মেক্সিকোৰ ওআক্সাকা প্ৰদেশত অৱস্থিত এল আৰবল দেল তুলে (El Árbol del Tule) নামৰ গছডাল পৃথিৱীৰ অন্যতম প্ৰাচীন আৰু বিশাল জীৱিত বৃক্ষ হিচাপে পৰিচিত। ও’আক্সাকা চহৰৰ পৰা প্ৰায় ১২ কিলোমিটাৰ দূৰত থকা ছাণ্টা মাৰিয়া ডেল টুলে নামৰ সৰু চহৰখনত অৱস্থিত এই বিশাল চাইপ্ৰেছ (Cypress) গছজোপাই প্ৰায় ২,০০০ বছৰতকৈও অধিক সময় ধৰি পৃথিৱীত জীৱিত আছে বুলি বিশেষজ্ঞসকলে অনুমান কৰে। এই গছজোপাৰ আটাইতকৈ উল্লেখযোগ্য বৈশিষ্ট্য হৈছে ইয়াৰ বিশালতা। গছডালৰ গাগছৰ ব্যাস প্ৰায় ১৪.০৬ মিটাৰ, আনহাতে ইয়াৰ পৰিধি প্ৰায় ৪৪ মিটাৰ। এই অসাধাৰণ আকাৰৰ বাবেই এল আৰ্বল ডেল টুলে বিশ্বজুৰি খ্যাতি লাভ কৰিছে।
এতিয়াও সঠিক উচ্চতা নিৰ্ধাৰণ কৰিব পৰা নাই গছডালৰ
গছডালৰ বিস্তৃত ঠাল-ঠেঙুলিৰ বাবে সঠিক উচ্চতা সহজে নিৰ্ধাৰণ কৰিব নোৱাৰি। অৱশ্যে ২০০৫ চনত লেজাৰ প্ৰযুক্তিৰ সহায়ত কৰা জোখ-মাপত এই গছডালৰ উচ্চতা প্ৰায় ৩৫.৪ মিটাৰ বুলি নিৰ্ধাৰণ কৰা হৈছিল। এল আৰ্বল ডেল টুলেক ও’আক্সাকা ৰাজ্যৰ প্ৰাকৃতিক আৰু সাংস্কৃতিক ঐতিহ্যৰ এক অমূল্য প্ৰতীক হিচাপে গণ্য কৰা হয়। Mexico Daily Postৰ তথ্য অনুসৰি, গছডালৰ আনুমানিক বয়স ২,০০০ বছৰতকৈ অধিক হোৱাৰ সম্ভাৱনা আছে, যাৰ ফলত ই পৃথিৱীৰ আটাইতকৈ পুৰণি জীৱিত জীৱসমূহৰ অন্যতম হিচাপে স্বীকৃতি লাভ কৰিছে। অঞ্চলটোৰ কিছু কিছু লোকৰ প্ৰবাদ মতে, এই গছজোপা মেক্সিকোৰ পৌৰণিক কাহিনীসমূহত থকা বায়ুৰ দেৱতা এহেকাটলৰ উপাসনা কৰা এগৰাকী পুৰোহিতে ৰোপণ কৰিছিল। বিপৰীতে আন কিছুমানে মেক্সিকোৰ এজন প্ৰাচীন শাসকে নিজৰ এডাল লাঠি এসময়ত মাটিত পুতি থৈছিল আৰু তাৰ পৰাই এই বিশাল বৃক্ষৰ জন্ম হৈছিল বুলি বিশ্বাস কৰে। স্থানীয় জাপোটেক ভাষাত এল আৰবল দেল তুলে গছডালৰ নামটোৰ অৰ্থ হৈছে ‘পোহৰৰ বৃক্ষ’।
মেক্সিকোৰ অন্যতম জনপ্ৰিয় পৰ্যটনস্থলীসমূহৰ অন্যতম
গছডাল চাবলৈ ওআক্সাকাত দৈনিক হাজাৰ হাজাৰ লোকে ভিৰ কৰে। গছডালৰ আন এটা আকৰ্ষণীয় দিশ হৈছে, গছডালৰ গাৰ অংশত বহুতো অস্বাভাৱিক আকৃতি দেখা যায়, যিবোৰে সিংহ, হাতী, হৰিণ আদি জন্তুৰ আকৃতিৰ দৰে। স্থানীয় লোক আৰু গাইডে পৰ্যটকসকলক এই প্ৰতীকসমূহৰ লগত সংগতি ৰাখি বিভিন্ন কাহিনী বৰ্ণনা কৰে।
সেইবাবেই এল আৰবল দেল তুলে কেৱল এডাল গছ নহয়, বৰঞ্চ মেক্সিকোৰ এক জীৱন্ত ঐতিহ্য, প্ৰাকৃতিক বিস্ময় আৰু অ’আক্সাকাৰ অন্যতম জনপ্ৰিয় পৰ্যটনস্থলী হিচাপে পৰিগণিত হৈছে। প্ৰকৃতিৰ অপূৰ্ব সৃষ্টিসমূহৰ ভিতৰত এল আৰবল দেল তুলে নিঃসন্দেহে এক অনন্য উদাহৰণ, যিয়ে হাজাৰ হাজাৰ বছৰৰ ইতিহাস নিজৰ বুকুত সাঁচি ৰাখি আজিও দৃঢ়ভাৱে থিয় হৈ আছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
