মৃত্যুৰমুখত মহাবিশ্বৰ লাখ লাখ নক্ষত্ৰ৷ কোটি কোটি বছৰ ধৰি এই নক্ষত্ৰসমূহ মহাবিশ্বত আছিল৷ এতিয়া জীৱনৰ শেষ প্ৰান্তত এই নক্ষত্ৰসমূহ৷ কাৰণ ৰাক্ষসৰ দৰে গিলি খাইছে সেই নক্ষত্ৰসমূহক৷ হেৰাই গৈছে গ্ৰহো৷ এনে দৃশ্য দেখি বিজ্ঞানীমহলৰ একাংশৰ আশংকা যে এনেকৈ হ’লে পৃথিৱীও এদিন সূৰ্যগ্ৰাসত নিশ্চিহ্ন হৈ পৰিব নেকি?
বিজ্ঞানীয়ে পৰীক্ষাত দেখা পাইছে যে বয়স বাঢ়ি যোৱা নক্ষত্ৰই নিজৰেই গ্ৰহসমূহক গিলি খাব ধৰিছে৷ এই ছবি অতীততো দেখা গৈছিল৷ সেয়া কোনো বিচ্ছিন্ন ঘটনা নহয়৷ বিজ্ঞানীয়ে দেখিছে যে এটা বা দুটা নহয়, ব্ৰহ্মাণ্ড জুৰি এইধৰণৰ ১৩০ টা গ্ৰহৰ অস্তিত্ব হেৰাই গৈছে৷ এইসমূহৰ মাজত আৰু ৩৩ টা সদ্য জন্ম হোৱা নক্ষত্ৰও আছে৷ এই সদ্য জন্মা নক্ষত্ৰসমূহো নিশ্চিহ্ন হৈ গৈছে মহাবিশ্বৰ পৰা৷ বিজ্ঞানীৰ অনুমান, অতি পুৰণি মৃত্যুমুখী নক্ষত্ৰসমূহেই গিলি খাইছে এই গ্ৰহ নক্ষত্ৰসমূহক৷
গৱেষণাপত্ৰৰ মূল লেখক, ইউনিভাৰ্ছিটি কলেজ লণ্ডনৰ অধ্যাপক এডৱাৰ্ড ব্ৰেণ্টে কয়- এই বিষয়ক লৈ দীৰ্ঘ দিন ধৰি পৰীক্ষা চলাই আছে বিজ্ঞানীয়ে৷ বহু গৱেষণাও হৈছে৷ দেখা গৈছে যে বয়স্ক নক্ষত্ৰই এই গ্ৰহসমূহক গিলি খাইছে৷ মহাকাশ বিজ্ঞানৰ তত্ত্ব আৰু বিজ্ঞানীসকলৰ অংকই কৈছে যে কোনো নক্ষত্ৰৰ বয়স হোৱাৰ লগে লগে তাৰ আকাৰো বাঢ়িব ধৰে৷ স্বাভাৱিক নিয়মতেই বয়স হোৱাৰ লগে লগে তাৰ প্ৰকৃতিগত পৰিবৰ্তনো হয়৷ কেতিয়াবা নক্ষত্ৰৰ শৰীৰৰ পৰা বাহিৰলৈ অহা লেলিহান শিখাৰ ক্ষমতা বৃদ্ধি পায়৷ কেতিয়াবা বাঢ়ে চৌম্বিক ক্ষেত্ৰৰ আকৰ্ষণ৷ এই সকলো পৰিবৰ্তনৰ প্ৰভাৱ পৰে নক্ষত্ৰৰ সকলোতকৈ কাষত থকা গ্ৰহৰ ওপৰত৷
সেই কাৰণেই পৃথিৱীৰ ভৱিষ্যতক লৈ আশংকা ব্যক্ত কৰিছে বিজ্ঞানীমহলৰ একাংশই৷ তেওঁলোকৰ মতে সূৰ্য বৃদ্ধ হলে তাৰ কোপো পৰিব সকলোৰে কাষত থকা তিনিটা গ্ৰহত৷ বুধ, শুক্ৰ আৰু পৃথিৱীত৷ এই গৱেষণাপত্ৰৰ লেখকৰ মতে পৃথিৱীৰ ক্ষেত্ৰত তেনে হোৱাৰ সম্ভাৱনা নাই৷ বুধ, শুক্ৰ সূৰ্যৰ পেটলৈ গলেও নিশ্চিহ্ন হোৱাৰ পৰা বাচিব পৃথিৱী৷ গৱেষকসকলৰ যুক্তি যে তেওঁলোকে দেখিছে ৰাক্ষস নক্ষত্ৰৰ চাৰিওপাশে ঘুৰি থকা সকলো গ্ৰহকেই কিন্তু গিলি খোৱা নাই৷ কেৱল সেইসমূহ গ্ৰহহে গিলি খাইছে যিসমূহ নক্ষত্ৰটোৰ খুবেই কাষত আছে৷ জন্মদাতা নক্ষত্ৰক প্ৰদক্ষিণ কৰিবলৈ যিসমূহ গ্ৰহৰ ১২ বা তাতকৈ কম দিন সময় লাগে মূলত সেই গ্ৰহসমূহেই নক্ষত্ৰৰ পেটলৈ গৈছে৷ সেই তুলনাত পৃথিৱী সূৰ্যতকৈ বহু দূৰৈত আছে৷
গৱেষণাপত্ৰৰ আৰু এগৰাকী লেখক ভিনছেণ্ট ভেন আইলেনে কয়, ‘পৃথিৱী হয়তো নিশ্চিহ্ন নহ’ব৷ কিন্তু প্ৰাণৰ উপযোগী নাথাকিব এই গ্ৰহ৷ বয়স্ক নক্ষত্ৰসমূহক লৈ পৰীক্ষা নিৰীক্ষা চলাবলৈ ২০২৬ চনত শেষ দিশত প্লুটো মিছনৰো চিন্তা কৰিছে বিজ্ঞানীসকলে৷ সেই ক্ষেত্ৰত আৰু বহু তথ্য ভৱিষ্যতে জনা যাব বুলি ধাৰণা কৰিছে গৱেষকে৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
