অসম লাইভ ২৪ঃ আগ্ৰাৰ ব্যক্তিগত চিকিৎসালয়ত কোভিড ৰোগীৰ মৃত্যুৰ ঘটনাৰ তদন্তৰ বাবে ২জনীয়া তদন্ত কমিটি গঠন কৰিছে আগ্ৰা প্ৰশাসনে। তদন্ত কমিটিক দুদিনৰ ভিতৰত তথ্য জমা দিয়াৰো নিৰ্দেশ প্ৰদান কৰিছে প্ৰশাসনে। আগ্ৰাৰ পৰশ হাস্পতালত বিগত ২৭ এপ্ৰিলত সংঘটিত হৈছিল এই ভয়ংকৰ ঘটনা। অক্সিজেনৰ অভাৱত মৃত্যু হৈছিল ২২গৰাকীকৈ কোভিড ৰোগীৰ। হাস্পতালখনত ৫ মিনিটৰ বাবে বন্ধ কৰি দিয়া হৈছিল অক্সিজেন যোগান। ছ’চিয়েল মিডিয়াত এটা ভিডিঅ’ ভাইৰেল হোৱাৰ পাছতেই পোহৰলৈ আহিছে সমগ্ৰ ঘটনাৰ চাঞ্চল্যকৰ তথ্য। ঘটনা সন্দৰ্ভত হাস্পতালখনৰ স্বত্বাধিকাৰীয়ে স্বীকাৰ কৰিছে সকলো কথা। স্বত্বাধিকাৰীৰ ভাষ্য অনুসৰি, এক ‘mock drill’ অনুষ্ঠিত কৰাৰ পৰিপ্ৰেক্ষিতত ৫ মিনিটৰ বাবে চিকিৎয়ালয়খনত কোভিড ৰোগীসকলৰ অক্সিজেন যোগান বন্ধ কৰি দিয়া হৈছিল। যাৰ বাবে মৃত্যু হৈছিল ২২ গৰাকীকৈ কোভিড ৰোগীৰ। ঘটনা সন্দৰ্ভত উপযুক্ত ব্যৱস্থা গ্ৰহণ কৰিছে প্ৰশাসনে। পৰশ হাস্পতালৰ স্বত্বাধিকাৰীৰ বিৰুদ্ধে গোচৰ ৰুজু কৰাৰ লগতে হাস্পতালৰ অনুজ্ঞাপত্ৰ বাতিল কৰিছে প্ৰশাসনে। চিকিৎসাধীন অন্য ৫০ গৰাকী ৰোগীক অন্য হাস্পতাললৈ প্ৰেৰণ কৰা হৈছে। ঘটনা সন্দৰ্ভত পৰৱৰ্তী সময়ত যাৱতীয় ব্যৱস্থা গ্ৰহণৰ কথা ব্যক্তি কৰিছে আগ্ৰা প্ৰশাসনে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
