শাৰদীয় দুৰ্গাপূজাক লৈ সাজু হৈছে কামৰূপ মহানগৰ জিলা প্ৰশাসন। পূজা উদযাপনৰ সময়ত যাতে কোনো ধৰণৰ অপ্ৰীতিকৰ ঘটনা, যান-জঁট, অগ্নিকাণ্ড বা আইন-শৃংখলাজনিত পৰিস্থিতিৰ সৃষ্টি নহয়, তাৰ বাবে প্ৰশাসনে জাৰি কৰিছে বিশেষ SOP। এই SOP অনুসৰি প্ৰতিখন পূজা কমিটিয়ে নিৰ্দিষ্ট নীতি-নিয়ম মানি চলিব লাগিব। নিয়ম উলংঘা কৰিলে পূজা কমিটিৰ বিৰুদ্ধে আইনগত ব্যৱস্থা গ্ৰহণ কৰা হ’ব।
থানাৰ পৰা লিখিত অনুমতি বাধ্যতামূলক
প্ৰতিখন পূজা কমিটিয়ে পূজা অনুষ্ঠিত কৰাৰ পূৰ্বে স্থানীয় থানাৰ পৰা লিখিত অনুমতি ল’ব লাগিব। অনুমতি অবিহনে পূজা আয়োজন কৰিব নোৱাৰিব। ইয়াৰ উপৰি মণ্ডপত অস্থায়ী বিদ্যুৎ সংযোগৰ বাবে APDCLৰ পৰা অনুমতি লোৱাটোও বাধ্যতামূলক কৰা হৈছে।
সাংস্কৃতিক অনুষ্ঠানৰ বাবেও আগতীয়া অনুমতি
পূজা মণ্ডপত যদি সাংস্কৃতিক অনুষ্ঠান, সংগীতানুষ্ঠান বা আন কোনো কাৰ্যসূচী আয়োজন কৰা হয়, তেন্তে সেই বিষয়ে আগতীয়াকৈ আৰক্ষীক অৱগত কৰিব লাগিব। একেদৰে পূজা মণ্ডপ নিৰ্মাণৰ সময়ত কোনো ৰাজহুৱা ৰাস্তা, পদপথ বা বাইলেন বন্ধ কৰি ৰখা বা সাধাৰণ জনতাৰ চলাচলত বাধা সৃষ্টি কৰিব নোৱাৰিব।
প্লাষ্টিক আৰু থাৰ্মকল ব্যৱহাৰত নিষেধাজ্ঞা
মূৰ্তি নিৰ্মাণৰ ক্ষেত্ৰতো বিশেষ নিৰ্দেশনা দিয়া হৈছে। প্লাষ্টিক, থাৰ্মকল বা পলিথিন ব্যৱহাৰ কৰি মূৰ্তি নিৰ্মাণ সম্পূৰ্ণৰূপে নিষিদ্ধ কৰা হৈছে। পূজা মণ্ডপত পৰ্যাপ্ত পোহৰৰ ব্যৱস্থা কৰাৰ লগতে ভক্ত আৰু দৰ্শনাৰ্থীৰ বাবে খোৱা পানীৰ ব্যৱস্থাও ৰাখিব লাগিব।
২৪ ঘণ্টাই চলিব লাগিব CCTV
নিৰাপত্তাৰ স্বাৰ্থত প্ৰতিটো পূজা মণ্ডপত CCTV কেমেৰা স্থাপন কৰিব লাগিব আৰু সেই কেমেৰা ২৪ ঘণ্টাই সক্ৰিয় কৰি ৰাখিব লাগিব। পূজা কমিটিয়ে মণ্ডপৰ নিৰাপত্তাৰ দায়িত্বত থকা স্বেচ্ছাসেৱকসকলৰ নাম আৰু ফোন নম্বৰ স্থানীয় থানাত জমা দিব লাগিব। ইয়াৰ লগতে মণ্ডপৰ সন্মুখত আৰক্ষী আৰু অগ্নিনিৰ্বাপক বাহিনীৰ জৰুৰীকালীন ফোন নম্বৰ উল্লেখ থকা বেনাৰ আঁৰি থ’ব লাগিব।
DJ সম্পূৰ্ণ নিষিদ্ধ, মাইকৰ শব্দৰ ক্ষেত্ৰতো নিয়ম
দুৰ্গাপূজাৰ সময়ত DJ বজোৱা সম্পূৰ্ণৰূপে নিষিদ্ধ কৰা হৈছে। আনহাতে, মাইক ব্যৱহাৰ কৰিলেও শব্দৰ মাত্ৰা ৬০ ডেচিবেলৰ ওপৰলৈ নিব নোৱাৰিব। অতি উচ্চ শব্দত মাইক বা লাউডস্পীকাৰ ব্যৱহাৰ কৰি যাতে সাধাৰণ জনতা, বৃদ্ধ, শিশু আৰু অসুস্থ লোকৰ অসুবিধা নহয়, তাৰ বাবেই এই নিৰ্দেশনা জাৰি কৰা হৈছে।
