অসম লাইভ ২৪ঃ আজি ৩০ অক্টোবৰ৷ অসমবাসীৰ বাবে অভিশপ্ত ৩০ অক্টোবৰ, এটি ক’লা দিন৷ ২০০৮ চনৰ আজিৰ দিনটোতে সংঘটিত হোৱা ধাৰাবাহিক বোমা বিষ্ফোৰণত নিহত নিৰীহৰ স্মৃতিয়ে আজিও শোকস্তব্ধ কৰি তোলে ৰাজ্যবাসীক৷ এই হত্যালীলাৰ স্মৃতিয়ে আজিও শোকৰ উদ্ৰেক সৃষ্টি কৰে ভুক্তভোগীৰ পৰিয়ালত৷ ২০০৮ চনৰ ৩০ অক্টোবৰত বিদ্ৰোহী সংগঠন এন ডি এফ বিয়ে পুৱা গুৱাহাটীৰ গনেশগুৰি, পাণবজাৰ আৰু কাছাৰীসহ কেইবাটাও স্থানত সংঘটিত কৰিছিল ধাৰাবাহিক বোমা বিষ্ফোৰণ৷ এই নিৰ্বিচাৰ হত্যালীলাত প্ৰাণ হেৰুৱাইছিল শিশুসহ ৯০ গৰাকীতকৈও অধিক লোকে৷ এই অভিশপ্ত দিনটোৱে আজি ১৩ বছৰ সম্পূৰ্ণ কৰিলে৷ কিন্তু আজিও উচিত শাস্তিৰ নাপালে দোষীয়ে৷ উল্লেখ্য, এই ধাৰাবাহিক বোমা বিষ্ফোৰণৰ সৈতে জড়িত এন ডি এফ বি ৰঞ্জন দৈমাৰী গোটৰ ১৫ জনক ২০১৮ চনত দোষী সাব্যস্ত কৰিছিল৷ দুখনকৈ চাৰ্জশ্বীট দাখিল কৰিছিল চিবিআই য়ে৷ চাৰ্জশ্বীটত আছিল ২২ জনৰ নাম৷ তাৰে ৭ জন পলাতক আছিল৷ গতিকে উপস্থিত থকা ১৫ জনক দোষী সাব্যস্ত কৰিছিল আদালতে৷ কিন্তু সেই দিন আজিও পাহৰিব পৰা নাই অসমবাসীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
