দেওবাৰৰ পৰা সোমবাৰলৈ শতাধিক লোকে প্ৰাণ হেৰুৱালে বাংলাদেশত৷ দেওবাৰেই বাংলাদেশত মৃত্যুক সাবটি লৈছে ১১৪ গৰাকী প্ৰতিবাদকাৰীয়ে৷ তাৰপাছতেই সোমবাৰে প্ৰায় ১০৯গৰাকী লোকে প্ৰাণ হেৰুৱাইছে৷ এই বিচ্ছৃংখল আৰু উত্তাল পৰিস্থিতিৰ মাজত মঙলবাৰৰ পৰা সম্পূৰ্ণ শিথিল হৈ গৈছিল কাৰ্ফিউ৷ অথচ বাংলাদেশৰ সংবাদমাধ্যম ‘প্ৰথম আলোত’ প্ৰকাশ পোৱা অনুসৰি ঢাকাৰ ৰাস্তাত মঙলবাৰে পুৱা দেখা গৈছে আৰক্ষীৰ নিৰ্লিপ্ততা৷ কাৰ্ফিউ শিথিল হোৱাৰ পাছতেই ৰাস্তাত দেখা গৈছে সাধাৰণ মানুহৰ ভিৰ৷
আৰক্ষীৰ উপস্থিতিৰ সলনি ঢাকা চহৰত এতিয়া ছাত্ৰ আৰু যুৱকসকলে ৰাস্তাত নামি ট্ৰেফিক কণ্ট্ৰল কৰা দেখা গৈছে৷ ঢাকা ট্ৰিবিউনে প্ৰকাশিত তথ্য অনুসৰি নিজৰ নিৰাপত্তাৰ দাবীত কৰ্মবিৰতি ঘোষণা কৰিছে সেই দেশৰ আৰক্ষী সংগঠনে৷ মঙলবাৰে বিয়লী অৰ্থাৎ কিছু সময় পূৰ্বে নিজৰ দাবীসমূহৰ এখন প্ৰেছ বিজ্ঞাপ্তি প্ৰকাশ কৰিছে সেই সংগঠনে৷ সূত্ৰৰ খবৰ অনুসৰি সাম্প্ৰতিক অশান্তিতেই আৰক্ষী কৰ্মীসকলৰ প্ৰাণ হেৰুওৱা, ক্ষতিপূৰণ ইত্যাদিৰ মুঠ ৯দফীয়া দাবীৰে কৰ্মবিৰতি ঘোষণা কৰিছে৷ শ্বেখ হাছিনাই বাংলাদেশৰ পৰা পলায়ন কৰাৰ পাছতেই একপ্ৰকাৰ বিচ্ছৃংখল পৰিবেশ তৈয়াৰ হৈছে বাংলাদেশত৷ ঢাকাসহ বাংলাদেশৰ বিভিন্ন স্থানত থানাসমূহতো আক্ৰমণ চলিছে৷ অগ্নিসংযোগো কৰা হৈছে৷
মিৰপুৰ মডেল থানা, বাড্ডা থানা, মহম্মদপুৰ, যাত্ৰাবাড়ী, ভাটাৰাসহ ঢাকা চহৰৰ একাধিক থানাত সোমবাৰে নিশা আক্ৰমণ চলিছে৷ মঙলবাৰে পুৱাৰ পৰাই ঢাকা চহৰৰ কিছু থানাৰ ভৱন কাৰ্যত জনমানৱশূন্য হৈ পৰিছে৷ সোমবাৰ পৰ্যন্ত য’ত আৰক্ষীয়ে গিজগিজাই আছিল সেই থানা এতিয়া পুৰি যোৱা ভৱনহে একোটা৷ কেৱল ঢাকাতেই নহয় আৰু বাংলাদেশৰ আৰু একাধিক জিলাত থানা ভাঙিচিঙি পেলোৱা হৈছে৷ অগ্নিসংযোগৰ ঘটনাও সেই স্থানত ঘটিছে৷
ঢাকা ট্ৰিবিউনত প্ৰকাশিত প্ৰতিবেদন অনুযায়ী আৰক্ষীকৰ্মী সংগঠনে জনোৱা অনুসৰি অন্তত ৪৫০ থানাত আক্ৰমণ চলিছে৷ এই অৱস্থাত নিজৰ নিৰাপত্তাৰ দাবীত মঙলবাৰৰ পৰা অনিৰ্দিষ্ট কালৰ বাবে কৰ্মবিৰতি আৰম্ভ কৰিছে আৰক্ষীকৰ্মী আৰু সংগঠনসমূহে৷ এই বিষয়ে কেইবাগৰাকীও আৰক্ষী কৰ্মীৰ সৈতে ঢাকা ট্ৰিবিউনে যোগাযোগ কৰিলেও তেওঁলোকে অন্যান্য কোনো মন্তব্য নকৰিলে৷ আৰক্ষীয়ে লিষ্ট আকাৰে দাঙি ধৰা দাবীকেইটাই তেওঁলোকৰ প্ৰধান বিষয় বুলি জনাই আৰক্ষী অধিকাৰীসকলে৷
আৰক্ষীৰ ৯ দাবী
১. আৰক্ষীকৰ্মীক হত্যা কৰাসকলৰ ওপৰত দৃষ্টান্তমূলক শাস্তি
২. নিহতৰ পৰিয়ালক ক্ষতিপূৰণ আৰু পৰিয়ালৰ এজনক সমপৰ্যায়ত নিয়োগ
৩. আহত পুলিছকৰ্মীৰ চিকিৎসা আৰু ক্ষতিপুৰণ
৪. ৮ ঘণ্টাৰ বেছি কাম হ’লে অভাৰ ডিউটিৰ সুবিধা
৫. শুক্ৰ, শনি আৰু চৰকাৰী ছুটীৰ সুবিধা কিংবা অতিৰিক্ত আৰ্থিক সুবিধা
৬. ঊৰ্ধতন কৰ্তৃপক্ষৰ নিৰ্দেশৰ ক্ষেত্ৰত সংবিধান আৰু জনগণৰ ইচ্ছাক প্ৰাধান্য দিয়া
৭. আৰক্ষীৰ সদৰ কাৰ্যালয়ৰ পৰা আৰম্ভ কৰি প্ৰত্যেক থানা ঘৰত নিৰাপত্তা
৮. বৈষম্যহীন পদোন্নতি আৰু বদলিত নিকটবৰ্তী জিলাক গুৰুত্ব দিয়া৷
৯. আৰক্ষীয়ে যাতে দ্ৰুত সিদ্ধান্ত ল’ব পাৰে তাৰবাবে আৰক্ষী সংস্কাৰ আইন প্ৰণয়ন
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
