অসম লাইভ২৪ঃ অখিল গগৈক আকৌ কাৰাগাৰলৈ প্ৰেৰণ কৰা হ’ব নেকি? বিধায়ক অখিলৰ বিৰুদ্ধে পুনৰ চলিব NIAৰ গোচৰৰ তদন্ত৷ মাওবাদীৰে সম্পৰ্ক থকা গোচৰ সন্দৰ্ভত চলিব তদন্ত৷ পূৰ্বে NIA আদালতে সকাহ দিছিল অখিল গগৈক৷ অখিল গগৈসহ অইন ৪ কৃষক নেতাকো দিছিল সকাহ৷ কিন্তু পুনৰ বিপদত অখিল গগৈ৷ ২৩ ফেব্ৰুৱাৰীত নিম্ন আদালতে গ্ৰহণ কৰিব শুনানি৷ আদালতত হাজিৰ হোৱাৰ নিৰ্দেশ অখিল গগৈক৷ নিম্ন আদালতৰ ৰায়ক HCত প্ৰত্যাহ্বান জনাইছিল NIAএ৷ গুৱাহাটী উচ্চ ন্যায়ালয়ে দিলে NIAৰ সপক্ষে ৰায়৷ একেটা গোচৰতে বিতু সোণোৱাল, ধৈৰ্য কোঁৱৰ, মানস কোঁৱৰৰ বিৰুদ্ধে চলিব তদন্ত৷ এই তদন্তৰ ঘোষণাৰ পাছতেই অখিলে দিছে এটা বিশেষ ফেছবুক পোষ্ট। পোষ্টটোত অখিলে লিখিছে,
‘কাৰাগাৰলৈ যাবলৈ প্ৰস্তুত হৈছো
আমাৰ বিৰুদ্ধে ‘কা’বিৰোধী আন্দোলনৰ ‘নিয়া’(NIA)ৰ গোচৰটো পুনৰ আৰম্ভ হ’ল।’নিয়া’ৰ আপীলৰ ভিত্তিত গুৱাহাটী উচ্চ ন্যায়ালয়ৰ এখন খণ্ড বিচাৰপীঠে যোৱা ৯ ফেব্ৰুৱাৰীত গোচৰটো পুনৰাম্ভ কৰিবলৈ নিৰ্দেশ দিছে। তথ্য-প্ৰমাণসহ ‘নিয়া’ৰ অভিযোগ প্ৰমাণ নোহোৱাত যোৱা ১ জুলাই ২০২১ তাৰিখে এই গোচৰটোৰ পৰা মোক আৰু মোৰ সতীৰ্থসকলক ‘নিয়া’ আদালতে সম্পূৰ্ণ মুক্ত কৰি দিছিল। কিন্তু চৰকাৰে মোৰ বিৰুদ্ধে পুনৰ ষড়যন্ত্ৰ আৰম্ভ কৰিলে; কাৰণ মই দৃঢ়তাৰে বিজেপি চৰকাৰ বিৰোধী অৱস্থান অব্যাহত ৰাখিলোঁ। এতিয়া মই ২৩ ফেব্ৰুৱাৰীত আদালতত হাজিৰ হ’ব লাগিব। বোধহয় সিদিনাই মই পুনৰ কাৰাগাৰলৈ যাব লাগিব।আগৰবাৰ ‘কা’বিৰোধী এই গোচৰত ১ বছৰ ৭ মাহ জে’লত আছিলো, এইবাৰ কিমান দিন জে’লত থাকিব লাগিব নাজানো। আপোনালোক আটাইৰে পৰা এই সংকটৰ সময়ত আশীৰ্বাদ বিচাৰিলোঁ।
আপোচ নকৰাই মোৰ একমাত্ৰ অপৰাধ। মোক আপোচৰ অনেক প্ৰস্তাৱ দিয়া হৈছিল; সকলোবোৰ মই দৃঢ়তাৰে নাকচ কৰিছিলো। মই জনগণ, জাতি আৰু দেশক বিশ্বাসঘাতকতা কৰিব নোৱাৰোঁ। বিশ্বাসঘাতকতা মোৰ তেজত নাই। সাম্প্ৰদায়িক ফেচিবাদীহঁতৰ সৈতে মই আপোচ কৰিব নোৱাৰো। তাতকৈ জে’লৰ জীৱনকে মই বাচি লৈছো। দৰকাৰ হ’লে ওৰে জীৱন কাৰাগাৰতে কটাম; কিন্তু জাতিক বিশ্বাসঘাটকতা নকৰোঁ।
জয় আই অসম।
ইনকিলাব জিন্দাবাদ।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
