অসম লাইভ২৪ঃ বিবিচিৰ তথ্যচিত্ৰ ,‘দ্যা মোদী কোৱেশ্বন’ কৈ দেশজুৰি সৃষ্টি হৈছে আলোড়নৰ৷ ব্ৰিটেইনৰ সংবাদমাধ্যতে এই বিতৰ্কিত তথ্যচিত্ৰ যাতে কোনোকাৰণতে সাধাৰণ মানুহৰ কাষ নাপায়গৈ তাৰ বাবে কেন্দ্ৰীয় চৰকাৰে পৰোপকাৰেই চেষ্টা কৰিছে৷ কিন্তু এয়াই প্ৰথম নহয়৷ ইয়াৰ পূৰ্বেও বহুকেইখন এনে ডকুমেণ্টৰী প্ৰকাশ হৈছে৷ যি সমূহ ডকুমেণ্টৰীয়ে মুক্তিৰ লগে লগেই সোমাই পৰিছিল বিতৰ্কত৷ এনে ৫ টা ডকুমেণ্টৰীৰ ভিতৰত শীৰ্ষতেই আছে-
ফাইনেল চল্যুছনঃ বিবিচিৰ ‘দ্যা মোদী কোৱেশ্বন’ ৰ পূৰ্বে গুজৰাটৰ দাঙ্গাক লৈ এখন ডকুমেণ্টৰী তৈয়াৰ কৰিছিল ৰাকেশ শৰ্মাই৷ নাম দিছিল ফাইনেল চল্যুছন৷ সেই তথ্যচিত্ৰত গুজৰাটৰ দাঙ্গা বিজেপিৰ পৰিকল্পিত ষড়যন্ত্ৰৰ ফচল বুলি দেখুওৱা হৈছিল৷ ছবিখন তৎকালীনভাৱে চেঞ্চৰ বৰ্ড প্ৰধান অনুপম খেৰে সেই সময়তেই নিষিদ্ধ কৰে৷ বিষয়টোক লৈ বিতৰ্কও আৰম্ভ হৈছিল৷ ২০০৪ চনত দেশত কংগ্ৰেছ চৰকাৰ অহাৰ পাছত এই ডকুমেণ্টৰী দেখুৱাবৰ বাবে অনুমতি প্ৰদান কৰে৷
ইণ্ডিয়াছ ডটাৰঃ বিবিচিয়ে নিৰ্মাণ কৰা আন এখন বিতৰ্কিত ডকুমেণ্টৰী হৈছে ইণ্ডিয়াছ ডটাৰ৷ এই ডকুমেণ্টৰীয়েও আলোড়ন তুলিছিল দেশত৷ ২০১২ চনত সংঘঠিত নিৰ্ভয়া হত্যাকাণ্ডৰ ওপৰতেই এই ছবি নিৰ্মাণ কৰিছিল বিবিচিয়ে৷ ২০১৫ চনত এই ডকু ফিচাৰ বন্ধৰ নিৰ্দেশ দিয়ে কেন্দ্ৰই৷ এই চিৰিজত দিল্লী আৰক্ষীক ভুলভাৱে উপস্থাপন কৰাৰো অভিযোগ উত্থাপিত হৈছিল৷ এই সন্দৰ্ভত বিবিচিৰ এই চিৰিজখন বন্ধ কৰাৰ বাবে দিল্লী আৰক্ষীয়ে নিজাববীয়াকৈয়ে গোচৰ ৰুজু কৰিছিল আদালতত৷ বিষয়টো সংসদৰ মজিয়াও পাইছিলগৈ৷ সেই সময়ৰ তথ্য আৰু সম্প্ৰচাৰ মন্ত্ৰী ভেংকায়া নাইডুৱে বাঢ়ি যোৱা বিতৰ্কলৈ লক্ষ্য ৰাখি এই তথ্যচিত্ৰ বন্ধৰ নিৰ্দেশ দিয়ে৷ লগতে তেওঁ এই তথ্যচিত্ৰক ভাৰতক বদনাম কৰাৰ এক ষড়যন্ত্ৰ বুলি উল্লেখ কৰে৷
ৰাম কে নামঃ ভাৰতৰ ইতিহাসত সকলোতকৈ বিতৰ্কিত চিৰিজসমূহৰ ভিতৰত এখন হৈছে ‘ৰাম কে নাম’ নামৰ তথ্যচিত্ৰখন৷ আনন্দ পৰ্টবৰ্ধনে এই ডকু ফিচাৰ নিৰ্মাণ কৰিছিল ১৯৯২ চনতেই৷ তেওঁ তথ্যচিত্ৰত বিশ্ব হিন্দু পৰিষদে অযোধ্যাৰ বাবৰি মছজিদ ভাঙি ৰাম মন্দিৰ নিৰ্মাণ কৰাৰ ষড়যন্ত্ৰ কৰা বুলি দেখুওৱা হৈছে৷ ধৰ্মীয় উচটনি দিয়াৰ অভিযোগতেই এই তথ্যচিত্ৰ চৰকাৰে নিষিদ্ধ কৰে৷
ইনছাল্লাহ ফুটবলঃ কাশ্মীৰৰ এজন যুৱকে গৈ ব্ৰাজিলত ফুটবল খেলিব বিচাৰিছিল৷ কিন্তু তেওঁক পাছপৰ্ট দিয়া নহ’ল৷ এই পটভূমিক লৈয়েই তথ্যচিত্ৰ ইনছাল্লাহ ফুটবল নিৰ্মাণ কৰা হৈছিল৷ ২০১০ ত এই ডকুমেণ্টৰীখনে ভাল ছবিৰ চাৰ্টিফিকেট পালেও কিছুদিন পাছতেই ইয়াক নিষিদ্ধ বুলি ঘোষণা কৰে৷ কোৱা হয় যে এই ছবিত ভাৰতীয় সেনাক ভিলেইন সজোৱা হৈছে৷ অশ্বিন কুমাৰ নামৰ পৰিচালকজনে তাৰপাছতেই আৰু এখন তথ্যচিত্ৰ নিৰ্মাণ কৰে৷ সেই ছবিখন পাছত ইনছাল্লাহ কাশ্মীৰ নামেৰে অনলাইনত মুক্তিলাভ কৰে৷
কলকাতা ফেণ্টম ইণ্ডিয়াঃ ভাৰতৰ বিভিন্ন বিতৰ্কিত বিষয়ক দাঙি ধৰাটোৱেই যেন বিবিচিৰ প্ৰধান কাম৷ ১৯৭০ চনতেই বিবিচিয়ে নিৰ্মাণ কৰিছিল বিতৰ্কিত তথ্যচিত্ৰ কলকাতা ফেণ্টম ইণ্ডিয়া৷ য’ত ভাৰতীয় লোকৰ দৈনন্দিন জীৱন যাত্ৰাক দেখুওৱা হৈছিল৷ ভাৰত চৰকাৰৰ অভিযোগ অনুসৰি এইখন চিৰিজত ভাৰতক নিন্দনীয়ভাৱে দেখুওৱা হৈছে৷ এই তথ্যচিত্ৰৰ বাবেই বিবিচিক দুবছৰৰ বাবে নিষিদ্ধও কৰা হৈছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
