গুৱাহাটীৰ খানাপাৰাস্থিত ‘The Locals’ নামৰ এটা ডিস্কো ক্লাবত নিশা সংঘটিত এক ঘটনাই চাঞ্চল্যৰ সৃষ্টি কৰিছে। অত্যাধিক সুৰাপানৰ পাছত ক্লাবখনৰ পাৰ্কিং এলেকাত এগৰাকী অৰ্ধউলংগ যুৱতীক একাংশই প্ৰহাৰ কৰাৰ অভিযোগ উত্থাপন হৈছে। প্ৰত্যক্ষদৰ্শী আৰু নিৰাপত্তাৰক্ষীৰ ভাষ্য অনুসৰি, ঘটনাটো নিশা প্ৰায় ১.৩০ বজাৰ পৰা ৩ বজাৰ ভিতৰত সংঘটিত হয়।
ঘটনাৰ আৰম্ভণি ক্লাবৰ ভিতৰতে হোৱা বুলি জানিব পৰা গৈছে। অভিযোগ অনুসৰি, ক্লাবলৈ অহা এগৰাকী যুৱতীয়ে প্ৰথমে এগৰাকী মহিলা বাউন্সাৰক বিয়েৰৰ বটলেৰে আক্ৰমণ কৰে। এই আক্ৰমণত মহিলা বাউন্সাৰগৰাকী গুৰুতৰভাৱে আহত হয়। নিৰাপত্তাৰক্ষীৰ ভাষ্য অনুসৰি, বটলৰ আঘাতত বাউন্সাৰগৰাকীৰ মূৰত গভীৰ আঘাত লাগে আৰু মূৰত ১৩ টাকৈ চিলাই কৰিবলগীয়া হয়। পাছত তেওঁক চিকিৎসাৰ বাবে হাস্পতাললৈ লৈ যোৱা হয়।
ইয়াৰ পাছতে পৰিস্থিতি অধিক উত্তপ্ত হৈ পৰে। অভিযোগ অনুসৰি, যুৱতীগৰাকীক ক্লাবৰ ভিতৰৰ পৰা তলৰ পাৰ্কিং এলেকালৈ অনা হয়। তাত মহিলা বাউন্সাৰগৰাকীয়ে যুৱতীগৰাকীক আক্ৰমণ কৰাৰ অভিযোগ উত্থাপন হৈছে। আন একাংশ লোকেও যুৱতীগৰাকীক প্ৰহাৰ কৰা বুলি অভিযোগ উঠিছে। ঘটনাৰ সময়ত যুৱতীগৰাকীক মাটিত বগৰাই বগৰাই প্ৰহাৰ কৰাৰ লগতে অৰ্ধউলংগ অৱস্থাতো প্ৰহাৰ কৰা হোৱা বুলি অভিযোগ উত্থাপন হৈছে।
নিৰাপত্তাৰক্ষী লাচিত বৰাৰ ভাষ্য অনুসৰি, যুৱতীগৰাকী প্ৰায় আধা ঘণ্টা সময় পাৰ্কিং এলেকাত পৰি আছিল। আক্ৰমণৰ সময়ত তেওঁ মূৰৰ পৰা তেজ ওলাই থকা অৱস্থাত আছিল বুলিও প্ৰত্যক্ষদৰ্শীয়ে জানিবলৈ দিছে। আনহাতে, ঘটনাত আহত মহিলা বাউন্সাৰগৰাকীক নিশাই চিকিৎসালয়ত ভৰ্তি কৰোৱা হয়। জানিব পৰা মতে, তেওঁৰ মূৰত গুৰুতৰ আঘাত লাগে আৰু ১৩টাকৈ চিলাই দিবলগীয়া হয়। মহিলা বাউন্সাৰগৰাকীৰ ঘৰ সোণাপুৰত বুলি নিৰাপত্তাৰক্ষীৰ ভাষ্যত প্ৰকাশ পাইছে।
প্ৰত্যক্ষদৰ্শীৰ ভাষ্য অনুসৰি, যুৱতীগৰাকীয়ে ক্লাবখনত অত্যাধিক সুৰাপান কছিল। সুৰাপানৰ পাছতে কোনো বিষয়ক কেন্দ্ৰ কৰি যুৱতীগৰাকীয়ে মহিলা বাউন্সাৰগৰাকীক বটলেৰে প্ৰহাৰ কৰে। ইয়াৰ পিছতে মহিলাবাউন্সাৰগৰাকীয়ে ক্ষুব্ধ হৈ যুৱতীগৰাকীক প্ৰত্যাক্ৰমণ কৰে। অৱশ্যে ঠিক কি কাৰণত দুয়োৰে মাজত সংঘাতৰ সৃষ্টি হৈছিল, সেয়া এতিয়াও স্পষ্ট হোৱা নাই।
আনহাতে, ঘটনাটোৰ সৈতে ক্লাবখন অনুমোদিত সময়ৰ পাছলৈকে খোলা ৰখা হৈছিল নেকি, সেই বিষয়টোও চৰ্চালৈ আহিছে। অভিযোগ অনুসৰি, নিশা প্ৰায় ৩ বজালৈকে ক্লাবখন চলি আছিল। যদি এই অভিযোগ সত্য হয়, তেন্তে নিৰ্ধাৰিত সময়ৰ পাছতো ক্লাব চলোৱাৰ ক্ষেত্ৰত কোনো নিয়ম উলংঘন হৈছিল নেকি, সেই বিষয়টোও তদন্তৰ আওতালৈ আহিব পাৰে।
ঘটনাটোৰ পাছত ক্লাবখন বন্ধ হৈ পৰিছে। কিন্তু গুৰুতৰ অভিযোগ উত্থাপন হোৱাৰ পাছতো দিছপুৰ আৰক্ষী ঘটনাস্থলীত তদন্তৰ বাবে গৈছে নে নাই, তাক লৈও প্ৰশ্ন উত্থাপন হৈছে। ইফালে আক্ৰমণৰ বলি হোৱা যুৱতীগৰাকীৰ পৰিচয় বৰ্তমানলৈকে প্ৰকাশ পোৱা নাই। ঘটনাটোৰ ভিডিঅ’ ভাইৰেল হোৱাৰ পাছত সামাজিক মাধ্যমতো বিষয়টোক লৈ তীব্ৰ প্ৰতিক্ৰিয়াৰ সৃষ্টি হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
