জীৱনৰ অন্তিমটো ভিডিঅ’ত অতুলে ট্ৰাম্প-মাস্কক টেগ কৰি কৈ গ’ল দেশত পুৰুষৰ লগত হৈ থকা অন্যায়ৰ কথা
এজন লোকৰ এটা ভিডিঅ’ই এতিয়া সমগ্ৰ দেশৰ লগতে বিশ্বতো তোলপাৰ লগাইছে। ভাৰতত কিদৰে আইনৰ সহায় লৈ মহিলাই পুৰুষৰ ওপৰত মিছা অপবাদ দিব পাৰে সেই অভিযোগো কৰি গ’ল এগৰাকী যুৱকে। নাম অতুল। সেই অতুলৰ জীৱনৰ অন্তিমটো ভিডিঅ’ই এতিয়া খলকনি তুলিছে সকলোফালে।
পেছাত ইঞ্জিনিয়াৰ আছিল অতুল সুভাষ। বিহাৰৰ সমস্তীপুৰৰ অনুলে কামৰ বাবে বাংগালুৰুত বাস কৰিছিল। সেই অতুলৰ মেট্ৰিমনিয়েল চাইটৰ জৰিয়তে লগ পাইছিল উত্তৰ প্ৰদেশৰ নিকিতা সিংঘানিয়া। ২০১৯ চনত দুয়ো পৰিয়ালৰ সন্মতিত বিবাহত সোমাইছিল। কিন্তু বিয়াৰ পাছৰে পৰা দুয়োৰে মাজত মনোমালিন্য। দুয়োৰে সংসাৰলৈ এটি পুত্ৰ সন্তানো আহে। কিন্তু দুয়োৰে মাজত একো ঠিক নহয়।
পাছত পত্নী নিকিতাই কনমানি সন্তানক লৈ মাতৃৰ ঘৰলৈ উভতি যায়। ন্যায়ালয়ৰো কাষ চাপে নিকিতা। ন্যায়ালয়েও নিকিতাৰ কথাত পতিয়ন গৈ অতুলৰ বিৰুদ্ধে থিয় হয়। পৰিণতিত অতুলে মাহে নিজৰ উপাৰ্জনৰ সৰহ সংখ্যক ধন পত্নীৰ হাতত দিব লগা হয়। মানসিক ভাৱে ভাগি পৰে অতুল। কিন্তু কোনেও নুশুনে অতুলৰ কথা। জিলা ন্যায়লয়ৰ সিদ্ধান্তত অসন্তুষ্ট হৈ ন্যায় বিচাৰি উচ্চ-ন্যায়লয়ৰো কাষ চাপে। কিন্তু কাম আগনাবাঢ়ে।
ইফালে মানসিক অত্যাচাৰ বৃদ্ধি পাই গৈ থাকে অতুলৰ বাবে। আনকি শেষলৈ পত্নীয়ে কনমানি সন্তানকো দেখা-সাক্ষাতৰ পৰা আতৰত ৰাখে পিতৃ অনুলক। শেষত সহিব নোৱাৰা হৈ অতুলে গ্ৰহণ কৰে চৰম সিদ্ধান্ত। লগতে সামাজিক মাধ্যমত সদৰি কৰে ৪০ পাতৰ আত্মহত্যা টোকা আৰু ভিডিঅ’। যি ভিডিঅ’ত অতুলে নিজৰ লগত হোৱা অত্যাচাৰৰ সমস্ত অভিযোগ পত্নী, পত্নীৰ পৰিয়াল আৰু জিলা ন্যায়ালয়ৰ ন্যায়াধিশৰ ওপৰত দিয়ে।
কেৱল ইমানেই নহয়, সেই ভিডিঅ’ আপলোড কৰি ডোনাল্ড ট্ৰাম্প আৰু ইলন মাস্কক টেগ কৰি লিখে- ভাৰতত অলপ সজাগতা আনক, ভাৰতত পুৰুষৰ ওপৰত বহু মানসিক অত্যাচাৰ হৈ আছে। ইয়াত কেৱল মহিলাৰ কথা শুনা হয়। পুৰুষ নিৰ্দোষী হলেও ইয়াক কোনেও পুৰুষৰ কথা নুশুনে। ভাৰতত পুৰুষৰ নৰসংহাৰ হৈ আছে।’
যাৰ বাবে এতিয়া অতুলৰ ঘটনাই সমগ্ৰ দেশতে তোলপাৰ লগাইছে। অতুলৰ দুখৰ কাহিনীয়ে সকলোকে আবেগিক কৰি তুলিছে। অতুলৰ পৰিয়ালেও ন্যায়ৰ বাবে হাহাকাৰ কৰিছে। পৰিয়ালৰ এতিয়া এটাই আশা- জীয়াই থাকোতে ন্যায় নোপোৱা অতুলে মৃত্যুৰ পাছত ন্যায় লাভ কৰে নে নকৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
