জামিনত মুকলি আকাশৰ তললৈ যাৱজ্জীৱন কাৰাদণ্ড ভুগি থকা আশাৰাম বাপু, কিন্তু…
আজি ৭ জানুৱাৰী তাৰিখে মুকলি আকাশৰ তললৈ আশাৰাম বাপু। যি আশাৰাম বাপুৰ কৰ্ম কাণ্ডই চকু কপালত তুলিছিল হাজাৰ হাজাৰ অনুৰাগীৰ। যাৱজ্জীৱন কাৰাদণ্ডৰ শাস্তি ভুগি থকা আশাৰামক আজি জামিনত ৰেহাই দিয়ে।
ধৰ্ষণৰ গোচৰত যাৱজ্জীৱন কাৰাদণ্ডৰ শাস্তি পাইছিল আশাৰাম বাপুৱে। সেই আশাৰাম বাপুৱে মঙলবাৰে উচ্চতম ন্যায়ালয়ৰ পৰা ডাঙৰ সকাহ লাভ কৰে। দেশৰ উচ্চতম ন্যায়ালয়ে তেওঁক চিকিৎসাৰ দোহাই দি কাৰাগাৰৰ পৰা আহিবলৈ অনুমতি দিয়ে।
অৱশ্যে এই সময়ছোৱাত তেওঁ জামিনৰ কঠোৰ চৰ্ত মানি চলিব লাগিব। জামিনৰ সময়ত কোনো অনুগামীকে লগ কৰিব নোৱাৰে আশাৰামে। অহা ৩১ মাৰ্চলৈকে জামিনত মুকলি আকাশৰ তলত থকাৰ অনুমতি দিয়া হৈছে আশাৰামক।
কিন্তু উচ্চতম ন্যায়ালয়ৰ পৰা জামিন পোৱাৰ পিছতো জেলৰ পৰা ওলাই আহিব নোৱাৰিব আশাৰাম। কাৰণ এটা নহয় দুটা গোচৰত তেওঁক যাৱজ্জীৱন কাৰাদণ্ডৰ শাস্তি প্ৰদান কৰা হৈছিল। এনে পৰিস্থিতিত দুয়োটা গোচৰতে আদালতে জামিন মঞ্জুৰ নকৰালৈকে তেওঁ কাৰাগাৰতে থাকিব লাগিব।
যোধপুৰ আদালতত দাখিল কৰা গোচৰ অনুসৰি ২০১৩ চনত ইন্দোৰৰ আশ্ৰমৰ পৰা যোধপুৰ আৰক্ষীয়ে আশাৰামক গ্ৰেপ্তাৰ কৰিছিল। তেতিয়াৰ পৰাই আশাৰাম বাপু কাৰগাৰতে আছিল। পাঁচ বছৰীয়া দীঘলীয়া বিচাৰৰ অন্তত ২০১৮ চনৰ ২৫ এপ্ৰিলত আদালতে আশাৰামক যাৱজ্জীৱন কাৰাদণ্ডৰ শাস্তি প্ৰদান কৰিছিল।
দ্বিতীয়টো গোচৰ গুজৰাটৰ গান্ধীনগৰ আদালতৰ। গুজৰাটৰ গান্ধীনগৰৰ আশ্ৰমৰ এগৰাকী মহিলাই আশাৰামৰ বিৰুদ্ধে ধৰ্ষণৰ গোচৰ ৰুজু কৰিছিল। ২০২৩ চনৰ ৩১ জানুৱাৰীত আদালতে এই গোচৰত আশাৰামক যাৱজ্জীৱন কাৰাদণ্ডৰ শাস্তি প্ৰদান কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
