কেজৰীৱালৰ আসনৰ বহিত আতিশি৷ নতুন মুখ্যমন্ত্ৰী লাভ কৰিব দিল্লীয়ে৷ এই মুহূৰ্তলৈকে শিক্ষা দপ্তৰৰ দায়িত্বত আছিল তেওঁ৷ অৰবিন্দ কেজৰিৱালৰ পদত্যাগ ঘোষণা কৰাৰ পাছতেই মুখ্যমন্ত্ৰীৰ দৌৰত আগুৱাই আছে আপ নেত্ৰী আতিশি৷
কেজৰিৱালক কিয় গুৰু বুলি কয় অতিশিয়ে?
দিল্লীয়ে তৃতীয়বাৰৰ বাবে মহিলা মুখ্যমন্ত্ৰী হ’ব অতিশি৷ তেওঁক অৰবিন্দ কেজৰিৱালৰ কিচ্চেন কেবিনেটৰ বিশ্বস্ত সৈনিক বুলি কোৱা হয়৷ মঙলবাৰে দায়িত্ব গ্ৰহণ কৰি অৰবিন্দ কেজৰিৱালক নিজৰ গুৰু বুলি উল্লেখ কৰিছে অতিশিয়ে৷ সংবাদমেলত অতিশিয়ে কয়, ‘চৰকাৰ ভাঙিবলৈ চক্ৰান্ত কৰি কেজৰিৱালৰ বিৰুদ্ধে ভুৱা গোচৰ কৰা হৈছিল৷ দিল্লীত কেৱলমাত্ৰ এজনেই শক্তিশালী মুখ্যমন্ত্ৰী আছিল, তেৱেই অৰবিন্দ কেজৰিৱাল৷ তেওঁক দিল্লীৰ আসনত বহুৱাবলৈ আমি কেইবামাহ ধৰি যুঁজ চলাইছো৷ যুঁজ চলাই যাম৷’ দিল্লী কেবিনেটৰ একমাত্ৰ মহিলা মন্ত্ৰী অতিশিৰ কান্ধত এইবাৰ গুৰুদায়িত্ব৷ এই দায়িত্ব তেওঁ নিজৰ গুৰুৰ পৰামৰ্শ আৰু তত্ত্বাবধানত কৰিব বুলি জনাইছে অতিশিয়ে৷ তেওঁ লগতে কয়, ‘মই যদি অন্য কোনো পাৰ্টীত থাকিলোহেতেন তেন্তে মোক হয়তো নিৰ্বাচন খেলিবলৈ টিকটেই দিয়া নহ’লহেতেন৷ কিন্তু কেজৰিৱালে মোৰ ওপৰত ভৰসা কৰিছে৷’
অতিশিৰ ওপৰতেই ভৰসা আপৰ
অক্সফোৰ্ড বিশ্ববিদ্যালয়ৰ প্ৰাক্তনী অতিশি কালকাজি সমষ্টিৰ বিধায়ক৷ দিল্লীৰ আৱকাৰী দুৰ্নীতিৰ গোচৰত মনীশ চিছোডিয়াক গ্ৰেপ্তাৰৰ পাছত তেওঁ মন্ত্ৰিত্ব লাভ কৰে৷ কেজৰিৱাল কাৰাবন্দী হৈ থকাৰ সময়ত তেওঁৰ ভূমিকাও গুৰুত্বপূৰ্ণ আছিল৷ বিগত ১৫ আগষ্টত স্বাধীনতা দিৱসৰ পতাকা উত্তোলনৰ বাবে কেজৰিৱালে অতিশিকেই দায়িত্ব দিছিল৷ আপ নেতৃত্বই অতিশিৰ ওপৰত ভৰসা কিমান কৰে সেই কথা তেওঁক এই দায়িত্ব দিয়াতেই বুজিব পাৰি৷ ২০১৯ চনৰ দিল্লীৰ বিধানসভা নিৰ্বাচনত প্ৰথম ভোট যুদ্ধত নামিছিল অতিশি৷ কিন্তু সেইবাৰ বিজেপি প্ৰাৰ্থী গৌতম গম্ভীৰৰ হাতত ৪লাখ ৭৭ হাজাৰ ভোটত পৰাস্ত হয় অতিশি৷ তাৰপাছতেই ২০২০ চনত তেওঁ কালাকাজিত পুনৰ নিৰ্বাচন খেলে৷ ২০২৩ চনত প্ৰথমবাৰ কেজৰিৱালে কেবিনেটৰ সদস্য হিচাপে বাচি লয় অতিশিক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
