কংগ্ৰেছৰ সাংসদ তথা লোকসভাৰ বিৰোধী দলৰ নেতা ৰাহুল গান্ধীয়ে প্ৰধানমন্ত্ৰী নৰেন্দ্ৰ মোদীৰ বিৰুদ্ধে এক গুৰুত্বপূৰ্ণ অভিযোগ উত্থাপন কৰিছে। ৰাহুল গান্ধীৰ দাবী, তেওঁৰ ফোনত এনে বহু তথ্য আৰু প্ৰমাণ আছে, যিবোৰৰ বিষয়ে প্ৰধানমন্ত্ৰী মোদীৰ অৱগত। তেওঁ অভিযোগ কৰে যে তেওঁৰ ফোন টেপ কৰা হৈছে আৰু এই সন্দৰ্ভত প্ৰধানমন্ত্ৰীয়েও জানে।
নিজৰ ইনষ্টাগ্ৰাম ষ্ট’ৰীত এই বিষয়ে উল্লেখ কৰি ৰাহুল গান্ধীয়ে প্ৰধানমন্ত্ৰী মোদীক মুখামুখি বিতৰ্কৰ বাবে প্ৰত্যাহ্বান জনায়। তেওঁ কয় যে প্ৰধানমন্ত্ৰীয়ে যিদিনাই তেওঁৰ সৈতে মুখামুখি বিতৰ্কত অংশগ্ৰহণ কৰিব, সেইদিনাই দেশবাসীয়ে জানিব পাৰিব কোন বিদেশী শক্তিৰ নিয়ন্ত্ৰণত আছে আৰু কোনে দেশবিৰোধী কাম-কাজত জড়িত হৈ আছে। ৰাহুল গান্ধীয়ে নিজৰ বক্তব্যত কয়, “প্ৰমাণ ইয়াতেই আছে। এই ফোনটোতে আছে। প্ৰধানমন্ত্ৰীয়ে জানে, কাৰণ তেওঁ মোৰ ফোন টেপ কৰে।”
তেওঁ লগতে দাবী কৰে যে তেওঁৰ ফোনত এনে বহু তথ্য আছে, যাৰ জৰিয়তে কোনে কিমান দিন ধৰি দেশবিৰোধী কাম-কাজত জড়িত হৈ আছে, সেই কথা পোহৰলৈ আহিব পাৰে। ৰাহুল গান্ধীয়ে প্ৰথমবাৰৰ বাবে ফোন টেপিঙৰ অভিযোগ উত্থাপন কৰা নাই। ইয়াৰ পূৰ্বেও তেওঁ কেইবাবাৰো এই বিষয়টো ৰাজহুৱা মঞ্চত উত্থাপন কৰিছিল।
২০২১ চনৰ জুলাইত পেগাছাছ চোৰাংচোৱা বিতৰ্কৰ সময়ত ৰাহুল গান্ধীয়ে অভিযোগ কৰিছিল যে তেওঁৰ ফোন টেপ কৰা হৈছে। ২৩ জুলাইত সংসদত সাংবাদিকৰ সৈতে হোৱা কথা-বতৰাত তেওঁ স্পষ্টকৈ কৈছিল যে তেওঁৰ কেৱল এটা ফোন নহয়, বৰং সকলো ফোন টেপ কৰা হৈছে বুলি তেওঁ বিশ্বাস কৰে।
তেওঁৰ দাবী অনুসৰি, চোৰাংচোৱা ব্যুৰোৰ (IB) বিষয়াসকলে তেওঁক ফোন কৰি তেওঁৰ ফোন টেপ কৰা হৈছে বুলি জনাইছিল। আনকি তেওঁৰ নিৰাপত্তাৰক্ষীসকলকো তেওঁৰ কথোপকথনৰ বিষয়ে ঊৰ্ধ্বতন বিষয়াক অৱগত কৰিবলৈ নিৰ্দেশ দিয়া হৈছিল বুলি ৰাহুল গান্ধীয়ে অভিযোগ কৰিছিল। এই ঘটনাৰ ন্যায়িক তদন্তৰো দাবী জনাইছিল তেওঁ।
