সমগ্ৰ ৰাজ্যজুৰি জোকাৰণি তোলা নগাঁৱৰ বিতৰ্কিত এনকাউণ্টাৰক লৈ ৰাজ্য চৰকাৰ তৎপৰ হোৱা দেখা গৈছে৷
মুখ্যমন্ত্ৰীয়ে দোষী আৰক্ষী বিষয়াই হাৰি নাযায় বুলি সংবাদ মাধ্যমৰ আগত ঘোষণা কৰাৰ পিছতে ৰাজ্য চৰকাৰে বিশেষ তৎপৰল হোৱা পৰিলক্ষিত হৈছে৷
বুধবাৰে ভুক্তভোগী যুৱক কীৰ্তিকমল বৰাৰ পিতৃৰ এজাহাৰৰ ভিত্তিত নগাঁও আৰক্ষীয়ে অভিযুক্ত আৰক্ষী বিষয়া প্ৰদীপ বনীয়াৰ বিৰুদ্ধে জামিন বিহীন গোচৰ ৰুজু কৰাৰ পিছতে অসম চৰকাৰৰ অতিৰিক্ত মুখ্য সচিবে ৰাজহুৱা শুনানি গ্ৰহণ কৰিব বুলিও চৰকাৰে প্ৰকাশ কৰিছে৷
বুধবাৰে নগাঁও জিলা উপায়ুক্তই প্ৰকাশ কৰা অসম চৰকাৰৰ এক জাননী অনুসৰি অসম চৰকাৰৰ অতিৰিক্ত মুখ্য সচিব পৱন কুমাৰ বৰঠাকুৰে অহা ২৮ জানুৱাৰীত ৰাজহুৱা শুনানি গ্ৰহণ কৰাৰ কথা৷
জাননীৰ যোগেদি নগাঁৱৰ আৱৰ্ত্ত ভৱনত ২৮ জানুৱাৰীৰ বিয়লি ২ বজাৰ পৰা ৪ বজালৈ গ্ৰহণ কৰিবলগীয়া শুনানিত অংশগ্ৰহণ কৰি উক্ত ঘটনাৰ প্ৰত্যক্ষদৰ্শী সকলক সাক্ষ্য প্ৰদান কৰিবলৈ অনুৰোধ জনোৱা হৈছে।
উল্লেখ্য যে যোৱা ২২ জানুৱাৰীত নগাঁৱত আৰক্ষী বিভাগৰ এণ্টি নাৰ্কটিক স্কোৱাডৰ দ্বাৰা কীৰ্তিকমল বৰা নামৰ এজন যুৱক ভুৱা এনকাউণ্টাৰৰ বলি হোৱাৰ পিছতে সমগ্ৰ ৰাজ্যতে তীব্ৰ প্ৰতিক্ৰিয়াৰ সৃষ্টি হৈছিল।
এই কাণ্ডৰ পিছতে নগাঁও আৰক্ষীৰ বিৰুদ্ধে প্ৰতিবাদত নামি পৰিছিল দল সংগঠনৰ লগতে স্থানীয় ৰাইজ। নগাঁৱৰ আৰক্ষী অধীক্ষক আনন্দ মিশ্ৰৰ নিলম্বনৰ দাবী উত্থাপন হৈছে।
ইয়াৰ পিছতে ৰাজ্য চৰকাৰে ঘটনাটোকলৈ বিশেষ তৎপৰতা প্ৰদৰ্শন কৰা পৰিলক্ষিত হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
