ৰাজা ৰঘুবংশীৰ নৃশংস হত্যাকাণ্ডৰ কেইসপ্তাহৰ পাছতেই অন্ধ্ৰপ্ৰদেশৰ কুৰ্নুলত এজন ব্যক্তিৰ মৃতদেহ উদ্ধাৰ হৈছে৷ বিয়াৰ এমাহ পাছতেই মৃতদেহ পোৱা গৈছে৷ মৃতদেহটো এটা খালৰ পৰা উদ্ধাৰ হৈছে৷ ঘটনাৰ বাবে তেওঁৰ সদ্য বিবাহিত পত্নী আৰু তেওঁৰ মাতৃক আটক কৰা হৈছে৷ তদন্ত ইতিমধ্যেই আৰম্ভ হৈছে৷ এই মৰ্মান্তিক ঘটনাই সম্প্ৰতি হানিমুন ট্ৰেজেডিক মনত পেলাই দিছে বহুজনক৷
সংবাদমাধ্যম সূত্ৰৰ খবৰ অনুসৰি ব্যক্তিগৰাকীৰ নাম তেজেশ্বৰ৷ ৩২ বছৰ বয়সীয়া তেজেশ্বৰ এগৰাকী বেচৰকাৰী ভূমি জৰিপকাৰী আৰু নৃত্য প্ৰশিক্ষক আছিল৷ ১৮ মেত তেওঁ বিয়া কৰাই৷ বিয়া কৰোৱাৰ ঠিক এমাহৰ পাছত ১৭ জুনত তেজেশ্বৰ নিখোঁজ হয়৷ তেজেশ্বৰৰ পৰিয়ালৰ অভিযোগ যে তেওঁৰ পত্নী ঐশ্বৰ্যই ষড়যন্ত্ৰ কৰি তেওঁৰ স্বামীক হত্যা কৰিছে৷ বিবাহ বহিৰ্ভূত সম্পৰ্কত থকা ঐশ্বৰ্য আৰু তেওঁৰ মাতৃ সুজাতাক আটক কৰিছে৷ সোধপোছ অব্যাহতও ৰাখিছে আৰক্ষীয়ে৷ অৱশ্যে এতিয়াও এই অভিযোগৰ কোনো প্ৰমাণ পোৱা নাই৷
ঐশ্বৰ্যৰ মাতৃ সুজাতা এগৰাকী বেংক কৰ্মকৰ্তা৷ সেই বেংকৰেই এজন কৰ্মীৰ সৈতে সম্পৰ্ক আছিল ঐশ্বৰ্যৰ বুলি দাবী তেজেশ্বৰৰ পৰিয়ালৰ৷ একেসময়তে তেজেশ্বৰৰ সৈতেও সম্পৰ্ক আছিল৷ ফেব্ৰুৱাৰীত দুয়োৰে বিবাহৰ কথা আছিল৷ কিন্তু ঐশ্বৰ্য নিখোঁজ হৈ পৰিছিল কিছুদিনৰ বাবে৷ যাৰবাবে দুয়োৰে বিবাহ স্থগিতও ৰখা হৈছিল৷ তাৰপিছতেই তেওঁ আকৌ উভতি আহে৷ তেজেশ্বৰৰ পৰিয়ালৰ অভিযোগ এই বিবাহত মন নাছিল তেজেশ্বৰৰ৷ ঐশ্বৰ্যৰ পৰিয়ালে জোৰকৈ এই বিবাহৰ বাবে সৈমান কৰাইছিল তেজেশ্বৰক৷ শেষত বিয়া কৰাই ঐশ্বৰ্য আৰু তেজেশ্বৰে৷ বিবাহৰ পাছতেই ঐশ্বৰ্য আৰু তেওঁৰ মাতৃ সুজাতাই মিলি হত্যা কৰাৰ অভিযোগ তুলিছে তেজেশ্বৰৰ পৰিয়ালে৷ এতিয়াও অৱশ্যে এই তথ্য প্ৰমাণিত হোৱা নাই৷ বৰ্তমান সমগ্ৰ ঘটনাৰ তদন্ত অব্যাহত আছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
