যাদৱ নামৰ চিকিৎসকগৰাকীৰ চিকিৎসকৰ পৰা যান-বাহন আৰক্ষীৰ পেছা আঁকোৱালী লোৱাৰ আঁৰত আছে বিশেষ এটি কাৰণ। ২০১১ বৰ্ষৰ অক্টোবৰ মাহ। প্ৰতিদিনেই চিকিৎসালয়ত ৰোগী চাই চিকিৎসক কৃষ্ণ যাদৱে। চিকিৎসালয়ৰ পৰা ৰোগী চাই উভতি আহোঁতে সদায়ে যান-জঁটত পৰাটো তেওঁৰ দৈনন্দিনতা। এনেকৈ যান-জঁটত ৰৈ থাকোতে এদিন তেওঁৰ কাষতেই এখন এম্বুলেঞ্চ চাইৰেণ বজাই বজাই ৰৈ যায়। চিকিৎসক কৃষ্ণই সেই দৃশ্য প্ৰত্যক্ষ কৰে। তেওঁ অন্য যাত্ৰীৰ দৰেকৈ ৰৈ নাথাকি এম্বুলেঞ্চখনক বাট এৰি দিয়ে। নিজে গাড়ীখন আঁতৰাই নামি আহি অন্যান্য গাড়ীচালকসকলক এম্বুলেঞ্চৰ বাবে বাটটো এৰি দিবলৈ অনুৰোধ কৰে।
চিকিৎসক কৃষ্ণই কৰা অনুৰোধ কোনোৱে মানিব নিবিচাৰিলে। চিকিৎসক কৃষ্ণই এই অৱস্থাত নিজকে বৰ অসহায় অনুভৱ কৰিলে। সেই দিনটোৰ পিছতেই এটা হতাশাই প্ৰত্যেক সময়তে খেদি থকা হ’ল চিকিৎসক কৃষ্ণক। তেওঁৰ ঘৰলৈ উভতি গৈ বাৰে বাৰে এটা কথাই ভাৱি থাকিল, ‘ৰোগীগৰাকী চিকিৎসালয় পালেগৈনে?’ মনত ভাৱি থকা সেই কথা কাকতলীয়া ভাৱেই মিলি গ’ল চিকিৎকগৰাকীৰ। পিছদিনা পুৱাই কাকতৰ প্ৰথম পৃষ্ঠাৰ হেডলাইনত জিলিকিল, যান-জঁটৰ বাবেই এখন এম্বুলেঞ্চত নিয়া ৰোগীয়ে হাস্পতাল পোৱাৰ আগতেই মৃত্যুক সাবটি ল’লে। কঁপি উঠিল তেওঁৰ অন্তৰাত্মা। মুহূৰ্ততেই এক বিষন্নতা নামি আহিল।
এই ঘটনাৰ পিছতেই চিকিৎসক কৃষ্ণই সিদ্ধান্ত ল’লে চিকিৎসা সেৱাৰ ওপৰিও তেওঁ ট্ৰেফিক কণ্ট্ৰলাৰ হিচাপে কাম কৰিব। কিন্তু ভাৱিলেই জানো এইয়া হৈ উঠে! কৃষ্ণৰ ক্ষেত্ৰতো সেইয়াই হ’ল। তেওঁৰ সিদ্ধান্তৰ কথাত পৰিয়ালৰ সদস্যসকলে আপত্তি দৰ্শাই। ১১ বছৰৰ অন্তত পৰিয়ালৰ লোকসকলক বুজাবলৈ সক্ষম হৈছে চিকিৎসকগৰাকীয়ে। ২০২২ বৰ্ষত বিনা বেতনেৰে ট্ৰেফিক কণ্ট্ৰলাৰ হিচাপে কামৰ দায়িত্ব ল’লে কৃষ্ণই।
প্ৰতিদিনেই ৩ ঘণ্টাকৈ উত্তৰ প্ৰদেশৰ নয়ডাৰ ট্ৰেফিক চিগনেলত কাম কৰে চিকিৎসক কৃষ্ণই। কৃষ্ণই প্ৰকাশ কৰা অনুযায়ী যান-বাহন আৰক্ষীৰ চৰকাৰী পোছাক তেওঁ পৰিধান নকৰে। তাৰ সলনি তেওঁ নিজাকৈ এই কামৰ বাবে পোছাক চিলাই লৈছে। যান-বাহন আৰক্ষীৰ দায়িত্ব পালন কৰিবলৈ গৈ তেওঁ বহুতো সমস্যাৰ সন্মুখীন হৈছে যদিও ৰাইজৰ সুবিধাৰ্থে এই কাম কৰিবলৈ আগ্ৰহী বুলি উল্লেখ কৰিছে চিকিৎসক কৃষ্ণ যাদৱে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