মণ্ডপৰ পৰিষ্কাৰ-পৰিচ্ছন্নতাৰ দায়িত্ব পূজা কমিটিৰ
পূজা মণ্ডপ আৰু ইয়াৰ চৌহদৰ আৱৰ্জনা পূজা কমিটিয়ে নিজেই পৰিষ্কাৰ কৰিব লাগিব। ইয়াৰ বাবে মণ্ডপত পৰ্যাপ্ত সংখ্যক ডাষ্টবিন ৰখাৰ নিৰ্দেশ দিয়া হৈছে। লগতে যিকোনো জৰুৰী পৰিস্থিতিৰ মোকাবিলা কৰিবলৈ মণ্ডপত Emergency Exit Gateৰ ব্যৱস্থা থাকিব লাগিব।
বিসৰ্জনৰ সময়তো থাকিব বিশেষ সতৰ্কতা
দেৱী প্ৰতিমা বিসৰ্জনৰ সময়ত প্ৰতিমাৰ সৈতে প্লাষ্টিক, কাপোৰ বা অন্যান্য নিষিদ্ধ সামগ্ৰী নদীত পেলাব নোৱাৰিব। পৰিৱেশ সুৰক্ষাৰ প্ৰতি লক্ষ্য ৰাখি বিসৰ্জনৰ সময়ত এই নিয়ম কঠোৰভাৱে পালন কৰিব লাগিব।
মণ্ডপৰ ১০০ মিটাৰৰ ভিতৰত পাৰ্কিং নিষিদ্ধ
যান-জঁট নিয়ন্ত্ৰণৰ বাবেও প্ৰশাসনে বিশেষ ব্যৱস্থা গ্ৰহণ কৰিছে। প্ৰতিটো পূজা মণ্ডপৰ ১০০ মিটাৰৰ ভিতৰত কোনো ধৰণৰ গাড়ী পাৰ্কিং কৰিব নোৱাৰিব। পূজা মণ্ডপৰ ভিতৰ আৰু সমীপৱৰ্তী অঞ্চলত ‘No Tobacco’ আৰু ‘No Alcohol’ৰ বেনাৰ আঁৰি থ’ব লাগিব। মণ্ডপত সুৰা বা গুটখা সেৱনো সম্পূৰ্ণৰূপে নিষিদ্ধ কৰা হৈছে।
মণ্ডপৰ আকাৰ অনুসৰি ভক্তৰ প্ৰৱেশ
পূজা মণ্ডপৰ আকাৰ আৰু পৰিসৰৰ ওপৰত ভিত্তি কৰি ভক্ত তথা দৰ্শনাৰ্থীৰ প্ৰৱেশৰ ব্যৱস্থা কৰিব লাগিব। অতিৰিক্ত ভিৰ যাতে সৃষ্টি নহয় আৰু কোনো ধৰণৰ পদপিষ্টৰ দৰে পৰিস্থিতি নঘটে, তাৰ বাবে পূজা কমিটিসমূহে এই নিয়ম মানি চলিব লাগিব। ইয়াৰ উপৰি পূজা মণ্ডপৰ সমীপত কোনো ধৰণৰ ফটকা ফুটাব নোৱাৰিব।
দাবী কৰি বৰঙণি সংগ্ৰহ কৰিব নোৱাৰিব
পূজা আয়োজনৰ নামত কোনো ব্যক্তি বা প্ৰতিষ্ঠানৰ পৰা দাবী কৰি বৰঙণি সংগ্ৰহ কৰিব নোৱাৰিব পূজা কমিটিয়ে। পূজাৰ নামত জোৰ-জবৰদস্তি বা দাবী কৰি ধন সংগ্ৰহ কৰাটো SOP অনুসৰি নিষিদ্ধ কৰা হৈছে।
সামগ্ৰিকভাৱে, সুৰক্ষা, যান-বাহন নিয়ন্ত্ৰণ, শব্দ প্ৰদূষণ, পৰিৱেশ সুৰক্ষা আৰু আইন-শৃংখলা বজাই ৰখাৰ ওপৰত গুৰুত্ব দি কামৰূপ মহানগৰ প্ৰশাসনে এই SOP প্ৰস্তুত কৰিছে। সেয়ে এইবাৰ দুৰ্গাপূজা আয়োজন কৰা প্ৰতিখন কমিটিয়ে প্ৰশাসনৰ নিৰ্দেশনাসমূহ কঠোৰভাৱে মানি চলিব লাগিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
