টীম ইণ্ডিয়াৰ সহকাৰী প্ৰশিক্ষকৰ পদ এৰিলে ৰায়ন টেন ড’শ্বেটে। ৰায়ন টীম ইণ্ডিয়াৰ সহকাৰী প্ৰশিক্ষক হিচাপে কাৰ্যনিৰ্বাহ কৰি আছিল। ইংলেণ্ড ভ্ৰমণৰ সময়ত ড’শ্বেটে BCCIক জনাইছিল যে তেওঁ নিজৰ কাৰ্যকাল বৃদ্ধি নকৰে। ইতিমধ্যে ৰায়নৰ চুক্তিৰ ম্যাদ শেষ হৈছিল।
টীম ইণ্ডিয়াৰ শিবিৰ এৰাৰ পিছতে ৰায়নে পৰৱৰ্তী ছিজনৰ পৰা IPLৰ দল কলকাতা নাইট ৰাইডাৰ্ছত সহকাৰী প্ৰশিক্ষকৰ দায়িত্বত থাকিব বুলি সদৰী কৰিছে। ইয়াৰ পূৰ্বেও তেওঁ KKRৰ সহকাৰী প্ৰশিক্ষক হিচাপে কাম কৰিছিল। KKRৰ মুখ্য প্ৰশিক্ষক অভিষেক নায়াৰৰ সৈতে পুনৰ একত্ৰিত হ’ব টেন ড’শ্বেটে। ইয়াৰ পূৰ্বেও দুয়োজনে একেলগে কিছুদিন ভাৰতীয় দলৰ সহকাৰী প্ৰশিক্ষক হিচাপে কাৰ্যনিৰ্বাহ কৰিছিল।
টেন ড’শ্বেটৰ KKRৰ সৈতে দীৰ্ঘদিনীয়া সম্পৰ্ক আছে। খেলুৱৈ হিচাপেও KKRৰ সৈতে দুটা IPL খিতাপ জয় কৰিছিল ৰায়নে। ইয়াৰ উপৰিও ২০২২ চনত ফিল্ডিং প্ৰশিক্ষক হিচাপে KKRত জড়িত আছিল ৰায়ন। ২০২৪ চনলৈকে ৰায়ন KKRৰ প্ৰশিক্ষক দলৰ অংশ হৈ আছিল। ইয়াৰ পিছতে ৰায়নে গম্ভীৰৰ নিৰ্দেশতে টীম ইণ্ডিয়াত সহকাৰী প্ৰশিক্ষক হিচাপে যোগদান কৰিছিল।
অৱশ্যে টীম ইণ্ডিয়াৰ সহকাৰী প্ৰশিক্ষক হিচাপে টেন ড’শ্বেটৰ প্ৰদৰ্শন মিশ্ৰিত আছিল। ৰায়নৰ সহকাৰী প্ৰশিক্ষণৰ কাৰ্যকালত ভাৰতে ২০২৫ চনৰ এছিয়া কাপ আৰু ২০২৬ চনৰ T20 বিশ্বকাপত জয়লাভ কৰিছিল। কিন্তু ইয়াৰ বিপৰীতে টেষ্ট ক্ৰিকেটত খুবেই হতাশাজনক প্ৰদৰ্শনৰ সন্মুখীন হৈছিল টিম ইণ্ডিয়া। অষ্ট্ৰেলিয়াত বৰ্ডাৰ-গাভাস্কাৰ ট্ৰফীত পৰাস্ত হোৱা দলটোৱে ঘৰৰ মাটিতে নিউজিলেণ্ড আৰু দক্ষিণ আফ্ৰিকাৰ হাতত শৃংখলা হেৰুৱাইছিল। সম্প্ৰতি ৰায়নৰ গমনৰ পিছত টীম ইণ্ডিয়াত খালী হোৱা সহকাৰী প্ৰশিক্ষকৰ পদটোত কোনে স্থান লাভ কৰিব তাকে লৈ চৰ্চা আৰম্ভ হৈছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
