৫ ৰাজ্যৰ বিধানসভা নিৰ্বাচন চলিছে৷ তাৰ মাজতেই জাতীয় ৰাজনীতিত ডাঙৰ মাপৰ ওলটপালট৷ ৰাজ্যসভাৰ আম আদমি পাৰ্টীক ফান্দত পেলাই শুকুৰবাৰে শাসক দল বিজেপিত যোগ দিছে ৰাজ্যসভাৰ সাংসদ ৰাঘৱ চাড্ডাই৷ ৰাঘৱ চাড্ডাই তেওঁৰ লগত লৈ গৈছে আপ ৰ আৰু ৬জন ৰাজ্যসভা সাংসদকো৷ আৰু এই সংখ্যা খুবেই গুৰুত্বপূৰ্ণ বুলি চৰ্চা চলিছে ৰাজনৈতিক মহলত৷ এজন সংগী কম হ’লেই ৰাঘৱৰ সাংসদ পদ যোৱাৰ সম্ভাৱনা আছিল৷
এতিয়া কিয় বাতিল নহয় সাংসদ পদ?
ৰাঘৱ চাড্ডাসহ এই ৭ সাংসদে নিশাৰ ভিতৰতে বিজেপি দলত যোগদানৰ পাছতে স্বাভাৱিকভাৱেই প্ৰশ্ন উঠিছে দলত্যাগ বিৰোধী আইনক লৈ৷ কিন্তু অংক কৰিয়েই ৬ সাংসদক লৈ দলত্যাগ কৰিছে ৰাঘৱে৷ যাতে তেওঁৰ সাংসদ পদ বাহাল থাকে৷ সংবিধানৰ দশম তফচিল বা দলত্যাগ বিৰোধী আইনৰ আওতাত নপৰে৷
এই আইন অনুসৰি যদি কোনো দলৰ মুঠ বিধায়ক বা সাংসদৰ সংখ্যাৰ অন্তত দুই তৃতীয়াংশ সদস্যই একেলগে অন্য কোনো দলৰ সৈতে Mergerকৰে বা অন্য দলত যোগ দিয়াৰ কথা ঘোষণা কৰে তেতিয়া তেওঁলোকৰ সদস্যপদ খাৰিজ নহয়৷
ৰাজ্যসভাত আপৰ মুঠ ১০ জন সাংসদ আছিল৷ সূত্ৰৰ খবৰ অনুসৰি তেওঁলোকৰ মাজতে ৭ জন ক্ৰমে, ৰাঘৱ চাড্ডা, সন্দীপ পাঠক, হৰভজন সিং, অশোক কুমাৰ মিত্তল, ৰাজিন্দৰ গুপ্ত, বিক্ৰমজিৎ সিং চাহন আৰু স্বাতী মালিৱালে দল এৰিছে৷ সংখ্যাটো ১০ৰ দুই তৃতীয়াংশতকৈ বেছি৷ অৰ্থাৎ সু কৌশলেৰে নিজৰ সাংসদ পদ ৰক্ষা কৰিছে ৰাঘৱ চাড্ডাই৷
ছচিয়েল মিডিয়াযোগে ৰাঘৱ চাড্ডাই জনাইছে যে সংবিধানৰ নিয়ম মানি তেওঁ বিজেপিত যোগ দিছে৷ বেনিয়ম নকৰিলেও ৰাঘৱ চাড্ডা, হৰভজন সিঙৰ এই পদক্ষেপ নৈতিক নে সেই প্ৰশ্ন তুলিছে ৰাজনৈতিক বিশ্লেষকে৷ কাৰণ তেওঁ লোকসভাৰ সাংসদ নহয়, জনতাৰ ভোটত নিৰ্বাচিত নহয়৷ আপ দলৰ পৰাই তেওঁলোকক ৰাজ্যসভাৰ মনোনয়ন দিয়া হৈছিল৷ তেওঁলোকৰ মতে বিজেপিত যোগ দিব খুজিলে ৰাঘৱে সাংসদ পদৰ পৰা ইস্তাফা দি যাব লাগিছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
