ডিজিটেল ডেস্কঃ সকলো কামতে অতিকৈ সক্ৰিয়তা প্ৰদৰ্শন কৰা আঙুৰলতা ডেকাই ৰাজনৈতিক ক্ষেত্ৰখনক লৈ হঠাতে গ্ৰহণ কৰিলে এটা বিশেষ সিদ্ধান্ত। ৰাজনৈতিক সকলো দায়িত্ব-কৰ্তব্য এৰি প্ৰায় ৪মাহ সময় নিজৰ লগত কটাব বিচাৰিছে বটদ্ৰৱাৰ প্ৰাক্তন বিধায়িকাগৰাকীয়ে। নিজ কন্যাক কিছু সময় দিয়াৰ উদ্দেশ্যৰে ভাৰতীয় জনতা পাৰ্টিৰ অসম প্ৰদেশৰ মহিলা মৰ্চাৰ সভানেত্ৰীৰ দৰে গধুৰ দায়িত্বৰ পৰাও অব্যাহতি ললে আঙুৰলতাই।
ৰাজ্যিক মহিলা মৰ্চাৰ সভানেত্ৰীৰ দৰে গধুৰ তথা দায়িত্বশীল পদবী এটা হঠাতে এৰাৰ সিদ্ধান্তৰ পাছতে চৰ্চা হৈছিল যে, আঙুৰলতাক এই পদবীৰ পৰা অপসাৰণহে কৰা হৈছে। কিন্তু শেহতীয়াকৈ আঙুৰলতাই সকলো কথা মুকলি কৰিছে। সকলো কথা মুকলিকৈ কলেও আঙুৰলতাই হঠাতে গ্ৰহণ কৰা এই সিদ্ধান্তৰ আঁৰত এটা ডাঙৰ ৰাজনৈতিক প্লেন থকা বুলি একাংশ ৰাজনীতিবিদে সন্দেহ প্ৰকাশ কৰিছে।
এতিয়া প্ৰশ্ন উঠিব যে, মহিলা মৰ্চাৰ সভানেত্ৰীৰ দৰে পদবী এৰা আঙুৰলতাৰ পৰৱৰ্তী প্লেন কি! প্ৰাপ্ত খবৰ অনুসৰি, পৰৱৰ্তী লোকসভা নিৰ্বাচনৰ বাবেই এই বিৰতি ঘোষণা কৰিছে আঙুৰলতাই। ইতিমধ্যে আঙুৰলতাই ঘোষণা কৰিছে যে, ২০২৪ৰ ফেব্ৰুৱাৰী মাহলৈকে তেওঁ এই বিৰতি গ্ৰহণ কৰিছে। লক্ষ্যণীয়ভাৱে, লোকসভা নিৰ্বাচন অনুষ্ঠিত হব এপ্ৰিল- মে মাহত। গতিকে সকলো দায়িত্ব এৰি বৰ্তমান একপ্ৰকাৰৰ মুকলি হৈ থকা আঙুৰলতা ডেকা ফেব্ৰুৱাৰী মাহত বিৰতি শেষ কৰিয়ে লোকসভা নিৰ্বাচনক লৈ সক্ৰিয়তা প্ৰদৰ্শন কৰিব বুলি ৰাজনৈতিক বিশ্লেষকসকলে আশংকা কৰিছে।
যদিহে লোকসভা নিৰ্বাচনৰ বাবেই আঙুৰলতাৰ এই ৰণকৌশল! তেনেহলে কোন সমষ্টিৰ পৰা আঙুৰলতাই টিকট পোৱাৰ সম্ভাৱনা আছে। চৰ্চা অনুসৰি গুৱাহাটী লোকসভা সমষ্টিৰ পৰা টিকট পোৱাৰ পূৰ্ণ সম্ভাৱনা আছে আঙুৰলতাৰ । মহিলাৰ বাবে বিজেপিয়ে একপ্ৰকাৰৰ সংৰক্ষণ কৰি ৰখা গুৱাহাটী লোকসভা সমষ্টিত নিৰ্বাচন খেলাৰ সপোন আঙুৰলতাইও বহু সময়ত ব্যক্ত কৰিছে।
যদিহে আঙুৰলতাক গুৱাহাটীত বিজেপিয়ে টিকট প্ৰদান কৰে, তেনেহলে কি হব বৰ্তমানৰ সাংসদ কুইন ওজাৰ! বৰ্তমানৰ পৰিৱেশ-পৰিস্থিতিলৈ চাই বহুখিনিলৈকে এই প্ৰশ্নৰ উত্তৰো উদ্ধাৰ কৰিছে ৰাজনৈতিক বিশ্লেষকসকলে। শেহতীয়াকৈ দেশৰ ৩ৰাজ্যৰ মুখ্যমন্ত্ৰীৰ নিৰ্বাচনৰ ক্ষেত্ৰত বিজেপিয়ে যি নীতি গ্ৰহণ কৰিলে আগন্তুক লোকসভা নিৰ্বাচনৰ টিকট প্ৰদান প্ৰক্ৰিয়াতো সেই নীতি গ্ৰহণ কৰিলে আঙুৰলতাৰ কপাল ফুলাতো একপ্ৰকাৰৰ নিশ্চিত।
নতুন নেতা সৃষ্টি কৰি পুৰণিক অন্য স্থানত সংস্থাপন কৰা বিজেপিৰ যি কৌশল সেই কৌশলৰ আধাৰতেই গুৱাহাটীত টিকট লাভ কৰিব পাৰে আঙুৰলতাই। দেশৰ ৩ৰাজ্যত মুখ্যমন্ত্ৰী নিৰ্বাচন প্ৰক্ৰিয়াতো দেখা গল যে বিজেপিয়ে নতুন নেতাক সৃষ্টি কৰি পুৰণি নেতাক অন্য স্থানত সংস্থাপনৰ যোজা কৰিছে। ভালদৰে লক্ষ্য কৰিলে দেখা যাব যে, বিজেপিয়ে ৬৫-৭০বছৰ বয়সৰ প্ৰায় নেতাক বহু গুৰুত্বপূৰ্ণ পদবীৰ পৰা অব্যাহতি প্ৰদান কৰিছে। ইয়াৰ উদাহৰণ- শিৱৰাজ সিং চৌহান, বসুন্ধৰা ৰাজে আৰু নৰেন্দ্ৰ সিং তোমৰ।
গতিকে এনে প্ৰেক্ষাপটলৈ চাই বৰ্তমান ৭৩বছৰত ভৰি থোৱা কুইন ওজাক লৈও আগন্তুক লোকসভা নিৰ্বাচনত কিছু অন্য চিন্তা কৰিব পাৰে বিজেপি নেতৃত্বই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
