অসম লাইভ২৪ঃ অসমত এয়া কেনেকৈ হ’ব পাৰে। অসমত স্বাস্থ্যকেন্দ্ৰৰ উন্নয়নৰ কথা চৌদিশে প্ৰচাৰ হৈ থকাৰ সময়তে আহিছে ভয়ংকৰ খবৰ। স্বাস্থ্য খণ্ডৰ এই ছবি ভাইৰেল হৈ পৰাৰ পাছতেই সচেতন লোকৰ মত, এয়া সঁচাকৈয়ে পুতৌজনক।
প্ৰসূতিৰ মৃত্যুৰ ক্ষেত্ৰত দেশৰ ভিতৰতে প্ৰথম স্থান লাভ কৰিছে অসমে। দেশৰ মহাপঞ্জীয়কৰ কাৰ্যালয়ে ২০১৮-২০২০ বৰ্ষৰ বাবে মুকলি কৰা এক প্ৰতিবেদনত প্ৰসূতিৰ মৃত্যুৰ ক্ষেত্ৰত দেশৰ শীৰ্ষ স্থান দখল কৰিছে অসম।
উল্লেখ্য যে, ২০১৮-২০ বৰ্ষত অসমত প্ৰসূতি মৃত্যুৰ অনুপাত ১৯৫। যিটো ৰাষ্ট্ৰীয় অনুপাতৰ তুলনাত দুগুণতকৈও অধিক। প্ৰসুতিৰ মৃত্যুৰ ৰাষ্ট্ৰীয় অনুপাত হৈছে ৯৭। আনহাতে, অসমৰ পিছতে স্থান লাভ কৰিছে মধ্যপ্ৰদেশে (১৭৩), উত্তৰ প্ৰদেশ (১৬৭) আছে তিনি নম্বৰত, তাৰপাছতেই ছত্তীশগড় (১৩৭), ওড়িশা (১১৯), বিহাৰ (১১৮), ৰাজস্থান (১১৩), হাৰিয়ান (১১০), পঞ্জাৱ (১০৫), পশ্চিমবংগ (১০৩)। এই ৰাজ্য কেইখনতে প্ৰসূতি মৃত্যুৰ অনুপাতে শতকৰ ঘৰ স্পৰ্শ কৰাৰ বিপৰীতে আন সকলো ৰাজ্যত এই অনুপাত দশকৰ ঘৰতে সীমাবদ্ধ হোৱা দেখা গৈছে। দেশৰ ভিতৰতে আটাইতকৈ কম প্ৰসূতি মৃত্যুৰ স্বীকৃতি লাভ কৰিবলৈ সক্ষম হৈছে কেৰালাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
