গাড়ীৰে চাৰি প্ৰতিবাদী কৃষকক মহতিয়াই হত্যা কৰাৰ অভিযোগত গ্ৰেপ্তাৰ হোৱা কেন্দ্ৰীয় গৃহ ৰাজ্যমন্ত্ৰী অজয় কুমাৰ মিশ্ৰৰ পুত্ৰ আশীষ মিশ্ৰই জামিন লাভ কৰিছে৷
বৃহস্পতিবাৰে এলাহাবাদ উচ্চ ন্যায়ালয়ৰ লক্ষ্ণৌ বিচাৰপীঠে কৃষকক গাড়ীৰে মহতিয়াই হত্যা কৰা ঘটনাৰ মূল অভিযুক্ত আশীষ মিশ্ৰক জামিন প্ৰদান কৰিছে৷
উল্লেখ্য যে বিগত বৰ্ষৰ ৩ অক্টোবৰত লখিমপুৰৰ খেৰিত কৃষি আইন বিৰোধী চাৰি প্ৰতিবাদী কৃষকক গাড়ীৰে মহতিয়াই হত্যা কৰ হৈছিল৷ ইয়াৰ পিছতে এই ঘটনাৰ মূল অভিযুক্ত হিচাপে কেন্দ্ৰীয় গৃহ ৰাজ্য মন্ত্ৰী অজয় কুমাৰ মিশ্ৰৰ পুত্ৰ আশীষ মিশ্ৰক চিহ্ণিত কৰা হৈছিল৷
প্ৰথমাৱস্থাত যোগী চৰকাৰৰ আৰক্ষীয়ে মন্ত্ৰীপুত্ৰ আশীষ মিশ্ৰৰ বিৰুদ্ধে ব্যৱস্থাত গ্ৰহণ কৰিবলৈ থেৰোগেঁৰো কৰিলেও প্ৰৱল প্ৰতিবাদত হেও মনাৰ লগতে উত্তৰ প্ৰদেশ নিৰ্বাচনত মুখ থেকেচা খোৱাৰ শংকাত মুখ্যমন্ত্ৰী যোগী আদিত্যনাথে অৱশেষত ঘটনাটো তদন্তৰ বাবে উত্তৰ প্ৰদেশ আৰক্ষীৰ বিশেষ তদন্তকাৰী দলক দায়িত্ব অৰ্পণ কৰে৷
ইয়াৰ পিছতে তদন্তকাৰী দলে যোৱা ৯ অক্টোবৰত মূল অভিযুক্ত মন্ত্ৰীপুত্ৰ আশীষ মিশ্ৰক গ্ৰেপ্তাৰ কৰে আৰু তাৰ কিছুদিন পিছতে আশীষ মিশ্ৰৰ মাৰণাস্ত্ৰও উদ্ধাৰ কৰে৷
বিশেষ তদন্তকাৰী দলৰ তদন্তত প্ৰকাশ পাইছে যে উক্ত ঘটনাটো পূৰ্ব পৰিকল্পিত আছিল আৰু মন্ত্ৰীপুত্ৰই প্ৰতিবাদী কৃষকৰ বিৰুদ্ধে গুলীচালনা কৰাৰো অভিযোগ উঠিছে৷
ইফালে বিশেষ তদন্তকাৰী দলৰ তদন্তৰ লেহেমীয়া হোৱাৰ বাবে উত্তৰ প্ৰদেশ আৰক্ষীয়ে উচ্চতম ন্যায়ালয়ৰো কৰ্কথনা খাইছিল৷ বিগত বৰ্ষৰ ২০ অক্টোবৰত সৰ্বোচ্চ ন্যায়ালয়ৰ মুখ্য ন্যায়াধীশ এন ভি ৰমন আৰু ন্যায়াধীশ সূৰ্য কান্তৰ বিচাৰপীঠে তদন্তকাৰী আৰক্ষীয়ে হাজাৰ হাজাৰ কৃষকৰ মাজৰ পৰা মাত্ৰ ২৩ গৰাকী সাক্ষী যোগাৰ কৰাৰ বাবে উত্তৰ প্ৰদেশ আৰক্ষীক কৰ্কথনা কৰিছিল৷
ইয়াৰ পিছতে যোৱা নৱেম্বৰত আৰক্ষীৰ বিশেষ তদন্তকাৰী দলে আদালতত তদন্তৰ প্ৰতিবেদন জমা দিয়ে৷ উক্ত প্ৰতিবেদনত কোৱা হৈছে যে উক্ত ঘটনাটো কোনো দুৰ্ঘটনা নাছিল৷ বৰং পৰিকল্পনা অনুসৰিয়ে হত্যাকাণ্ডটো সংঘটিত কৰা হৈছিল৷ তদন্তকাৰী দলে চালকসহ মন্ত্ৰীপুত্ৰৰ লগতে তিনিজনক ঘটনাটোৰ মূল অভিযুক্ত হিচাপে চিহ্নিত কৰিছিল৷
ইয়াৰ পিছতো উত্তৰ প্ৰদেশ বিধানসভাৰ নিৰ্বাচন আৰম্ভ হোৱাৰ দিনাই মূল অভিযুক্ত মন্ত্ৰীপুত্ৰ আশীষ মিশ্ৰক এলাহাবাদ উচ্চ ন্যায়ালয়ে জামিন প্ৰদান কৰাত বিভিন্ন মহলত প্ৰশ্ন উত্থাপন হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