২০২৩ চনৰ মাৰ্চ মাহত ব্ৰিটেইনৰ কেম্ব্ৰিজ বিশ্ববিদ্যালয়ত অনুষ্ঠিত এক অনুষ্ঠানত ৰাহুল গান্ধীয়ে পুনৰ ফোন টেপিঙৰ বিষয়টো উত্থাপন কৰে। তেওঁ দাবী কৰিছিল যে তেওঁৰ ফোনত পেগাছাছ স্পাইৱেৰ ব্যৱহাৰ কৰা হৈছিল। আন কেইবাজনো ৰাজনৈতিক নেতাৰ ফোনতো এই স্পাইৱেৰ ব্যৱহাৰ কৰা হৈছিল বুলি তেওঁ উল্লেখ কৰিছিল। ৰাহুল গান্ধীৰ মতে, চোৰাংচোৱা বিষয়াসকলে তেওঁক ফোনত কথা পতাৰ সময়ত সাৱধান হ’বলৈ পৰামৰ্শ দিছিল, কাৰণ তেওঁৰ কথোপকথন ৰেকৰ্ড কৰা হ’ব পাৰে।
ইয়াৰ পিছত ২০২৩ চনৰ জুনত আমেৰিকাৰ কেলিফৰ্ণিয়াত অনুষ্ঠিত এক অনুষ্ঠানতো তেওঁ এই অভিযোগ পুনৰ উত্থাপন কৰে। তেওঁ কয় যে তেওঁৰ আইফোনটো টেপ কৰা হৈছে বুলি তেওঁ বিশ্বাস কৰে। সেই অনুষ্ঠানত তেওঁ ধেমালিৰ সুৰত নিজৰ আইফোনটোলৈ চাই “হেল্ল’, মিষ্টাৰ মোদী” বুলিও মন্তব্য কৰিছিল। ৰাহুল গান্ধীয়ে লগতে কয় যে কোনো এখন ৰাষ্ট্ৰই যদি কাৰোবাৰ ফোন টেপ কৰিব বিচাৰে, তেন্তে সেই প্ৰক্ৰিয়া বন্ধ কৰাটো কঠিন। তেওঁৰ মতে, চৰকাৰ তেওঁৰ কথোপকথনৰ বিষয়ে অৱগত।
বিতৰ্কৰ বাবে মোদীক প্ৰত্যাহ্বান
বিগত ২ নৱেম্বৰত ৰাহুল গান্ধীয়ে প্ৰধানমন্ত্ৰী নৰেন্দ্ৰ মোদীক বিদেশী সাহায্যৰ বিষয়ত মুকলি বিতৰ্কৰ বাবে প্ৰত্যাহ্বান জনাইছিল। বিদেশী সমৰ্থনৰ জৰিয়তে বিৰোধী পক্ষই দেশত অস্থিৰতা সৃষ্টি কৰিছে বুলি প্ৰধানমন্ত্ৰীয়ে অভিযোগ উত্থাপন কৰাৰ পিছতে ৰাহুল গান্ধীয়ে প্ৰত্যুত্তৰ দিয়ে। তেওঁৰ দাবী, প্ৰধানমন্ত্ৰী মোদী নিজেই বিদেশী সাহায্যৰ জৰিয়তে ক্ষমতালৈ আহিছে আৰু বৰ্তমানো কাৰ্যভাৰত আছে। এই বিষয়ত ৰাহুল গান্ধীয়ে প্ৰধানমন্ত্ৰীক “যিকোনো মঞ্চত, যিকোনো সময়তে” মুখামুখি বিতৰ্কৰ বাবে আহ্বান জনায়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
