অসম লাইভ২৪ঃ উত্তৰপ্ৰদেশৰ প্ৰয়াগৰাজত আৰক্ষীৰ সন্মুখতেই আততায়ীয়ে গুলীয়াই হত্যা কৰে ‘গেংষ্টাৰ’ আতিক আহমেদ আৰু তেওঁৰ ভাতৃ আছৰফক। যোগী চৰকাৰে এই ঘটনাৰ বাবে বিভাগীয় তদন্ত ঘোষণা কৰিছে। প্ৰয়াগৰাজসহ উত্তৰপ্ৰদেশৰ সকলো জিলাতেই জাৰি কৰা হৈছে ১৪৪ ধাৰা। শনিবাৰে নিশা আতিক আৰু আছৰফক মেডিকেল পৰীক্ষা কৰাবৰ বাবে হাস্পতাললৈ লৈ গৈছিল আৰক্ষীয়ে। হাস্পতাললৈ সোমোৱাৰ সময়তে খোজকাঢ়ি যাওতে আতিক আৰু আছৰফক সাংবাদিকে প্ৰশ্নও কৰি আছিল। তেনেতেই হঠাতেই আতিকৰ মূৰত গুলী লাগে। লগে লগেই বাগৰি পৰে আতিক।
তাৰপাছতেই আছৰফকো ঘেৰি ধৰি গুলী চলাই দুষ্কৃতিকাৰীয়ে। থিতাতেই মৃত্যু হৈছে আতিক আৰু আছৰফৰ। আৰক্ষীয়ে ইতিমধ্যে তিনিগৰাকী দুষ্কৃতিকাৰীক আটক কৰিছে। ঘটনাস্থলীৰ পৰা পিষ্টলো উদ্ধাৰ কৰিছে আৰক্ষীয়ে। আৰক্ষীয়ে সন্দেহ কৰা অনুসৰি সাংবাদিকৰ ছদ্মবেশত আহিছিল দুষ্কৃতিকাৰী। আতিক আৰু আছৰফক হত্যা কৰাৰ পাছতেই ঘটনাস্থলীতেই ৰৈ আছিল তিনি হত্যাকাৰী।
শনিবাৰে পুত্ৰৰ শেষকৃতত উপস্থিত থকাৰ কথা জনাই কাৰাগাৰ কৰ্তৃপক্ষক এক আৱেদনো কৰিছিল আতিকে। কিন্তু অধিবক্তা মনীষ খান্নাই পিটিআইক জনোৱা অনুসৰি ১৪ এপ্ৰিল অম্বেদকাৰ জয়ন্তী উপলক্ষে ছুটি থকাৰ বাবে আতিকৰ আৱেদন মেজিষ্ট্ৰেটৰ কাষলৈ পঠিওৱা হয়। শনিবাৰে সেই আৱেদন মুখ্য বিচাৰবিভাগীয় মেজিষ্ট্ৰেটৰ কাষলৈ পঠিওৱা হয়। কিন্তু ইয়াৰ পূৰ্বেই আছাদৰ শেষকৃত সম্পন্ন হৈ যায়। আছাদ আছিল আতিকৰ তৃতীয় পুত্ৰ। উমেশ পাল হত্যাৰ অন্যতম অভিযুক্ত আছাদ আৰু তেওঁৰ সংগী গোলামৰ উত্তৰপ্ৰদেশ আৰক্ষীৰ এনকাউণ্টাৰত মৃত্যু হৈছে।
আনহাতে প্ৰয়াগৰাজৰ এই ঘটনাৰ পাছতেই উত্তৰপ্ৰদেশৰ আইনশৃংখলা পৰিস্থিতিক লৈ প্ৰশ্ন উত্থাপিত হৈছে। আতিকৰ দৰে গেংষ্টাৰক হাস্পতাললৈ মেডিকেল কৰাবলৈ নিওতে কিয় কটকটীয়া নিৰাপত্তা দিয়া হোৱা নাছিল বুলি প্ৰশ্ন কৰিছে সমাজবাদী পাৰ্টীৰ প্ৰধান অখিলেখ যাদৱেও। টুইটত অখিলেশ যাদৱে লিখিছে, ‘উত্তৰপ্ৰদেশৰ সাধাৰণ মানুহৰ নিৰাপত্তা ক’ত? মানুহৰ মাজত ভয়ৰ বাতাবৰণে দেখা দিছে। মোৰ মনে কৈছে, জানি বুজিয়েই এচামে এইধৰণৰ বাতাবৰণ সৃষ্টি কৰিছে।’
উল্লেখ্য যে গেংষ্টাৰ হোৱাৰ পাছত সমাজবাদী পাৰ্টীৰ সাংসদ হিচাপে আছিল আতিক। উত্তৰপ্ৰদেশৰ বিভিন্ন থানাত আতিকৰ বিৰুদ্ধে আছিল বহু গোচৰো। ২০০৫ চনত বি এছ পি বিধায়ক ৰাজু পালৰ হত্যাতো নাম সাঙোৰ খাইছিল আতিকৰ। ফেব্ৰুৱাৰীত ৰাজু খানৰ হত্যাৰ প্ৰত্যক্ষদৰ্শী উমেশ পালৰো হত্যকাণ্ডৰ মূল নায়ক আছিল আতিক।
বিগত বৃহস্পতিবাৰে আতিকৰ পুত্ৰ আছাদ আৰু তেওঁৰ সংগী গোলাম আৰক্ষীৰ এনকাউণ্টাৰত নিহত হৈছে। আছাদৰ মৃত্যুৰ পাছতেই আতিকক গুজৰাটৰ সাবৰমতী কাৰাগাৰৰ পৰা প্ৰয়াগৰাজ, প্ৰয়াগৰাজৰ পৰা সাৱৰমতীলৈ বদলী কৰা হৈছিল। আৰক্ষী সূত্ৰই দাবী কৰা অনুযায়ী পিতৃ আতিকক সাবৰমতীলৈ লৈ যোৱাৰ সময়ত আতিকক লৈ যোৱা কনভয়ত হামলা কৰাৰ পৰিকল্পনা কৰিছিল আছাদৰ গেঙে। ফলত কঠোৰ হৈ পৰিবলৈ বাধ্য হৈছিল আৰক্ষী বিভাগ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
