অনন্তৰ বিয়া আৰু জিঅ’ ৰিচাৰ্জৰ দামবৃদ্ধি দুটা বিষয়ক লৈ চৰ্চাত আছে আম্বানী পৰিয়াল৷ ধুমধামেৰে পুত্ৰৰ বিয়া আয়োজন কৰাৰ পাছত সকলোৰে এটাই অভিযোগ জিঅ’ৰ দাম বঢ়াই পুত্ৰৰ বিয়াৰ খৰচ ওলিয়াই ল’লে আম্বানীয়ে৷ কিন্তু বিগত তিনিমাহত জিঅ’ৰ পৰা আম্বানীৰ কিমান লাভ হৈছে?
বহু সূত্ৰই প্ৰকাশ কৰামতে আম্বানীৰ কনিষ্ঠ পুত্ৰ অনন্তৰ বিয়াত আম্বানীয়ে ব্যয় কৰিছে ৫০০০ কোটি৷ সেই হিচাপ অৱশ্যে আম্বানীৰ বাবে তেনেই কম৷ এই খৰচ কৰা ধন আম্বানীৰ মুঠ সম্পত্তিৰ মাত্ৰ ০.০৫শতাংশ৷ ইয়াৰ মাজতেই প্ৰকাশ হৈছে ৰিলায়েন্স জিঅ’ৰ তিনিমাহৰ লাভৰ হিচাপ৷
এপ্ৰিল, মে আৰু জুন মাহৰ লাভৰ হিচাপ ভাইৰেল হৈছে৷ সূত্ৰই প্ৰকাশ কৰামতে ৰিলায়েন্স জিঅ’ ইনফোকমৰ প্ৰথম ত্ৰিমাহিক যি হিচাপ তাত লাভৰ পৰিমাণ পূৰ্বতকৈ বহু বেছি৷ বিগত বছৰৰ প্ৰথম তিনিমাহৰ নেট প্ৰফিট আছিল ৪৮৬৩ কোটি৷ এইবাৰ সেই লাভৰ অংক বাঢ়ি হৈছেগৈ ৫,৪৪৫ কোটি৷ অৰ্থাৎ বিগত বছৰৰ তুলনাত এইবাৰ নেট প্ৰফিট ১২শতাংশলৈ বৃদ্ধি পাইছে৷
ৰিলায়েন্সৰ এই টেলিকম সংস্থাটোৱে বৰ্তমান ৫জি নেটৱৰ্কৰ কাম দেশজুৰি চলাই আছে৷ ২০১৬ চনত মাৰ্কেটলৈ আহিছিল জিঅ’ তাৰপাছতেই এই সংস্থাই উভতি চাব লগা হোৱা নাই৷ ক্ৰমশ আগুৱাই গৈ আছে৷ বৰ্তমান জিঅ’ হৈছে দেশৰ দ্বিতীয় বৃহত্তম টেলিকম নেটৱৰ্ক৷ কেৱল ইণ্টাৰনেটেই নহয়, মোবাইল ডিভাইছ, জিঅ’ এয়াৰ ফাইবাৰৰ পৰা আৰম্ভ কৰি বিভিন্ন এপসহ একাধিক পৰিসেৱা আছে জিঅ’ৰ৷ সম্প্ৰতি ৰিলায়েন্স জিঅ’ৰ ৰিচাৰ্জৰ দাম বাঢ়ি যোৱাক লৈ সমালোচনাও চলিছে৷ তাৰমাজতো এইবৰ্ষৰ জুনলৈকে ৯ মিলিয়ন অৰ্থাৎ প্ৰায় ১০ লাখ গ্ৰাহক যুক্ত হৈছে জিঅ’ৰ সৈতে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
